Read lango Marako 7 Bible Online

Marako 7 - lango bible

Marako 7

¹Oparicayo kede opwony-cikkogo ame oya i Jerucalem ocokere baŋe.

²Ote neno jo mogo i akina olub Yecu ame cemo aboŋo lubo kwer, te koppere ni mom ologo ciŋgi.

³(Pien Oparicayo kede Ojudaya ducu ka mom ologo ciŋgi atek, mom otwero cem, pien oma-ko kite a jo adoŋo.

⁴Dok ka odwogo i cuk, mom ocemo ituno ka koŋ olwokere; dok tye lwak cik ocele apol ame gin lubo, bala me lwoko ikopo-gu, kede weer, kede gulli mola.)

⁵Oparicayo kede opwony-cik openye ni, “Piŋo joni a lubi mom lubo kit a jo adoŋo, ento ocemo a pe ologo ciŋgi?”

⁶En te gamo ni, “Adwarpiny Icaya yam okobo aber i komwu, wun ogoba, acalo rik ocoo ni, ‘Rok-k i wora i doggi nono, cunygi kara bor keda;

⁷ento owora nono, pwony ame gin opwonyo obedo kite a dano.’

⁸Iweko wunu cik Obaŋa oko, ite lunyo wunu mako kite a dano.”

⁹Dok okobbigi ni, “Itimo wunu ber me bolo cik Obaŋa, me ite gwoko wunu kitewu!

¹⁰Pien Muca nwaŋ okobo ni, ‘Wor pappi kede totti,’ dok ni, ‘Dano a yeto pappere onyo tottere myero nek oko’.

¹¹Cite wun ikobo wunu ni, ‘Ka ŋattoro okobbi pappere onyo tottere ni, Gin a kono akonyi kede en Korban’ (te koppere ni, doŋ omio oko baŋ Obaŋa),

¹²mom oye ni en tim ginnoro pi konyo pappere onyo tottere.

¹³Amannono imio wunu kop Obaŋa to nono pi kitewu ame ipwonyo wunu kede jo. Dok daŋ itimo wunu gin ocele apol ame rom kede mano.”

¹⁴En dok ocwano lwak baŋe, okobbigi ni, “Wun ducu winy wunu koppa, daŋ iniaŋ wunu iye.

¹⁵Mom tye ginnoro ame ya i oko ame twero balo dano ka odonyo i yie; ento gin ame ya i yi dano en ame balo dano. [

¹⁶Ka ŋattoro tye i yit me winyo, myero winy.]”

¹⁷Ka doŋ odonyo i ot, ame oweko lwak, jo mere a lube openye pi carokoppono.

¹⁸En te kobbigi ni, “Wun daŋ kara pwod pe iniaŋ wunu? Pe iŋeo wunu ni, jami ducu ame donyo i yi dano kun oya i oko pe twero bale?

¹⁹Pien mom donyo i cunye, cite kato i cin-yic, te kato oko.” (Ka okobo amannono, olonyo wit cem ducu.)

²⁰Te dok kobo ni, “Gin ame ya i yi dano en ame balo dano.

²¹Pien gin oya i yi dano, ame oya i cunye, en tam areco, coco, kwo, nek, cot,

²²woro me lim, timmogo areco, bwolo jo, tarwaŋ, nyeko, ayet, wakere, miŋo.

²³Jami ducu arecc-ni ya i yi dano, daŋ obalo dano.”

²⁴Yecu oya i kuno, owoto i lobo a ceggi kede Turo kede Cidon. Odonyo i ottoro, mom omito ni ŋattoro ŋe ni etye kuno; ento mom gire etwero pono.

²⁵Oyotoyot dako moro a nyare tye kede cen arac te winyo rwoŋe oko, obino te ryebere i te tyene.

²⁶Dan-nu dano me Grik, rokkere Curo-poinike. En okwao Yecu ni ryem cen arac i kom nyare.

²⁷En te kobbe ni, “Koŋ iwek itino kwoŋ yeŋ, pien mom ber ikwanyo cem itino, ote yuyi gwogi.”

²⁸Dako te gamo ni, “Mannono ikobo kakare, Adwoŋ; ento otino gwogi ame i te meja daŋ camo ŋid cem itino do.”

²⁹Te kobbe ni, “Pi kop ame ikobo-nu, dok giri paco; cen doŋ oya oko i kom nyari.”

³⁰Dako te dok paco; te nwoŋo atin obuto i wi tanda, a cen arac doŋ oya oko i kome.

³¹Yecu oya i lobo a ceggi kede Turo, obeo i Cidon, otuno i nam me Galilaya, te pello i dye lobo me Dekapoli.

³²Gin te kela baŋe dano moro ame yite odiŋ, ame mom kobo aber, gin te bako doggi baŋe ni eket ciŋe i kome.

³³Otere teŋe iya i baŋ lwak i muŋ, te keto nyako ciŋe i yit dano-nu, te ŋulo lao, omulo lebe;

³⁴dok te neno malo i polo, ocur kun kobo ni, “Epata,” te koppere ni, “Yabere!”

³⁵Yit dano-nu te yabere oko, te lebe daŋ te gony oko, te cako kop aber, aboŋo peko moro.

³⁶Yecu te cikogi ni, kur dok otit baŋ ŋattoro; ento kadi bed ocikogi, gin omedde omeda i lalo kop-pu.

³⁷Gin owuro okato kare a kun okobo ni, “Jami ducu ame en otimo ber; omio jo ame yitgi odiŋ owinyo, kede jo ame te lebgi oto okobo.”