Read lango Marako 8 Bible Online

Marako 8 - lango bible

Marako 8

¹Kare-nono lwak dok ocokere apol, cam daŋ onwoŋo mom. Yecu te lwoŋo baŋe jo mere a lube, te kobbigi ni,

²“Lwak ocona meicel, pien gin orio baŋa odoko nino adek twal, kun mom otye kede cammoro.

³Ka acwaogi paco a kun yigi nono, kec bino bwoyogi i yo; pien jo mogo i akinagi oya i kan aboco.”

⁴Jo mere a lube te dok iye ni, “Kara dano twero pito jo-ni kede ogati nino a kun kan tim?”

⁵Openyogi ni, “Ogati tye baŋwu adi?” Ote gamo ni, “Abiro.”

⁶Ociko lwak ni bed piny, omako ogati abiro; ka doŋopwoo, onyinyilo, omio baŋ jo a lube wek oket i nyim jo, gin daŋ oketo i nyim lwak.

⁷Onwoŋo daŋ otye kede rece anok atitino; okwao iye winyo, te ciko ni daŋ ket i nyim lwak.

⁸Gin ocamo, oyeŋ; ote coko ŋid cam ame oloogi, opoŋ oromo dwoŋ abiro.

⁹Wel jo ocamo oromo bala tutumia aŋwen.

¹⁰Ocikogi; te donyo i yee oyotoyot karacel kede jo mere a lube, te wot i lobo me Dalmanuta.

¹¹Oparicayo obino, ote cako pyem kede Yecu a kun oyenyo i baŋe anyut ame oya i polo, pi bite.

¹²Omio en ocur atek i cunye kun kobo ni, “Piŋo lwagi jo me kare-ni yenyo anyut? Ateni akobbiwu ni, mom obino miyo anyuttoro baŋ lwagi jo me kare-ni.”

¹³Owekogi, te donyo i yee me ŋolo nam, te pello loka tuŋ ca.

¹⁴Onwoŋo wigi owil oko i tero ogati, rik otye kede ogati acel keken baŋgi i yee.

¹⁵Okwenyorogi atek kun kobo ni, “Myero inen ni igwokere wunu i tobi Oparicayo kede i tobi a Kerode.”

¹⁶Gin openyere kengi kengi, okobo ni, “Pe otye kede ogati.”

¹⁷Ka Yecu oŋeo, te penyogi ni, “Piŋo ipenyere wunu ni mano, ogatiwu pe tye? Mom ru iniaŋ wunu? Mom imako wunu aber? Cunywu pwod nwaŋ?

¹⁸ltye wunu kede waŋwu, mom ineno wunu? Itye wunu kede yitwu, mom iwinyo wunu ce?

¹⁹I kare a cen anyinyilo ogati abic ca pi jo tutumia abic, rik icoko wunu opoŋ aditti adi?” Ote gamo ni, “Apar wie aryo.

²⁰Kede ogati abiro ca pi jo tutumia aŋwen, rik icoko wun opoŋ dwoŋ adi?” Ote gamo ni, “Abiro.”

²¹Openyogi ni, “Mom ru iniaŋ wunu?”

²²Gin te bino i Betecaida, jo mogo te kelo baŋ Yecu dano ame waŋe oto, obako doggi baŋe ni en gudi.

²³En te mako ciŋ atowaŋ, otere teŋe i ŋet paco, te cako ŋulo lao i waŋ lo-nu, te keto ciŋe i kome, te penye ni, “Ineno ginnoro ya?”

²⁴Lo-nu te tiŋo waŋe malo, te kobo ni, “Aneno jo, ento onen acalo yen kun owot.”

²⁵Yecu dok te keto ciŋe i waŋ lo-nono; doŋ te neno oko atek, waŋe te dok kakare, doŋ te neno jami ducu acil.

²⁶Yecu te cwaye paco tuŋe kun cike ni, “Kur ikob i ŋattoro iyi paco.”

²⁷Yecu kede jo mere a lube owoto i akina myere i ŋet Kaicaria Pilipi. Ame otye iyo, en openyogi ni, “Kara lwak kobo ni an ŋa?”

²⁸Ote kobbe ni, “Lakana Abatija; jo mogo kobo ni, Elia, jo ocele ni ŋat acel i akina odwarpiny.”

²⁹Te dok penyogi ni, “Kara wun kono, ikobo wunu ni an ŋa?” Petero te gamo ni, “Yin i Kricito ta.”

³⁰Ka doŋ te cikogi ni kur otit kop i kome-nono baŋ dano moro.

³¹Yecu te cako pwonyogi ni, Wot a dano myero kany can apol, dok odoŋe kede olamdog kede opwony-cik myero kwere, neke, ento a doŋ nino adek okato, myero cere oko.

³²Okobo kop man kannaler, omio Petero otere teŋe, te ero juke.

³³Ento en olokere oneno jo mere a lube, te juko Petero kun kobo ni, “Dok i ŋea, yin Catan! Pien yin mom ilubo tam Obaŋa, ento ilubo mea dano.”

³⁴Ocwano lwak baŋe, karacel kede jo mere a lube, te kobbigi ni, “Ka dano moro mito luba, myero koŋ oge kwerre kene, tiŋ yataria mere, luba.

³⁵Pien dano ame mito laro kwo mere, bino rwenyo kwo mere arwenya, ento dano ame rwenyo kwo mere pira kede pi amut aber, bino laro.

³⁶Kara konyo dano kede ŋo ka ocamo lobo luŋ kun kwo mere omao oko?

³⁷Dano twero miyo ŋo pi dwoggo kwo mere?

³⁸Dano ame lewic bino make pira kede pi koppa, i kare man me cot kede me bal, Wot a dano daŋ lewic bino make i kome i kare a en bino dwogo kede kwogo a Pappere kede me omalaika acil.”