Read lango Marako 9 Bible Online

Marako 9 - lango bible

Marako 9

¹Dok okobbigi ni, “Ateni akobbiwu ni, tye jo mogo ame ocuŋ kan, ame mom bino bilo to, a mom ru oneno loc Obaŋa kun abino kede teko.”

²Ame nino abicel doŋ okato, Yecu otero Petero kede Yakobo kede Lakana, oyito kedgi i wi kidi abor i muŋ, gin kengi. Kit kome te lokere oko i nyimgi,

³rukkere te doko acara kun tar meicel; mom tye dano moro i wi podo luŋ ame twero lwoko eka te lony amannono.

⁴Elia te nen baŋgi gin kede Muca, kun okop i Yecu.

⁵Petero te kobbi Yecu ni, “Rabbi, ber meicel wan ibedo kan; wek oger gonye adek, acel meri, acel mea Muca, acel me Elia.”

⁶Onwoŋo mom ŋeo gin a myero ekobi, pien lworo omako-gi atek.

⁷Tipo pol te wumogi ipuk, dwon te ya i pol, ni, “Man en Woda ame amaro; winye wunu.”

⁸Gin te bobolo waŋgi oyotoyot, naka mom oneno dano moro, kono ka Yecu ame tye baŋgi-ni keken.

⁹Ame oyitto piny iya i wi kidi, ocikogi ni kur otit i ŋattoro gin ame gin oneno, ituno ka Wot a dano doŋ ocer i akina a jo oto.

¹⁰Gin ote mako koppono, doŋ gin kengi ote bedo penyere ni, “En cer i akina a jo oto ce te koppere no?”

¹¹Ote penyo Yecu ni, “Piŋo opwony-cik kobo ni, Elia myero koŋ bin?”

¹²Okobbigi ni, “Elia koŋ bino tuno, me edwok jami ducu kakare. Ento kara dok ocoo nino i kom Wot a dano ni, myero en kany can adwoŋ, dok ni, obino caye?

¹³Ento an atittiwu ni, Elia doŋ otyeko bino, jo otime gin a yigi omito, acalo rik ocoo i kome.”

¹⁴Ka doŋ gin otuno baŋ jo mere ocele a lube, oneno lwak ecipan ogurogi dyere, kun opwony-cik tye a pyem kedgi.

¹⁵Cucuttono ka lwak onene, gin luŋ owuro meicel, ote riŋo baŋe ka mote.

¹⁶Openyogi ni, “Kara ipyem wunu kedgi pi koppene?”

¹⁷Dano moro i akina lwak te gamo ni, “Apwony, onwoŋo akelo woda baŋi. En tye kede cen a mom kobo;

¹⁸i kabedo ducu ka cen ocuto i kome, dole piny, bwoo yenyo i doge, mio kao lake atek, riko kome oko. Doŋ akwao jo meri a lubi ni ryem, ryemo oloogi oko.”

¹⁹En ogamo ni, “Wun lwagi jo ame iyeewu mom, abino bedo kedwu naka awene? Abino diyo cunya i komwu ituno awene? Kele wunu baŋa.”

²⁰Okele baŋ Yecu. Ka cen onene, oyotoyot omio awobi-nu oryeye; orette piny, onenne kun bwoo yenyo i doge.

²¹Yecu openyo pappere ni, “Doŋ otime kite man pi kare a rom mene?” Te gamo ni, “Kom cakere a pwod tidi.

²²Tyen apol otemo neke kun rete i mac kede i pii-gu. Doŋ ka itwero timo ginnoro iye, tim ber ikonya.”

²³Yecu te gamo ni, “Ka itwero! Jami luŋ twerre baŋ dano ame ye Obaŋa.”

²⁴Papa atin te gamo oko oyot kun redo kede areda ni, “Aye; konya i kom iyeena anok-ki.”

²⁵Yecu ka oneno ni lwak tye ka riŋo karacel, te juko cen arac kun kobo ni, “Yin cen a mom kobo, ame yiti odiŋ, aciki ni, ya oko i kom awobi, kur dok idok i kome atwal.”

²⁶En okok, te bedo ryeye aryea atek, te ya oko; awobi te bedo bala dano oto, omio pol a jo okobo ni, “En oto oko gire.”

²⁷Ento Yecu omako ciŋe, otiŋe, oya malo.

²⁸Ka Yecu doŋ odonyo i ot, ame otye kengi, jo mere a lube openye ni, “Ŋo omono wan daŋ iryeme?”

²⁹En te kobbigi ni, “Gin acalo man mom ya pi ginnoro, kono ka pi kwayo Obaŋa keken.”

³⁰Gin oya i kuno, oŋolle i dye Galilaya. Yecu mom omito ni dano moro ŋee:

³¹pien onwoŋo tye ka pwonyo jo mere a lube, kun kobbigi ni, “Wot a dano obino miye i ciŋ jo, obino neke; a doŋ oneke, ame nino adek doŋ okato, en bino cer oko.”

³²Ento gin mom oniaŋ koppono, daŋ ote lworo penye.

³³Nwaŋ otuno i Kapernaum. A doŋ otye i ot, Yecu te penyogi ni, “Kara koppene a woki ipyem wunu iye i waŋa yo?”

³⁴Gin ote liŋ aliŋa, pien nwaŋ obedo pyem kengi kengi i waŋa yo ni, ŋa i akinagi ame dit loogi?

³⁵En te bedo piny, olwoŋo jo-nu apar wie aryo, te kobbigi ni, “Ka dano moro mito ebed me agege, en myero doŋ cen i ŋe owote mere ducu, bed aticgi ducu.”

³⁶Otero atin, omio ocuŋ i akinagi, okwake kede bade kun kobbigi ni,

³⁷“Dano ame jolo atinnoro acel bala man i nyiŋa, nwoŋo ojolo an; dano ame jola, mom ojolo an, ento ojolo ŋat oora.”

³⁸Lakana okobbe ni, “Apwony, oneno ŋattoro ame aryemo cen kede nyiŋi, ojuke, pien onwoŋo mom lubowa.”

³⁹Ento Yecu okobo ni, “Kur, ijuke wunu; pien mom tye dano moro ame tio ticcogo atek adoŋo i nyiŋa, ame bino twero kobo kop arac i koma oyotoyot.

⁴⁰Pien ŋat a mom akworwa tye tuŋ baŋwa.

⁴¹Dok ŋattoro ame bino miyowu ikopo me pii amata aŋic, ni, pien wun jo a Kricito, ateni akobbiwu ni, mot me pwoc mom bino rwenyo i baŋe kadi acelloro.

⁴²“Dano ame bino miyo ŋattoro acel i akina jo-ni atino-ni ame oye an opoto i bal, twara ame otweo kidi rego adwoŋ i ŋute, ote core kede nam.

⁴³Ka ciŋi en a mii ipoto, toŋ oko; twara idony i kwo ame ciŋi tuŋ cel mom tye, kato a kono oboli kede ciŋi ryoryo i Geena, i mac a mom to. [

⁴⁴Kuno kudi megi mom to, mac daŋ mom gik.]

⁴⁵Ce ka tyeni en a mii ipoto, toŋ oko; twara ame idony i kwo ame tyeni tuŋ cel mom tye, kato a kono oboli kede tyeni ryoryo i Geena. [

⁴⁶Kuno kudi megi mom to, mac daŋ mom gik.]

⁴⁷Ce ka waŋi en a mii ipoto, kole oko; twara idony i loc Obaŋa ame itye kede waŋi acel keken, kato a kono oboli kede waŋi ryoryo i Geena.

⁴⁸Kuno kudi megi mom to, mac daŋ mom gik.

⁴⁹“Pien kado ame bino lonyo dano acel acel en mac.

⁵⁰Kado ber; ento kado ka odoko bot, iloko wunu doko amit iŋo? Bed wunu kede kado i yiwu kenwu, dok ibed wunu i kuc kenwu kenwu.”