Read lango Luka 1 Bible Online

Luka 1 - lango bible

Luka 1

¹Jo apol doŋ otemo coyo kop i kom gin ame otimere i akinawa,

²kun gin olubo kop ame jo mogo orabo baŋwa, gin jo a rik oneno kede waŋgi ya i ageyi mere, ame gin daŋ odoko otic me amut aber.

³Pi mannono, Adwoŋ Won Kwogo Teopilo, ka doŋ aŋio kop ducu cakere i tere, an daŋ aneno ni ber acoyi ame doŋ acano aber,

⁴me iniaŋ ateni me kop a rik opwonyi iye.

⁵I kare ame Kerode obedo abaka me Judaya, nwaŋ tye alamdoggoro ame nyiŋe Jekeria, me i eryoŋet Abija. Rik tye kede cege i akina anyira Aron, nyiŋe Elicabet.

⁶Gin aryo luŋ rik kitegi atir i nyim Obaŋa, kun olubo cik kede icwil a Rwot ducu aboŋo bal.

⁷Rik mom otye kede atinnoro, pien Elicabet nwaŋ oraŋa, gin aryo luŋ mwakki me ditogi onwoŋo doŋ pol.

⁸I kare ame Jekeria tye a tiyo ticcere me alamdog i nyim Obaŋa, i kare me waŋ ticcere,

⁹acalo kite olamdog tye, kwir okwanye me donyo i ot a Rwot pi waŋo odok akur.

¹⁰Lwak jo luŋ onwoŋo tye ka kwayo Obaŋa i oko i caa me waŋo odok akur.

¹¹Amalaika a Rwot onen baŋe kun ocuŋ i ŋet keno me waŋo odok akur.

¹²Ka Jekeria onene, cunye opoto, lworo omake.

¹³Ento amalaika okobbe ni, “Kur ilwor, Jekeria, pien kwacci doŋ owinyere, dakoni Elicabet bino nywalli atin awo bi, ibino cako nyiŋe Lakana.

¹⁴Ibino bedo i yomcuny kede lelo, jo apol cunygi bino bedo yom pi nywale;

¹⁵pien en bino bedo adwoŋ i nyim Rwot. En mom bino mato koŋo, kadi gin ame mero jo; Cuny Acil bino poŋ i yie, cakere i yi tottere.

¹⁶En bino dwoko jo Icrael apol baŋ Rwot Obaŋagi;

¹⁷en ame bino kwoŋo nyime i cuny Elia kede i tek Elia, me loko cuny onywal i kom itinogi, kede pi dwoko cuny jo a mom winyo icwil i kom ryeko a jo a kitegi atir, doki pi yikki Rwot jo a doŋ oyikere.”

¹⁸Jekeria te penyo amalaika ni, “Kara abino ŋeyo man niŋo? Pien an doŋ ati oko, anaka cega daŋ mwaka me dittere doŋ pol”

¹⁹Amalaika ogamo doge ni, “An Gabriel, ame acuŋ i nyim Obaŋa; oora ni akob kedi, kede pi kelli amut man aber wok-ki.

²⁰Winy ba, ibino liŋ, a mom itwero kop, ituno kede i nino ame mano bino timere iye, pien mom iye koppa; cite koppa bino cobere, ka kare mere oromo.”

²¹Lwak obedo kuro Jekeria, kun owuro pi gallere i ot Obaŋa.

²²Ame en odonyo oko, onwoŋo doŋ mom twero kop kedgi; gin ote niaŋ ni, ginnoro onyutte baŋe acalo lek i ot Obaŋa. En te bedo gwetogi, kun mom doŋ twero kop.

²³Ka kare me ticcere otum, te dok tuŋe.

²⁴Ka doŋ kare-nono otum, dako mere Elicabet te yac oko. Opono a romo dwete kany, te bedo kop ni,

²⁵“Rwot otimo amannono i koma i kare ame doŋ onena iye, me ekwany lewic i koma oko i akina jo.”

²⁶I dwe me abicel, Obaŋa ooro amalaika Gabriel i paco moro ame i lobo Galilaya, nyiŋe Najaret,

²⁷baŋ nyako a mom ru tye kede apayi mere, ame ociko pi ico a nyiŋe Yucepu me doggola a Daudi; nyan-nu nyiŋe Maliam.

²⁸Obino baŋe, omote ni, “Oreme ba, yin ame omii winyo, Rwot tye kedi!”

²⁹Cite en cunye opoto pi kop ame okobo; obedo ka paro te kop me amottono.

³⁰Amalaika te kobbe ni, “Kur ilwor, Maliam, pien inwoŋo winyo ibaŋ Obaŋa.

³¹Nen ba, ibino gamo, ibino nywalo atin awobi, ibino cako nyiŋe Yecu.

³²En bino bedo dit, obino lwoŋe ni, Wot a En Amalo Meicel; Rwot Obaŋa bino miye kom me loc a kwaro mere Daudi.

³³En bino loyo ot a Yakobo atwal, loccere mom abino gik.”

³⁴Maliam te penyo amalaika ni, “Man bino bedo niŋo, ame pe ru aŋeye kede ico?”

³⁵Amalaika te dokke iye ni, “Cuny Acil bino poto i komi, teko a En Amalo Meicel bino wumi bala tipo; pi manno, atin ame ibino nywalo obino lwoŋe ni, Acil, Wot Obaŋa.

³⁶Nen, watti Elicabet doŋ oyac oko atin awobi, i tio mere; man doŋ dwe me abicellerie i kom ŋat a yam olwonŋo ni oraŋa.

³⁷Pien mom tye ginnoro a loo Obaŋa.”

³⁸Maliam te kobo ni, “Nen, an aŋeca a Rwot; wek obed baŋa acalo ikobo-nono.” Eka amalaika te ya oko baŋe.

³⁹I kare-nono Maliam oya, owoto oyotoyot i lobo ame obedo kidikidi, i paco moro me Juda,

⁴⁰odonyo i ot a Jekeria, omoto Elicabet.

⁴¹Tekki Elicabet winyo amot a Maliam, atin te tiŋere oko i yie. Cuny Acil opoŋ i yi Elicabet,

⁴²okobo kede dwon amalo ni, “Itye kede winyo i akina mon, nyodo me yii daŋ tye kede winyo!

⁴³Kop-pi kara ya ikwene, tota a Rwotta obino baŋa?

⁴⁴Nen, ka dwon ame imota kede odonyo i yita, atin i yia otiŋere kede yomcuny.

⁴⁵Tye kede winyo ŋat ame oye, pien kop ame Rwot otito baŋe bino cobere kakare.”

⁴⁶Maliam te kobo ni, “Cunya adworo Rwot,

⁴⁷yia yom pi Obaŋa Alarra,

⁴⁸pien oyero aŋeca mere, kadi en obedo ocan. Nen, cakere tin lwak me kare luŋ obino lwoŋa ni an ŋat a winyo tye i kome;

⁴⁹pien en ame tye kede twer otima gin adit nyiŋe daŋ cil.

⁵⁰Kica mere tye baŋ lwagi jo lwore me lare luŋ.

⁵¹Otia tic atek kede bade, olalo jo ame yon i tam me cunygi;

⁵²oreto oloc piny i wi kome locgi, omio dito baŋ ocan.

⁵³Jo ame kec nekogi omiogi oyeŋ kede cem abeco, oryemo olonyo odok i ciŋgi nono.

⁵⁴Okonyo amiro mere Icrael, opo pi timo kica,

⁵⁵acalo rik okobo baŋ kwariwa, baŋ Iburaim kede baŋ ikwae atwal.”

⁵⁶Maliam ori baŋ Elicabet dwete adek, te dok ture.

⁵⁷Ka kare me nywal a Elicabet oromo, onywalo atin awobi.

⁵⁸Ka wati mere kede jo turgi owinyo ni Rwot otimo kica adwoŋ i kome, gin olelo karacel kede.

⁵⁹I nino me aboro gin ote bino ka liro atin. Gin omito cako nyiŋe Jekeria bala nyiŋ pappere,

⁶⁰ento tottere ogame ni, “Mom amannono, obino lwoŋe ni, Lakana.”

⁶¹Gin ote dok iye ni, “Kodi nyiŋŋono mom tye baŋ aturu moro.”

⁶²Gin te gweto pappere, ote penye kite a en mito ni cak i nyiŋ atin.

⁶³En te penyo kidi coc, ti coyo ni, “Nyiŋe Lakana.” Gin ducu owuro awura.

⁶⁴Cucuttono doge te yabere oko, te lebe te gony oko, okobo kun pwoo Obaŋa.

⁶⁵Lworo omako jo ducu ame onwoŋo tye ceggi i laŋetgi, koppono te lal oko i lobo Judaya luŋ ame obedo kidikidi.

⁶⁶Jo luŋ ame owinyo omako i cunygi, kun okobo ni, “Kara atin-nono kite bino bedo calladi?” Aco, koŋ inen, ciŋ Obaŋa tye i kome.

⁶⁷Cuny Acil opoŋ i yi pappere Jekeria, te ero kop acalo adwarpiny ni,

⁶⁸“Opwo wunu Rwot Obaŋa me Icrael, pien doŋ olimo jo mere, olakorogi.

⁶⁹Omiowa twon Alar atek, i ot amiro mere Daudi,

⁷⁰acalo rik okobo i dog, adwarpiny mere acil, ame obedo geye i kare acon,

⁷¹me larowa i baŋ okworwa, kede i ciŋ jo luŋ ame dagowa,

⁷²pi timo kica baŋ kwariwa, kun opo pi cikere mere acil,

⁷³kede kwoŋ a rik okwoŋo baŋ kwarowa Iburaim,

⁷⁴ni ebino miyowa otio baŋe aboŋo lworo, kun olarowa i ciŋ okworwa,

⁷⁵kun wan ocil, ame kitewa atir i nyime, nino megwa ducu.

⁷⁶Yin atin daŋ, obino lwoŋi ni adwarpiny a En Amalo Meicel, pien ibino kwoŋo nyim Rwot pi yiko yo mere,

⁷⁷kun imio jo mere ŋec me lar, pi weko bal megi,

⁷⁸pi kica Obaŋawa ame wan ocono, ame obinniwa i malo bala rupiny,

⁷⁹me menyo jo ame bedo i piny acol kede i tipo me to, kede tiro tyenwa i yo me kuc.”

⁸⁰Atin odoŋo, tek omedde i cunye, obedo i tim ituno i nino ame onyute iye baŋ jo Icrael.