Read lango Luka 10 Bible Online

Luka 10 - lango bible

Luka 10

¹Icennere Rwot oyero jo ocele pyerabiro, oorogi aryo aryo okwoŋo nyime, me gin wot i boma ducu kede i kabedo luŋ kan a en ikome bino tuno iye.

²Okobbigi ni, “Kac bup, ento jo a kao nok Pi mano, kwa wunu Won poto atek me cwa otic i ka kaccere.

³Wotu giwu; nen, acwaowu bala rommi i akina epet.

⁴Kur iwot wunu kede cao me lim, onyo cao ocele, anaka amuk; kur imot wunu ŋattoro i waŋa yo,

⁵i ot ducu ame ibino donyo wunu iye koŋ itek kobo wunu ni, ‘Kuc obed i ot man!’

⁶Ka dano me kuc tye kuno, kucwu bino bedo i kome; ento ka mom, kucwu bino dwogo baŋwu.

⁷Bed wunu i ottono, kun icamo wunu, imato wunu gin omiowu, pien atic myero culle ocara mere; kur ibed wunu kobo i ot i ot.

⁸Ka idonyo wunu i boma moro ote jolowu, cam wunu gin ame oketo i nyimwu;

⁹can wunu otwo ame tye iye, tittigi wunu ni, ‘Loc Obaŋa doŋ onoko ceggi baŋwu.’

¹⁰Ento ka idonyo wunu i boma, ce mom ojolowu, wot wunu i waŋa yo me boma-nono, ite kobo wunu ni.

¹¹‘Anaka apua me bomawu ame omoko i tyenwa oteŋo i komwu oko; kadi bed amannono, ber iŋe wunu man ni, loc Obaŋa doŋ onoko ceggi.’

¹²Atittiwu ni, i nino-nono, can a Codoma bino bedo itikatika, kato me bomanono.

¹³“Ibino neno can, yin Korajin! Ibino neno can, yin Betecaida! Pien kono tic atek adoŋo ame otio baŋwu, yam otio i Turo kede Cidon, kono gin oŋut con, kun obedo i boŋo cola kede buru.

¹⁴Ento can a Turo kede Cidon bino bedo itikatika i kare me ŋolo kop, kato mewu.

¹⁵Kede yin Kapernaum, obino tiŋi malo anaka i polo bo? Pe gire; kom obino dwoki piny naka i Kadec.

¹⁶“Ŋat ame winyowu, nwoŋo owinya; ŋat ame kwerowu, nwoŋo okwera; ŋat ame kwera, nwoŋo okwero ŋat ame oora.”

¹⁷Jo mano pyerabiro odwogo kede yomcuny, kun okobo ni, “Rwot, anaka cen areco owinyowa pi nyiŋi!”

¹⁸En odokkigi iye ni, “Cen aneno Catan kun rette ame oya i polo calo lutkot.

¹⁹Nen, doŋ amiowu twer me nyono twol kede yit, anaka me loyo teko akwor ducu; gin a bino timowu arac mom tye.

²⁰Kadi obedo amannono, kur ilel wunu pi man, ni cene-gu owinyowu; ento lel wunu pien nyinwu doŋ ocoo i polo.”

²¹I caa-nono, Yecu olelo i Cuny Acil kun kobo ni, “Apwoyi, Pappa, Rwot me polo kede lobo, pien ikano kop magi baŋ jo aryek a ŋeo piny, iyabo baŋ itino atino. Eyo, Pappa, pien cunyi opwoo amannono.

²²Pappa otyeko jalla jami luŋ aluŋa: mom tye ŋattoro ame ŋeo ni Wod en ŋa, kono ka Papo keken, onyo ame ŋeo ni Papo en ŋa, kono ka Wod keken, kede dano ame Wod mito nyuto Papo baŋe.”

²³Olokere baŋ jo a lube, okobbigi i muŋ ni, “Wan jo ame neno gin ame ineno wunu tye kede winyo!

²⁴Pien atittiwu ni, odwarpiny apol kede rwode apol rik oparo neno gin ame ineno wunu, ento naka mom oneno, kede winyo gin ame ame iwmyo wunu ento naka mom daŋ owinyo.”

²⁵Nen, ceŋ tye ŋattoro acel en apwony-cik. Oya malo, obite kun penye ni, “Apwony, atim ŋo me anwoŋ kwo a perakino odoco?”

²⁶En openye ni, “Kara i cik ocoo iye niŋo? Ikwano niŋo?”

²⁷En te dok iye ni, “Mar Rwot Obaŋani kede cunyi luŋ, kede tiponi luŋ, kede tekoni luŋ, kede tammi luŋ; dok imar dano wadwu acalo imarre keni.”

²⁸En te gamo doge ni, “Idok iye aber; tim amannono, ibino kwo.”

²⁹Ento en mito loyo kop, te penyo Yecu ni, “Kara i cik man, dano wadwa en ŋa?”

³⁰Yecu te gamo ni, “Rik tye lo moro ame oya i Jerucalem, kun akemo tun piny i Jeriko, te rwatte kede oyak. Gin te gonyo boŋŋi mere oko i kome, ote pwode, ote wot gigi oko, oweke a doŋ ceggi i to.

³¹Alamdoggoro onwoŋo opello i yo-nono; ka onene, ogono agona i teŋe i ŋet yo tuŋ cel.

³²I kite acel-Iu dok te bino Alevi moro; en daŋ ka otuno i kabedo-nono, onene, ogono agona i teŋe i ŋet yo tuŋ cel.

³³Ento dano me Camaria ame daŋ tye abeo i yo-nono, ka otuno kakare, onene; ocone.

³⁴Owoto baŋe, oonyo moo kede vino i waŋ kan ame owano, otweo, icennere ocibe i wi kana mere, otere i ot buto a wele, ogwoke.

³⁵Orwo mere en okwanyo ciliŋ aryo, omio baŋ dano ame gwoko ot wele, te cike ni, ‘Twoe; gin ducu ame ibino miye akato, an abino culli ka adwogo.’

³⁶Kara ŋa i akina jo magi adek-ki ame yin itamo ni ŋat ame oromere kede oyak ca myero kolo ni otere acalo dano wadgi?”

³⁷En te gamo ni, “Dano ame otime kica ca.” Yecu te kobbe ni, “Yin daŋ wot itim amannono.”

³⁸Ka pwod otye i wotgi, en odonyo i paco moro acel, dako a nyiŋe Marita te jole i otgi.

³⁹Onwoŋo en tye kede aminnere a nyiŋe Maliam, ame obedo i ŋet tyen Rwot kun winyo koppere.

⁴⁰Marita kono obedo canne i tic apol. Owoto baŋe, te penye ni, “Rwot, mom iparo ni aminna ojala tic kena? Kobe me bin konya.”

⁴¹Ento Rwot te gamo doge ni, “Marita, Marita, iparo dok icanne pi jami apol;

⁴²ento tye gin acel keken ame mitte. Maliam oyero dul aber ame mom obino gamo i baŋe.”