Read lango Luka 11 Bible Online

Luka 11 - lango bible

Luka 11

¹Onwoŋo Yecu tye ka kwayo Obaŋa i kabedo moro; ka doŋ oweko, dano moro i akina jo a lube te kwaye ni, “Rwot, pwonywa ba kede kwac, acalo Lakana rik opwonyo kede jo a lube.”

²En te kobbigi ni, “Ka ikwao wunu Obaŋa, kob wunu kite man ni, ‘Apap, nyiŋi bed me awora, Myero locci doŋ bin,

³Miwa i nino luŋ cam mewa me didik,

⁴Timwa kica i balwa, pien wan kenwa otimo kica baŋ jo luŋ a tye kede bannyiwa. Kur imi bitwa.’ ”

⁵Dok te kobbigi ni, “Ŋa i akinawu ame tye kede awottere, ame obino baŋe i cuny dyewor me kwaye ni, ‘Awotta, konya kede ogati adek;

⁶pien awotta ame oya i wot ocora, mom atye kede ginnoro a myero aket i nyime?’

⁷En mom bino gamo doge iyi ot ni, ‘Kur ilola; doŋ acego doggola oko, wan kede itinowa doŋ obuto oko, an iya malo miyi ginnoro, en a mom atwerre.’

⁸Akobbiwu ni, kadi bed en mom bino ya malo miye ginnoro pi bedo awottere, ento pi bedo dide, en bino ya mie ginnoro ducu ame yie amito.

⁹Doŋ akobbiwu ni: Kwa wunu, obino miyowu; yeny wunu, ibino wunu nwoŋo; twom wunu kika, obino yabbiwu.

¹⁰Pien dano acel acel ame kwao, omie; ŋat a yenyo, nwoŋo; ŋat a goo doggola, oyabbe kika.

¹¹Kara ŋa i akinawu ame papa atin, ka wode okwae rec, lunyo miye twol aka rec?

¹²Onyo ka okwae toŋ gweno, lunyo miye yit?

¹³Ka wun jo areco, iŋeo miyo otinowu mot abeco, Papawu a tye i polo mom doŋ bino ka to meicel imiyo Cuny Acil baŋ jo a kwae?”

¹⁴Rik onwoŋo tye aryemo cen a mom kobo; ka cen doŋ oya i kome, dano a lebe oto oloko, lwak owuro.

¹⁵Ento jo mogo i akinagi okobo ni, “En ryemo cen pi twer a Beeljebul, adwoŋ me cen.”

¹⁶Jo ocele oyenyo i baŋe anyut ame oya i polo, pi bite.

¹⁷Ento en oŋeo tamgi oko, te kobbigi ni, “Kare ducu ka loc opokere yie aryo, lobo mere balle oko, ot rette i kom ot ocele.

¹⁸Catan daŋ ka en kene opokere yie aryo, kara loccere bino cuŋ iŋo? Pien wun ikobo wunu ni, aryemo cen pi twer mea Beeljebul.

¹⁹Ka an aryemo cen pi twer a Beeljebul, kara itinowu ryemo pi twer aŋa? Pi mano gin bino ŋolliwu kop.

²⁰Ento ka an aryemo cen pi ciŋ Obaŋa, loc Obaŋa doŋ obino baŋwu.

²¹Ka dano atek, ame ruko jami me romo mere ducu, tye ka gwoko ot me loccere, jami mere bedo kede kuc;

²²ento ka dano ame ka te kede teko oromo gin kede, oloc, en bino coko jami me romo mere a yam egeno, bino poko jami ame eyako i baŋe.

²³Dano a mom tye tun baŋa en akworra, dok dano a mom coko karacel keda, en keto aketa.

²⁴“Ka cen arac oya i kom ŋattoro, en woto mano kabedo a pii mom iye kun yenyo ka weo; ka mom onwoŋo, en kobo ni, ‘Adok gira i oda kan a rik aya iye.’

²⁵Ka otuno, en nwoŋo oweo yie acil, ame oyiko aber.

²⁶En dok kelo cen ocele abiro a gin doŋ reco akate, gin donyo bedo kuno; icennere dano man bino bedo arac kato a yam con.”

²⁷Ka en okobo kop man, dako moro i akina lwak ocwao dwone, okobo ni, “Yic onywali tye kede winyo, kede tuno ame idoto!”

²⁸Ento en te gamo ni, “Tye kede winyo atek, jo ame winyo kop Obaŋa, a daŋ ote gwoko.”

²⁹Ka lwak omedde ecipan, en te kop ni, “Lwagi jo me kare-ni gin jo areco; omito neno anyut, ento mom obino miyogi anyuttoro, kono ka anyut a Yona keken.

³⁰Pien acalo Yona rik odoko anyut baŋ jo Nineve, kite-nono wot a dano bino doko anyut baŋ lwagi jo me kare man.

³¹Abaka a dako me tutun anyarolum bino cuŋ karacel kede lwagi jo me kare man i kare me ŋolo kop, te miyo kop loyogi; pien en otuno iya i agikki me lobo pi winyo ryeko a Culeman, koŋ inen, gin adwoŋ akato Culeman tye kan.

³²Jo Nineve bino cuŋ karacel kede lwagi jo me kare man, i kare me ŋolo kop, te miyo kop loyogi; pien gin rik oŋut pi kop a Yona orabo, cite nen, gin adwoŋ akato Yona tye, kan.

³³“Mom tye dano moro ame cwinyo tara ame dok te kano i gul, onyo wumo kede gulu, ento keto i wi akara, me jo ducu a bino i ot nen lyellere.

³⁴Tara me komi en waŋi; ka waŋi tye boŋo balloro, mio komi luŋ bedo aler. Ento ka waŋi rac, komi luŋ bedo i colpiny.

³⁵Koŋ inen wunu ka lero ame tye iyii mom piny acol.

³⁶Doŋ ka komi luŋ opoŋ i lero ame kannoro acol mom iye, komi ducu bino bedo aler, acalo tara ka tye a lyel, menyi.”

³⁷A rik en tye akop, Aparicayo moro te cwane ka cam baŋe; en odonyo i ot daŋ te bedo piny i dog cam.

³⁸Aparicayo owuro ka oneno ni en oero cam a mom koŋ okwoŋo logo.

³⁹Rwot te kobbe ni, “Wun Oparicayo ilwoko wunu ŋe kopo kede cani, a kun yiwu opoŋ iye yako jo kede timmogo areco.

⁴⁰Imiŋ wunu, mom iŋeo wunu ni ŋat ame ocweo gin i oko en daŋ ame ocweo gin i yie?

⁴¹Mi wunu gin i yie me konyo ocan; nen, jami luŋ bino bedo cil baŋwu.

⁴²“Ento ibino neno wunu can, wun Oparicayo! Pien imio wunu dul acel me apar me apuruku kede ocobo kede kit pot dek ducu, kun iweko wunu Ŋolo kop atira kede maro Obaŋa; magi ducu myero itim wunu, kun mom iweko wunu maca doŋ.

⁴³Ibino wunu neno can wun Oparicayo! Pien imaro wunu kome me dito i kacokere, dok imito wunu ni jo motwu i dye cuk.

⁴⁴Ibino neno wunu can! Pien irom wunu kede wi lyel a mom nen; jo beo i wie kun mom oŋeo.”

⁴⁵Dano moro i akina opwony-cik ogamo doge ni, “Apwony, ka ikobo amanno, nyuto ni iyetowa daŋ.”

⁴⁶En odok iye ni, “Ibino wunu neno can wun opwony-cik daŋ! Pien imio wunu jo yeyo yec apek, ame yeyo tek, kun wun ikokomwu mom igudo wunu kede nyako ciŋwu moro acel.

⁴⁷Ibino wunu neno can! Pien icano wunu gweŋe i wi lyele odwarpiny a rik kwariwu oneko.

⁴⁸Kite-nono wun caden, ipwoyo wunu tic a kwariwu, pien gin onekogi, wun icano wunu gweŋe i wi lyelegi.

⁴⁹Pi man, ryeko Obaŋa okobo ni, ‘Abino oro odwarpiny kede okwena baŋgi, jo mogo i akinagi obino neko kede libogi,’

⁵⁰wek remo odwarpiny luŋ ame oonyo geye i acakki piny, cul kworrere i kom jo me kare man,

⁵¹cakere i remo Abel tuno kede anaka i remo a Jekeria ame oto i akina keno me lam kede kabedo acil. Eyo, akobbiwu ni, obino culo kworrere i kom jo me kare man.

⁵²Ibino neno wunu can wun opwonycik! Pien imao wunu ayab me ŋeyo piny; wun ikomwu mom idonyo wunu iye, dok igeŋo wunu jo a mito donyo iye oko.”

⁵³Ka en oya i kuno, opwony-cik kede Oparicayo te cako diye atek, kun oroko doge kede peny apol,

⁵⁴okie wek omak kop a ya i doge.