Read lango Luka 12 Bible Online

Luka 12 - lango bible

Luka 12

¹I kare-nono, lwak tutumia i tutumia ocokere karacel, kun obedo ka nyonne kengi kengi. Me agege Yecu ocako kobo baŋ jo mere a lube ni mano, “Gwokere wunu i kom tobi Oparicayo, ame en kite me goba.

²Mom tye ginnoro ame owumo a mom obino yabo kannaler, kadi gin ame okano a mom bino ŋeye.

³Kop luŋ ame ikobo wunu i piny acol, bino winyere i ceŋ, dok gin ame imuŋo wunu i tyelo, obino rabo koppere i wi bye.

⁴“Owotena akobbiwu ni, kur ilwor wunu jo a neko kom, ento icennere mom otwero timo ginnoro akato mano.

⁵Ento abino nyuttiwu ŋat a myero ilwor wunu: lwor wunu Obaŋa, ame ka doŋ oneko dano, tye kede twer me bole i Geenna. Eyo, akobbiwu ni, lwor wunu en!

⁶Acur abic mom ocato cente pyeraryo? Ento mom tye moro i akinagi ame wi Obaŋa twero wil iye.

⁷Anaka yer wiwu okwanogi iweŋ. Kur i lwor wunu; pirwu tek meicel akato acur apol.

⁸“Akobbiwu ni, dano acel acel ame bino tuco nyiŋa i nyim jo, Wot a dano daŋ bino tuco nyiŋe i nyim omalaika Obaŋa;

⁹ento dano ame bino kwera i nyim jo, an daŋ abino kwere i nyim omalaika Obaŋa.

¹⁰Jo luŋ ame kobo kop arac i kom Wot a dano, obino timogi kica; ento ŋat ame yeto Cuny Acil mom obino limo kica.

¹¹Ka oterowu i nyim kacokere kede i nyim oloc kede wegi twer, kur ibed wunu kede tam apol ni ibino dok wunu iye i yo mene, onyo ni ibino gamo wunu niŋo, onyo ni ibino kobo wunu niŋo?

¹²Pien Cuny Acil bino pwonyowu gin a myero ikob wunu i caa-nono.”

¹³Dano acel i akina lwak okobbe ni, “Apwony, kob ominna pok keda lim ame wan oleo.”

¹⁴Ento en te gamo doge ni, “Lo-ni, ŋa ame oketa me ŋolliwu kop onyo me pokkiwu limwu?”

¹⁵Okobbigi ni, “Neno wunu ba, gwoke re wunu i woro me lim; pien kwo a dano mom ocuŋ i kom wel lim apol ame en tye kede.”

¹⁶Dok te kobbigi carokop ni, “Rik tye alonyo moro ame cam ocek adwoŋ i potti mere.

¹⁷En openyere i cunye kene ni, ‘Abino timo ŋo, pien kan aony kaila iye mom tye?’

¹⁸Te dok kobo ni, ‘Abino timo ni amane: abino muko derena ducu piny, eka ate pamo en alaccege ame abino onyo iye kaila, anaka jamina luŋ.

¹⁹Abino kobo i cunya kena ni, Omayin, itye doŋ i jami apol ame bino rommi pi mwakki apol ata; we giri doŋ mot, icam, imati, ibedi lelo.’

²⁰Ento Obaŋa te kobbe ni, ‘Yin amiŋo! I dyewor a tin-ni obino kwanyo kwo i komi oko; kara jami ame iyiko piri-nu bino bedo me a ŋa ba?’

²¹Tye aman no i kom dano ame kano lonyo pire kene, kun mom tye i lonyo baŋ Obaŋa.”

²²Yecu te kobbi jo a lube ni, “Pi mannono akobbiwu ni, kur ibed wunu kede par apol pi kwowu, ni ibino camo wunu ŋo, onyo pi komwu, ni ibino ruko wunu ŋo?

²³Pien kwo pire tek kato cam, kom pire tek kato ruk.

²⁴Koŋ itam wunu i kom agak; gin mom coo koti, daŋ mom okao, mom otye daŋ i dero, anaka tuwa, ento Obaŋa pitogi. Wun mom pirwu tek kato winy?

²⁵Kara ŋa i akinawu ame twero medo bat acel i kom kwo mere pi bedo kede par apol?

²⁶Ka gin anok-k i loowu, piŋo ibedo wunu kede par apol pi jami ocele?

²⁷Tam wunu koŋ pi kalaŋweka, kite ame gin doŋo kede. Mom owio uci, mom ocweo boŋo; ento akobbiwu ni, kadi bed Culeman rik orukere kede kwogo mere ducu, en mom orukere aber acalo moro acel i akinagi.

²⁸Ka Obaŋa ruko lum a tye i tim, ame bedo ka tin keken, diki ote bolo oko i keno, en mom bino rukowu aka to, wun jo ame iyeewu nok?

²⁹Kur iyeny wunu gin ame ibino wunu camo, onyo gin ame ibino wunu mato, yiwu kur tam kop apol;

³⁰pien rok luŋ me wi podo yenyo jami-nogo, Papawu daŋ ŋeo ni imito wunugi.

³¹Ento koŋ iyeny wunu yo me donyo i loccere, jami-nogo obino medo baŋwu.

³²“Kur ilwor wunu, wun lwak rommi anok, pien Papawu oye atika me miyowu loccere.

³³Cat jamiwu oko, kony wunu kede ocan; kwo wunu icao me cente a mom ti, kan wunu lonyo a mom tum i polo, kan ame akwo mom tuno iye, dok nyenye mom balo.

³⁴Pien kan ame lonyowu bedo iye, cunywu daŋ bedo kuno.

³⁵“Bed wunu ame iyikere wunu pi tic, kun tarawu lyel.

³⁶Bed wunu acalo jo a kuro adwoŋgi ka bino dwogo ame oya i arama me nyom, me ote yabbe kika piopio ka en otuno, otwomo kika.

³⁷Tye kede winyo omiro ame ka adwoŋgi odwogo, onwoŋogi pe ru onino. Ateni akobbiwu ni, en bino tweyo pyere kene, bino miyogi bedo i dog cam, te miyogi cam.

³⁸Ka obino i cuny dyewor onyo a gweno akoko, kun onwoŋogi amannono, omiro-nono tye kede winyo.

³⁹Ento myero iŋe wunu man, ni, kono won ot ceŋ ŋeo caa ame ayak bino tuno iye, kono okio, mom oweko jo oturo ode.

⁴⁰Wun daŋ bed wunu a doŋ iyikere wunu, pien Wot a dano bino tuno i caa a mom itamo wunu.”

⁴¹Petero openyo ni, “Rwot, ikobo carokop man baŋwa, aŋar onyo baŋ jo luŋ?”

⁴²Rwot ogamo ni, “Agwok ot ame agen, aryek, en ŋa, ame adwoŋŋere bino weko jo i ode i te loccere, me en pokkigi camgi i kare a mitte.

⁴³Tye kede winyo amiro-nono ame adwoŋŋere, ka odwogo, bino nwoŋe otimo kitenono.

⁴⁴Ateni akobbiwu ni, bino keto jami mere luŋ i twerrere.

⁴⁵Ento ka amiro-nu okobo i cunye kene kene ni, ‘Adwoŋ doŋ ogal wok me dwogo,’ te ero pwodo omiro kede aŋeca, kun camo, mato, dok mer,

⁴⁶won amirono no bino dwogo i nino a mom etamo, kede i caa a mom en ŋeo, bino ŋoŋolo en, te kete i akina jo a mom genne.

⁴⁷Amiro mano ame oŋeo gin ame adwoŋŋere mito, ento mom oyiko, dok mom olubo gin ame adwoŋŋere mito, obino pwode atek meicel.

⁴⁸Ento ŋat a mom ŋeo, ka otimo gin ame romo miyo ogoe pire, obino pwode anok. Dano acel acel ame omio apol, obino mito daŋ apol i baŋe, dok dano ame jo okano jami apol baŋe, obino penye apol akato.

⁴⁹“Rik abino me cwinyo mac i lobo; kono doŋ omoko oko, kono ber!

⁵⁰Atye kede batija a myero abatija kede; kite ame odia kede ituno ka otum!

⁵¹Wun itamo wunu ni abino me kelo kuc i lobo bo? Akobbiwu ni, pe gire, kono popoka.

⁵²Cakere tin, jo abic a tye i ot acel bino popoka; jo adek bino dago jo aryo, jo aryo bino dago jo adek.

⁵³Papo bino pokere kede wode, awobi bino pokere kede pappere, toto bino pokere kede nyare, nyako bino pokere kede tottere, tato bino pokere kede ci-wode, ci-wod bino pokere kede tattere.”

⁵⁴En dok te kobo baŋ lwak ni, “Ka ineno wunu pol olyero tuŋ to, ikobo wunu oyot ni, ‘Kot koni cwe’; daŋ cwe.

⁵⁵Ka ineno wunu yamo okodo i tuŋ anyarolum, wun ikobo wunu ni, ‘Piny bino bedo lyet meicel’; daŋ timere.

⁵⁶Wun ogoba! Iŋeo wunu poko gin ame nen i lobo kede i polo; piŋo mom iŋeo wunu poko anyut me kare man?

⁵⁷“Dok piŋo mom iŋolo wunu kenwu gin a tye atira?

⁵⁸Ka iwoto baŋ aŋolkop kun inywako yo kede dano ame apiddi, tem atek me iyik kop kede kun pwod itye wunu iyo, me kur wai, teri i nyim aŋolkop, aŋolkop te miyi baŋ cirikale, cirikale te teri i buc.

⁵⁹Akobbi ni mano, mom ibino ya iye ituno ka iculo cente luŋ aluŋa, a mom nyig moro orem.”