Read lango Luka 13 Bible Online

Luka 13 - lango bible

Luka 13

¹I kare-nono rik tye jo mogo kuno ame otitti Yecu pi jo mogo me Galilaya ame Pilato orubo remogi kede mot a gin oŋolo me yalo Obaŋa.

²En ogamo doggi ni, “Itamo wunu ni jo Galilaya magi gin obalo ame kato jo me Galilaya luŋ, ame omio gin oneno can kite-nono?

³Akobbiwu ni, mom amannono; ento ka mom iŋut wunu, wun luŋ ibino tum wunu kittono.

⁴Onyo jo apar wie aboro ca a rik ot abor orette i komgi, onekogi i Ciloam, itamo wunu ni gin rik otimo bal akato jo ocele luŋ ame bedo i Jerucalem?

⁵Attiitwu ni, pe gire; ento ka mom iŋut wunu, wun luŋ ibino tum wunu kittono.”

⁶Okobbigi carokop man ni, “Yam tye dano moro ame obedo kede yat oduro mere ame opito i poto olokkere. En obino kun moo nyige, ento mom onwoŋo.

⁷En te kobo baŋ apur ni, ‘Nen ba, odoko mwakki adek a kun abino amao nyig oduro man, mom anwoŋo. Toŋ oko; kara piŋo balo lobo mannono?’

⁸Apur odokke ni, ‘Adwoŋ, koŋ iwek obed pi mwaka man doki, ituno ka apuro lobo i tere, aonyo woo iye.

⁹Ka bino nyako nyige i mwaka abino, ber, ento ka mom amannono, ibino toŋo giri oko.’ ”

¹⁰Onwoŋo en apwony i kacokere moro i nino me cabit.

¹¹Dako moro onwoŋo tye kuno a tye kede cen me goro, otwoye kede pi mwaka apar wie aboro; onwoŋo doŋ okudde a mom dok twero tirre kadi acel.

¹²Ka Yecu onene, te lwoŋe kun kobbe ni, “Dako, doŋ ogonyi i kom goroni.”

¹³En te keto ciŋe i kom dako-nu, cucuttono dan-nu te tirre oko, te pako Obaŋa.

¹⁴Ento adwoŋ me kacokere oŋo iye, pien Yecu ocaŋo dano i nino me cabit, te kobbi lwak ni, “Tye nino abicel a myero ti iye tic; tun wunu i nino-nu, ote caŋowu, ento pe i nino me cabit.”

¹⁵Rwot te dok iye a kun kobo ni, “Wun ogoba! Dano acel acel i akinawu mom yabo twonnere onyo kana mere i awi i nino me cabit, te tero wot mato pii?

¹⁶Dan-ni nyaka Iburaim, ame Catan otweo mwaka apar wie aboro, mom myero gonye i kom twee-ci i nino me cabit?”

¹⁷Ka en okobo man, alee te twodo okworrere; yi lwak ducu te bedo ka ayom pi gin me kwogo ame en otio.

¹⁸Ka doŋ te kobo ni, “Loc Obaŋa calladi? Dok abino poro kede ŋo?

¹⁹Rom aroma kede nyig dek karadali ame dano moro okwanyo, te pito i poto mere; te doŋo oko, te doko yat, winyi a twarre malo te gero udigi i jaŋe.”

²⁰Dok te kobo ni, “Abino poro loc Obaŋa kede ŋo?

²¹Rom aroma kede tobi ame dako ojuko, te rubo i moko a romo dita adek, ituno ka oyenyo ducu.”

²²En omedo wottere kun beo i boma apol apapat kede i akina myere, kun pwonyo kemo kede i Jerucalem.

²³Dano moro te penye ni, “Adwoŋ, obino laro jo anokkoro keken?” En te kobbigi ni,

²⁴“Ket wunu teko me donyo i doggola adiŋ; pien akobbiwu ni, jo apol bino temo me donyo iye, ento mom obino twero.

²⁵Ka won ot doŋ oya malo, ocego doggola, ibino cuŋ wunu i oko itwomo wunu kika, kun ikobo wunu ni, ‘Adwoŋ, yabbiwa ot ba!’ En bino gamo dogwu ni, ‘An mom aŋeo gira kan ame iya wunu iye.’

²⁶Wun ibino wunu kobo ni, ‘Rik ocamo dok omato karacel kedi, dok daŋ ipwonyo i dye pacciwa.’

²⁷En bino gamo ni, ‘Atittiwu ni, an mom aŋeo gira kan ame iya wunu iye. Wot wunu teŋe i nyima, wun otim areco ducu!’

²⁸Kuno ibino bedo wunu i koko kede kayo lak, ka ineno wunu Iburaim kede Icaka kede Yakobo, kede odwarpiny ducu kun otye i loc Obaŋa, ento wun ikomwu obolowu oko.

²⁹Jo bino ya i tuŋ kide kede tuŋ to, kede tuŋ anyarodi kede tuŋ anyarolum, obino bedo piny i dog cam i loc Obaŋa.

³⁰Dok nen, jo mogo ame odoŋ cen, gin bino bedo me agege, dok tye jo mogo ame otelo yo, ame bino doŋ cen.”

³¹I caa-nono Oparicayo mogo obino, okobbe ni, “Ya oko i kan, pien Kerode amito neki oko.”

³²En ogamo ni, “Wun wot ititti wunu ekwe-nono ni, ‘Nen, abino ryemo cen, dok abino caŋo jo, tin kede diki, i nino me adekkere abino cobo ticca.

³³Kadi bed amannono an myero amedde gira i kom wotta tin kede diki kede orwo mere, pien mom myero adwarpiny oto teŋe ame mom i Jerucalem.’

³⁴Jerucalem, Jerucalem, yin ame ineko odwarpiny, inapo jo ame oorogi baŋi kede gweŋ, tyen adi ame rik amito coko itino meri acalo min gweno coko itino mere i te bwome, ento wun mom iye wunu!

³⁵Nen, otwu doŋ odoŋ i wi obur iwu. Akobbiwu ni, mom ibino wunu nena, ituno ka ibino wunu kobo ni, ‘Opwo wunu ŋat ame abino i nyiŋ Rwot.’ ”