Read lango Luka 14 Bible Online

Luka 14 - lango bible

Luka 14

¹I ceŋ cabittoro acel Yecu onwoŋo owoto ka camo cem i ot Aparicayo moro ame aloc; gin obedo ka kiye atek.

²I nyime kannono rik tye iye dano moro ame two too awura-kom.

³Yecu te penyo opwonycik kede Oparicayo ni, “Cik ye ni can dano i cen cabit onyo mom?”

⁴Ento gin oliŋ aliŋa. Yecu omake, ocaŋe, te cike ni owot gire.

⁵Openyogi ni, “Ŋa i akinawu ame ka tye kede kana mere onyo twonnere, ka orette i akoŋ, mom bino wayo oko i ceŋ me cabit?”

⁶Gamo pennyere odoko tek baŋgi.

⁷Ka oneno kite a jo ame olwoŋo yero kede kabedo me kwogo, en okobbigi carokop ni mano,

⁸“Ka olwoŋi i arama me nyom, kur ibed i kabedo me kwogo; aŋar onyo ca otyeko cwano ŋattoro adit kati oko,

⁹mio dano ame olwoŋo wun aryo luŋ ka obino, bino kobbi ni, ‘Wekki dano man kabedo,’ eka ite dok i kabedo apiny kede lewic adwoŋ.

¹⁰Ento ka olwoŋi, wot ibed i kabedo apiny, ame ka dano olwoŋi obino, en bino kobbi ni, ‘Awotta, jer i kom amalo’; eka ite bedo kede kwogo i nyim jo luŋ ame ibedo kedgi i dog cam.

¹¹Pien dano ame kette kene ni etye malo, obino dwoke piny, dano ame mwolle kene obino tiŋe malo.”

¹²Okobo baŋ dano ame ocwane ni, “Ka ilwoŋo jo i cem me dyeceŋ aŋar me otyeno, kur ilwoŋ owoteni, onyo omegoni, onyo wati meri, onyo oturwu ame olonyo, me gin daŋ kur bin lwoŋi pi culo waŋ lwoŋogi.

¹³Ento ka itedo arama, lwoŋ ocan, oŋwalo, jo a komo akoma, kede otowaŋ;

¹⁴ibino nwoŋo giri winyo, pien gin mom twero culi. Obino culi i kare me cero jo a kitegi atir.”

¹⁵Ŋattoro acel i akina a jo obedo kede i dog cam ka owinyo kop man, okobo ni, “Ŋat a bino camo kwon i loc Obaŋa tye kede winyo!”

¹⁶Cite en ogamo koppere ni, “Dano moro rik obin otedo arama adwoŋ, daŋ te lwoŋo iye jo apol.

¹⁷Ka kare me arama oromo, en te oro amiro mere me kobbi jo ame olwoŋogi ni, ‘Bye wunu, pien jami luŋ doŋ oyiko oko.’

¹⁸Gin ducu ocako bako doggi i kite acel ni timgi kica. Dano me agege okobbe ni, ‘Awilo poto, myero koŋ awot, anen; akwai, tima kica.’

¹⁹Dano ocele okobo ni, ‘Awilo twoni apar me pur, awot ka nenogi; akwai, tima kica.’

²⁰Dano ocele okobo ni, ‘Kom an pwod anyomo dako nyen, pi mano mom atwero bino.’

²¹Amiro obino, otitti adwoŋere kitenono. Akemo omako won ot, okobbi amiro mere ni, ‘Wot oyotoyot i waŋa yo atitino me boma kede i akina pacci, ikel ocan, oŋwalo, otowaŋ kede jo a komo akoma,’

²²Amiro okobo ni, ‘Adwoŋ, gin ame iciko doŋ otum, ento kabedo pwod odoŋ gire.’

²³Adwoŋ okobo baŋ amiro ni, ‘Wot i yo adoŋo kede i ŋet yo, di jo wek obin odony i ot, me oda poŋ.

²⁴Pien atittiwu ni, mom tye dano moro i akina jo ame ocwanogi ame bino bilo aramana.’ ”

²⁵Lwak ecipan owoto karacel kede, en te lokere tuŋ baŋgi, te kobbigi ni,

²⁶“Ka duno moro bino baŋa ame mom koŋ okwero pappere kede tottere, kede dako mere, kede itino mere, omego mere kede amego mere, anaka kadi kwo mere ikome, mom twero bedo ŋat a luba,

²⁷ŋat a mom tiŋo yataria mere, te luba, mom twero bedo ŋat a luba.

²⁸Kara ŋa i akinawu, ka amito gero ot abor, mom koŋ geo bedo piny, te kwano wellim a mitte, ka ce etye kede ame romme tyeko?

²⁹Me kur ecib acakki tere, tyeko te loye, jo luŋ ame neno bino nyere,

³⁰kun okobo ni, ‘Dano man ocako gedo, tyeko te loye oko.’

³¹Onyo aloccene, ame ka awot i mony me romo kede aloc ocele, mom koŋ bedo piny, poro kop, ka ce en kede jo mere tutumia apar etwero romo kede won jo tutumia pyeraryo ame abino baŋe.

³²Ka mom amannono, en cwao kwena pi penyo kop me kuc ame dano ca pwod tye kannabor.

³³Amannono, ŋattoro iyi akinawu ame yie mom cao gin ducu ame etye kede, mom twero bedo ŋat a luba.

³⁴“Kado gire ber: ento kado ka odoko abot, obino loko doko amit iŋo?

³⁵Mom doŋ ber me aketa i lobo, kadi anaka i wi odur; jo onyo oko, ŋat a tye i yit me winyo, winyi!”