Read lango Luka 15 Bible Online

Luka 15 - lango bible

Luka 15

¹Ora-coro kede obalo onwoŋo onoko Yecu a ceggi me winyo koppere.

²Oparicayo kede opwony-cik oŋuŋura kun okobo ni, “Dano man coko obalo, dok cemo kedgi-gu.”

³En omio Yecu okobbigi carokop man ni,

⁴“Ŋa i akinawu ame tye kede romi mia acel, ame ka moro acel i akinagi orwenyo oko, en mom bino weko maka pyeraboŋwen wie aboŋwen i bar, te wot yenyo en ame orwenyo ca, ituno ka onwoŋo?

⁵Ka onwoŋo, ryoŋo i wi gwoke kun yie yom ayoma.

⁶Ka otuno paco, lwoŋo owote mere kede wati mere karacel, te kobbigi ni, ‘Yiwu obed yom karacel keda, pien doŋ anwoŋo romona a rik rweny ca oko.’

⁷Atittiwu ni, yomcuny bino bedo adwoŋ amannono i polo i kom abalo acel ame oŋut, kato i kom jo pyeraboŋwen wie aboŋwen ame kitegi atir, a doŋ pe tye ginnoro a gin myero ŋut iye.

⁸“Onyo dannene ame tye kede ciliŋ akilin tomon, ka ciliŋŋere moro acel orwenyo, mom bino cwinyo tara, weo ot, yenyo atek ituno ka onwoŋo?

⁹Ka onwoŋo, lwoŋo owote mere kede wati mere karacel, te kobbigi ni, ‘Yiwu obed yom karacel keda, pien doŋ anwoŋo ciliŋŋa a rik rweny ca oko.’

¹⁰Atittiwu ni, yomcuny bedo daŋ amannono i nyim omalaika Obaŋa i kom abalo acel ame oŋut.”

¹¹Dok okobo ni, “Yam tye ico moro ame tye kede awobe mere aryo.

¹²En atidi mere okobbi pappere ni, ‘Pappa, mia dullim mera ame otika.’ En opoko limmere i akinagi.

¹³Nino okato anokkoro keken, awobi atidi ocoko jami mere ducu, oero wottere me wot i lobo abor. Olalo limmere oko kuno i bedo me caro caro.

¹⁴Ka limmere luŋ doŋ otum oko, kec atek meicel te poto i lobo-nono, awobi ca te cako mamala atata.

¹⁵Owoto odak baŋ ŋattoro me lobo-nono; en ocwae i elet ka kwayo puno.

¹⁶Yie ogomo me yeŋ kede pok cam ame puno camo, kom mom tye ŋattoro a mie ginnoro.

¹⁷Ka en doŋ oniaŋ pire kene, te kobo ni, ‘Opakaca a pappa ka ŋit tye adi, ocamo kwon loogi, kom an ata i kec kan!

¹⁸Abino ya, abino wot baŋ pappa, abino kobbe ni, “Apap, doŋ abalo baŋ polo kede nyimi,

¹⁹daŋ mom amyero ilwoŋa ni wedo. Loka abed acalo ŋat acel i akina opakacani.” ’

²⁰Oya, obino baŋ pappere. Ka rik en pwod tye teŋe kannabor, pappere onene. Ocone; oriŋo te kwako kore, omote kun noto leme.

²¹Wode okobbe ni, ‘Apap, doŋ abalo baŋ polo kede i nyimi, daŋ mom amyero ilwoŋa ni wodi.’

²²Ento pappere te kobo baŋ omiro mere ni, ‘Ru wunu kelo jor ame kato ducu kede ber me rwak i kome. Rwaku atem i ciŋe, kede amuk i tyene.

²³Kelu atin twon olobakino me nekke, wek ocamu, obedu kede yomcuny.

²⁴Pien atinna-ni rik oto, aman doŋ kwo; ceŋ orwenyo, doŋ onwoŋere.’ Ote cako bedo kede yomcuny.

²⁵“Wode adwoŋ onwoŋo tye i poto. Ka en obino, a doŋ ceggi kede ot, te winyo wer kede myel.

²⁶Te lwoŋo ŋat acel i akina omiro, openye ni, ‘Man kara ŋo ame tye ka timere-nie?’

²⁷Te dokke iye ni, ‘Kom ominni en odwogonono, pappi onekke atin twon olobakino, pien ogame ame kome yot kun kwo.’

²⁸Akemo te make, okwero donyo i ot oko. Pappere te donnyo baŋe, obako doge baŋe.

²⁹En ogamo dog pappere ni, ‘Nen, an atio baŋi pi mwakki apol ata, anaka cene pe ru akwero winyo cik meri, daŋ mom ru imia kadi atin dyelloro wek yia bed yom karacel kede owotena.

³⁰Ento atinni-ni ka obino, ame doŋ obalo limmi ducu i kom mon ame ococo, yin inekke atin twon olobakino!’

³¹Ogamo doge ni, ‘Atinna, yin nino ducu itye keda, jami mera luŋ megi.

³²Ber wan ocam kun obedo kede yomyic, pien ominni rik oto oko, aman doŋ kwo; nwaŋ orwenyo, doŋ onwoŋere.’ ”