Read lango Luka 16 Bible Online

Luka 16 - lango bible

Luka 16

¹Yecu te dok kobo baŋ jo a lube ni, “Nwaŋ tye ŋattoro ame alonyo, ame tye kede akan-jami mere. Odoto dano man baŋe ni tye ka balo jami mere.

²Olwoŋe, openye ni, ‘Kop aŋo ame awinyo i komi-nie? Kella koŋ wel jami ame yin ikano, pien mom dok itwero bedo akan-jami.’

³Akan-jami okobo i yie kene ni, ‘Kara abino timo ŋo? Pien adwoŋŋa doŋ akwanya oko i ticca me gwoko jami. Mom atek ame aromo pur, lewic daŋ maka ka akwac.

⁴Aŋeo gin ame abino timo, me jo jola i udigi ka oryema oko i kano jami.’

⁵Olwoŋo wegi banya adwoŋŋere acel acel, okobbi dano me agege ni, ‘Wel banya adwoŋŋa ame tye baŋi adi?’

⁶En odok iye ni, ‘Moo me jeituni gulli mia acel.’ Okobbe ni, ‘Kwany waraga me banya meri, ibed piny piopio, ico pyerabic.’

⁷Openyo dano ocele ni, ‘Kara yin kono itye kede wel banya adi?’ En ogamo ni, ‘Kal a romo dwoŋ mia acel.’ Okobbe ni, ‘Kwany waraga me banyani, ico pyeraboro.’

⁸Adwoŋŋere opwoo akanjami a mom agen ca, pien otio kede ryeko; pien jo me lobo man ryek i karegi, kato jo me cen.

⁹Akobbiwu ni, ti wunu kede lim me lobo man a mom ber-ri me imak wunu kede dyere baŋ jo, me ka bino tum, gamwu i kabedo a perakino nakanaka.

¹⁰“Dano ame agen i kom jami atitidi moro, bino bedo agen i kom jami adwoŋ daŋ; dano a mom agen i kom jami atitidi moro, mom bino bedo agen i kom jami adwoŋ.

¹¹Ka yam mom ibedo wunu ogen i kom lim me lobo man a mom ber-ri, kara ŋa ame bino genowu kede lonyo me ateni?

¹²Ka yam mom ibedo wunu ogen i kom jami a jo ocele, ŋa ame bino miyowu jamiwu ikome?

¹³Mom tye amiro moro ame twero tiyi odoŋe aryo; pien bino dago acel, eka te cayo en ocele; onyo bino moko i kom moko acel, eka te cayo en ocele. Pe itwero bedo wunu opii Obaŋa kede dok opii a lim.”

¹⁴Oparicayo gin jo ame maro lim; gin owinyo kop man ducu, ote ŋale.

¹⁵Cite en okobbigi ni, “Wun kara wun jo ame nyuto kite atir baŋ dano, cite Obaŋa ŋeo cunywu; pien gin ame malo i nyim dano, baŋ Obaŋa bedo me kwer.

¹⁶“Cik kede odwarpiny obedo tye ituno kede i kare a Lakana; cakere i kare-nu otye ka rabo amut aber me loc Obaŋa, jo luŋ tye ka donyo iye kede teko.

¹⁷Bedo yot polo kede lobo itum, kato ame obino weko wen nukuta moro me cik.

¹⁸“Dano acel acel ame ryemo cege oko, te dok nyomo dako ocele, nwoŋo ocodo cot. Dok dano ame nyomo dako ame cware oryemo, en daŋ rom i dano ame ocodo cot.

¹⁹“Nwaŋ tye dano moro ame alonyo; en rik ruko boŋo obedo amaramar, kede kanyi aber me camanini, kun camo cem abeco nino luŋ.

²⁰I dog paco mere onwoŋo tye dano moro ame buto iye nyiŋe Lajaro. Etoko onwoŋo orwatte i kome,

²¹kun yie gomo yeŋo i gin ame oony piny i wi meja alonyonu; gwogi daŋ rik bino, naŋo waŋ etoko mere.

²²Acan-nu rik te to oko, omalaika te bino tiŋe, tere i kor Iburaim. Alonyo-nono daŋ te to, ote yike oko.

²³Kare ame en tye kede remkom, otiŋo waŋe i Kadec te neno Iburaim kun Lajaro tye i kore.

²⁴Alonyo-nono te redo ni, ‘Pappa, Iburaim, tima kica ba, icwaya Lajaro me lut nyako ciŋe i pii, bin kwe kede te leba, pien atye kede rem atek i mac man,’

²⁵Iburaim te gamo ni, ‘Woda, po ni, i kare me kwoni nwaŋ omii jamini abeco, aco Lajaro rik omio jami mere areco. Ento amanni en doŋ okweo cunye kan oko, kun yin itye giri i rem.

²⁶Medde kede mano, iyi akinawa kede wun oketo iye twon burroro atut, wek ya i kan kato baŋwu kuno loo jo a mito bino oko, dok ŋattoro i baŋwu kuno mom kato baŋwa kan.’

²⁷En dok te kobo ni, ‘ooŋ akwai ba, Pappa, ore ba i ot a pappa,

²⁸pien atye kede omegona abic, me en wot kwenyorogi, gin daŋ kur dok obin i kabedo me remkom-mi.’

²⁹Iburaim ogamo doge ni, ‘Gin tye i Muca kede odwarpiny; myero gin winy kopgi.’

³⁰En dok te dok ni, ‘Amaa, Pappa, Iburaim, ento ka ŋattoro i akina a jo oto owoto baŋgi, ol cite gin bino ŋut.’

³¹Iburaim dok okobbe ni, ‘Ka gin mom owinyo kop a Muca kede odwarpiny, kadi bed ŋattoro cer i akina jo oto, mom obino keto i tam.’ ”