Read lango Luka 17 Bible Online

Luka 17 - lango bible

Luka 17

¹Yecu okobo baŋ jo mere a lube ni, “Gin ame mio jo poto i bal mom bino geŋere; cite dano ame kela gin a mio jo poto i bai bino neno can!

²Twara ame otweo kidi rego i ŋute, ocore kede i nam, kato ame en omio ŋat acelloro i akina jo magi atinoni opoto i bal.

³Gwokere wunu kenwu! Ka ominni obalo bal, juke; ka oŋut, time kica.

⁴Ka otimo bal baŋi tyen abiro i nino acel, ka olokere baŋi tyen abiro kun kobo ni, ‘Doŋ aŋut,’ myero itime kica.”

⁵Okwena okobo baŋ Rwot ni, “Med iyeewa!”

⁶Rwot okobo ni, “Kono itye wunu kede iyee a rom kede nyig koti dek karadali, kono ikobbi wunu yat-ti ni, ‘Putte keni, ipitte keni iyi nam,’ kono owinyo dogwu.

⁷“Ŋa i akinawu ka tye kede amiro mere a puro kede dyaŋ, onyo a kwao rommi, ame ka odwogo i poto te kobbe ni, ‘ru bino oyot, ibed piny, icem?’

⁸En mom bino kobbe ni, ‘Yikka cem me otyeno, itwe pyeri, ikella cem ituno ka an acemo, amato, icennere yin ibino cem, ibino mato?’

⁹En pwoo amiro pien otimo gin ame ocike ni etim?

¹⁰Wun daŋ amannono, ka doŋ ityeko wunu timo gin ducu ame ocikowu tiyo, myero ikob wunu ni, ‘Wan omiro a mom konyo ginnoro, pien otio ka gin a myero oti keken.’ ”

¹¹Ame en awot Jerucalem, opello i waŋ apokki me Camaria kede Galilaya.

¹²Odonyo i paco moro, orwatte kede odobo apar, ame kun gin ocuŋ kan abor.

¹³Gin oredo ni, “Amaa, Yecu, Adwoŋ, timwa kica!”

¹⁴Ka onenogi, okobbigi ni, “Wotu giwu, nyutte kenwu baŋ olamdog.” Ame pwod otye ka wot, komgi te lony oko.

¹⁵Ŋat acel i akinagi, ka oneno ni etyeko caŋ oko, odok cen a kun pako Obaŋa kede dwon aloŋo.

¹⁶Oryebere piny i te tyen Yecu, opwoe. En onwoŋo Acamaria.

¹⁷Yecu openyo ni, “Nwaŋ mom olonyo jo apar? Kara jo aboŋwen tye kwene?

¹⁸Mom tye ŋattoro ame odwogo cen ka pako Obaŋa, kono ka arok-ki keken?”

¹⁹Te kobbe ni, “Ya, iwot giri, iyee meri ocaŋi.”

²⁰Oparicayo nwaŋ openye ni, “Loc Obaŋa bino tuno awene?” Okobbigi ni, “Loc Obaŋa mom bino ame oneno i waŋ.

²¹Dok mom obino kobo ni, ‘Neno, tye kan!’ aŋar ni, ‘En i ca!’ Pien, nen, loc Obaŋa doŋ tye i akinawu.”

²²Eka te kobo baŋ jo a lube ni, “Kare bino romo ame ibino paro wunu me neno nino a Wot Obaŋa moro acel, cite mom ibino neno wunu.

²³Obino kobbiwu ni, ‘Neno, en i ca!’ onyo ni, ‘Neno, tye kan!’ Kur iwotu iye, daŋ kur ilubgi wunu.

²⁴Pien acalo lutkot meny, caro polo tuŋ cel tuno kede naka tuŋ ocele, Wot a dano daŋ bino bedo amannono nino mere.

²⁵Ento myero koŋ otek kanyo can apol, kun jo me kare man bino kwere.

²⁶Acalo rik otimere i kare a Nua, bino timere amannono i kare a Wot a dano daŋ.

²⁷Jo nwaŋ ocamo, omato, awobe kede anyira onyomere, ituno a nino-nono ame Nua odonyo kede i yee, eka abwal pii te poŋ, te tyekogi ducu.

²⁸Acalo otimere i kare a Lot daŋ. Jo rik ocemo, omato, ocato wil, opito koti, ogero udi,

²⁹cite i nino ame Lot oya oko i Codom, mac kede gweŋ calufa ame mac olio ocwe kun ya i polo, te tyekogi ducu.

³⁰Bino bedo amannono daŋ i nino ame Wot a dano bino nen iye.

³¹I nino-nono dano ame tye malo i wi ot kun jami mere tye iyi ot, kur dok oyitto piny ni ebino kwanyogi. I kite acel-lu, dano ame tye i poto kur dok cen.

³²Koŋ ipo wunu i kom cik a Lot.

³³Dano ame mito laro kwo mere bino rwenyo kwo mere arwenya; ento ŋat ame rwenyo kwo mere, en bino gwoko.

³⁴Atittiwu ni, i dyeworrono jo aryo bino buto i wi tanda acel; obino kwanyo ŋat acel, ŋat acel te doŋ.

³⁵Mon aryo bino bedo karacel i rego; obino kwanyo ŋat acel, ŋat acel te doŋ. [

³⁶Jo aryo bino bedo i poto; obino kwanyo ŋat acel, ŋat acel te doŋ.]”

³⁷Gin openye ni, “Rwot, kara kwene?” En okobbigi ni, “Kan a kom oto tye iye, acut daŋ cokere kuno.”