Read lango Luka 18 Bible Online

Luka 18 - lango bible

Luka 18

¹Obolligi carokop ame pwonyogi ni, myero okwa Obaŋa dikdik, kur ool.

²Okobo ni, “I boma moro rik tye aŋolkopporo ame mom lworo Obaŋa, kadi woro dano.

³Cen tye dako moro a cware oto ame obedo lonyo baŋe dikdik kun kobbe ni, ‘Ŋol kop i kom ŋat a an apidde.’

⁴En obedo ka kwero oko gire pi kare alac; ento icennere en okobo kene kene ni, ‘An ba, kadi bed mom alworo Obaŋa kadi woro dano,

⁵cite dako a cware oto-ni doŋ lola wok; myero koŋ doŋ aŋol kop i kom ŋat a en apidde, me i agikki mere bino mere dikdik kur tima rac.’ ”

⁶Rwot okobo ni, “Winy wunu kop ame aŋolkop a kite mere mom atir okobo.

⁷Obaŋa mom bino Ŋolo kop atir ame bino konyo jo mere ame eyero, ame kok baŋe dyeceŋ kede dyewor? En bino gal aboŋo timo ginnoro i komgi?

⁸Akobbiwu ni, en bino Ŋolo kop atir oyot me konyogi. Ento Wot a dano ka bino dwogo, bino nwoŋo i yee i lobo ateni?”

⁹Dok obolo carokop baŋ jo mogo ame genne kengi ni gin kitegi atir, kun ocao jo ocele.

¹⁰“Jo aryo rik owoto ka kwac i ot Obaŋa, dano acel Aparicayo, dano ocele ara-ocoro.

¹¹Aparicayo ocuŋ kun kwao gire kene ni, ‘Obaŋa, apwoi, kom an mom acalo jo ocele ame oyak, a mom genne, ocod cot, daŋ mom arom kede ara-ocoro-ni.

¹²Akanyo kec nino aryo i cabit acel acel, amio daŋ dul acel me apar i kom jami luŋ ame anwoŋo.’

¹³Cite ara-ocoro ocuŋ i teŋe, mom otiŋo waŋe malo i polo, ento obapo kore kun kwao ni, ‘Obaŋa, tima ber, an abalo gira!’

¹⁴Akobbiwu ni mano, dano ca odok tuŋe ame okwane ni kite atir kato dano ocele ca oko; pien dano acel acel ame kette kene ni etye malo, obino dwoke piny, ento dano a mwolle kene obino tiŋe malo.”

¹⁵Jo okelle anaka itino atino-gu, ni en mulgi. Ka jo a lube oneno, te jukogi oko.

¹⁶Cite Yecu ocwanogi baŋe, te kobo ni, “Wek wunu itino bin baŋa, kur igeŋgi wunu; pien loc Obaŋa tye pi jo acalo gin.

¹⁷Ateni akobbiwu ni mano, dano a mom jolo Ioc Obaŋa acalo atin, mom bino donyo iye kadi atidi moro.”

¹⁸Aloccoro openye ni, “Apwony aber, atim ŋo me anwoŋ kwo a perakino nakanaka?”

¹⁹Yecu te penye ni, “Kara piŋo ilwoŋa ni aber? Dano moro aber mom tye, kono ka Obaŋa keken.

²⁰Iŋeo cik, ‘Kur icod cot, Kur inek, Kur ikwal, Kur ikel kop goba i pido, Wor pappi kede totti.’ ”

²¹En te gamo ni, “Kom kop magu ducu amako con cakere i tinona.”

²²Yecu ka owinyo okobbe ni, “Ginnoro acel pwod orem i baŋi. Wot icat jami luŋ ame itye kede, ite poko oko baŋ ocan, eka ite bedo kede lonyo ame ikano i polo; yin doŋ ibin, iluba.”

²³Lo-nu ka owinyo kodi kop-pu, okumu meicel, pien onwoŋo rik en alonyo meicel.

²⁴Ame Yecu tye ka nene, okobo ni, “Tek meicel olonyo idonyo i loc Obaŋa!

²⁵Pien twara donyo inaga i waŋ pico yot, kato alonyo idonyo i loc Obaŋa.”

²⁶Jo ame owinyo okobo ni, “Kara ŋa a twero larre?”

²⁷En okobo ni, “Gin a mom twerre baŋ dano, ibaŋ Obaŋa twerre.”

²⁸Petero okobo ni, “Aco wan oweko pacciwa, olubi.”

²⁹Yecu okobbigi ni, “Ateni akobbiwu ni mano, mom tye ŋattoro ame oweko ode, onyo cege, onyo omego mere, onyo jo onywale, onyo itino mere, pi loc Obaŋa,

³⁰ame mom bino nwoŋo jami akato mano tyen apol i kare man; kede i kare a bino anyim bino nwoŋo kwo a perakino odoco.”

³¹Otero jo mere apar wie aryo, okobbigi ni, “Nenu, wan doŋ otye okwaro tur me wot i Jerucalem. Kop luŋ ame odwarpiny rik ocoo i kom Wot a dano bino cobere kakare.

³²Pien obino miye baŋ Orok, obino ŋale, obino miye lewic, obino ŋulo lao i kome;

³³obino pwode kede del, obino neke, cite i nino me adek en bino cer oko.”

³⁴Ento gin mom oniaŋ i kop magi kadi acelloro; kop ame en okobo owumere oko i baŋgi, mom gin omako kop ame okobo.

³⁵Ka Yecu doŋ onoko ceggi kede Jeriko, atowanŋoro onwoŋo obedo piny i ŋet yo kun kwao lim.

³⁶Ka owinyo lwak tye a kato i laŋete, en openyo ni, “Kara mano ŋo dok i?”

³⁷Otitte ni, “Yecu me Najaret en a kato-nono.”

³⁸En oredo ni, “Yecu, Akwar Daudi, tima kica, ba!”

³⁹Jo ame tye i nyime ojuke ni, “Liŋ lo-ni!” En omedo redo mere amede ni, “Akwar Daudi, tima kica ba!”

⁴⁰Yecu ocuŋ, te ciko ni kel lo-nono baŋe. Ka obino onoke a ceggi, openye ni,

⁴¹“Kara imito ni atimi nadi?” Okobo ni, “Rwot, amito anen piny.”

⁴²Yecu okobbe ni, “Nen giri piny oŋ; iyeeni ocaŋi.”

⁴³Cucuttono te cako neno piny oko, olubo Yecu kun mio kwogo baŋ Obaŋa, jo luŋ daŋ ka oneno, opako Obaŋa.