Read lango Luka 19 Bible Online

Luka 19 - lango bible

Luka 19

¹Yecu odonyo i Jeriko kun abebea iye.

²Rik tye lonnoro kuno nyiŋe Jakayo; en cen ara-ocoro adit, daŋ onwoŋo en alonyo.

³Onwoŋo en paro pi neno Yecu, ni en ŋa? Cite mom otwerre, pien lwak pol, dok en dano acek.

⁴Omio en oriŋo i nyim, oyito i wi olam pi nene, pien nwaŋ apello i yo-nono.

⁵Ka Yecu otuno i kabedo-nono, oneno malo, okobbi Jakayo ni, “Jakayo, yitto piny piopio, pien tin myero abed i odi.”

⁶En te yitto piny piopio, ojole kede yomcuny adwoŋ;

⁷omio jo luŋ ame oneno oŋuŋura kun okobo ni, “Odonyo i ot, abedo welo a dano ame abalo.”

⁸Jakayo oya malo, okobo baŋ Rwot ni, “Nen ba, Adwoŋ, nucu limma ducu ame atye kede doŋ amio oko baŋ ocan; dok daŋ ka ce abubuo gi-a ŋattoro, an abino cule tyen aŋwen.”

⁹Yecu okobbe ni, “I ot-ti tin obino iye lar, pien dano-ni daŋ obedo anywalli Iburaim.

¹⁰Pien Wot a dano obino me yenyo kede me laro gin orwenyo.”

¹¹Ka pwod gin otye a winyo kop man, Yecu omedde kede koppere, te kobbigi carokop; pien onwoŋo en doŋ ceggi kede Jerucalem, dok gin otamo ni loc Obaŋa kom doŋ anen oko oyotoyot.

¹²Omio en okobo ni, “Yam tye won kwogo moro ame oya, owoto i lobo abor me wot gamo twer me loc iye, ete dwogo.

¹³En olwoŋo omiro mere apar, te pokkigi ciliŋ tutumia apar, kun kobogi ni, ‘Catu kede wil ituno ka adwogo.’

¹⁴Cite jo me lobo mere onwoŋo dage; ocwao kwena i yore kun okobo ni, ‘Danonono mom omito ni lowa.’

¹⁵Ka odwogo a doŋ ogamo loc, te ciko ni lwoŋ omiro a nwaŋ omiogi lim, me eŋe wel agoba ame gin onwoŋo i cato wilgi.

¹⁶Dano me agege obino i nyime, okobo ni, ‘Adwoŋ, ciliŋ meri tutumia dok omedde iye ciliŋ ocele tutumia apar.’

¹⁷Ogamo doge ni, ‘Itimo ber, yin amiro aber! Pien yam ibedo agen i jami anok, ibino bedo kede twer i boma apar.’

¹⁸Dano me aryo te bino, okobo ni, ‘Adwoŋ, ciliŋ meri tutumia dok omedde iye ciliŋ ocele tutumia abic.’

¹⁹Okobbe ni, ‘Yin ibino bedo kede twer i boma abic.’

²⁰Dano ocele daŋ te dok bino, te kobbe ni, ‘Adwoŋ, ciliŋ meri gin ene, ame agwoko aboo kede itambara;

²¹pien onwoŋo alwori, pien yin dano ager, itero gin a mom ikano, ikaa gin a mom icoo.’

²²En okobbe ni, ‘Abino Ŋolo kop loi kun lubo kop ame oya i dogi giri keni, yin amiro arac. Yam iŋeo ni an a dano ager, atero gin a mom akane, akao gin a mom acoo bo?

²³Kara no omoni kano limma gira i beŋŋe, wek ka adwogo, agam limma kede agoba mere?’

²⁴Okobo baŋ jo ocuŋ i laŋete ni, ‘Gam wunu ciliŋ a tye baŋe oko, imi wunu baŋ won ciliŋ tutumia apar.’

²⁵Okobbe ni, ‘Adwoŋ, en doŋ tye i ciliŋ tutumia apar do!

²⁶Akobbiwu ni mano. Ŋat acel acel ame mere tye, obino miye, ento ŋat a mere mom, obino gamo oko gin a tye baŋe.

²⁷Ento okworra a rik okwera, ni kur alogi-ni, kelgi wunu kan, inekgi wunu oko i nyima.’ ”

²⁸Ka Yecu otyeko kobo kop man, omedde kede wottere kun kwaro tur me wot i Jerucalem.

²⁹Ame en doŋ ceggi tuno i Betepage kede Betania, i kidi ame olwoŋo kidi me Jeituni, ooro jo aryo i akina jo a lube,

³⁰ocikogi ni, “Wot wunu i paco i nyimwu ca. Ka idonyo wunu iye, ibino nwoŋo wunu atin kana ame otweo, ame ŋattoro mom ru oyito i wie; gonyu, ikel wunu kan.

³¹Ka dano moro openyowu ni, ‘Igonye wunu me ŋo?’ wun ibino wunu kobo aman ni, ‘Adwoŋwa en ame amito.’ ”

³²Jo ame oorogi daŋ owoto, onwoŋo i kite acalo okobbigi kede.

³³Ame gin agonyo atin kana, wegi mere openyogi ni, “Kara igonyo wunu atin kana me ŋo?”

³⁴Gin ogamo ni, “Adwoŋwa en ame amito.”

³⁵Ote kelo atin kana baŋ Yecu, ote peto boŋŋigi i wie, ote cibo Yecu i wie.

³⁶A doŋ en awot, gin opeto boŋŋigi i dye yo.

³⁷Ka en onoko ceggi kede luŋ kidi me Jeituni, lwak jo a lube luŋ ocako lelo, dok opako Obaŋa kede dwon aloŋo pi tic atek adoŋo ducu ame gin oneno,

³⁸kun okobo ni, “Opwo wunu abaka ame abino nyiŋ Rwot! Kuc obed i polo, kwogo bed malo i wi polo!”

³⁹Oparicayo mogo i akina lwak okobbe ni, “Apwony, juk jo meri a lubi-ni.”

⁴⁰En odok iye ni, “Akobbiwu ni mano, ka kono jo man liŋ i, kiddi magi en ame bino lunyo redo gigi.”

⁴¹Ka doŋ onoko ceggi, a doŋ oneno boma-nono, okoke,

⁴²kun kobo ni, “Ka kono tin-ni iŋeo gin a kelli kuc! Cite onyoni opono oko i waŋi.

⁴³Pien kare moro abino i komi, ame okworri bino toro tuti me lobo guri dyere, dok obino ridi tuŋŋi i tuŋŋi.

⁴⁴Obino rwaci piny, yin kede itinoni a tye baŋi; mom obino weko kidi moro acel doŋ iyii ame ododde i wi wadgi, pien rik mom iŋeo kare ame olimi iye.”

⁴⁵Odonyo i ot Obaŋa, ocako ryemo jo a cato wil iye,

⁴⁶kun kobbigi ni, “Nwaŋ ocoo ni, ‘Oda bino bedo ot me ka kwac’; ento wun iloko wunu odoko adu oyak.”

⁴⁷En obedo ka pwony i ot Obaŋa nino luŋ. Olamdog adoŋo kede opwonycik kede jo adoŋo i akina lwak oyenyo yo me neke;

⁴⁸cite gin mom onwoŋo ginnoro a myero otim i kome, pien jo luŋ oketo cunygi i winyo koppere.