Read lango Luka 2 Bible Online

Luka 2 - lango bible

Luka 2

¹I kare ca cik rik oya i baŋ Kaicari Augucito pi coyo nyiŋ jo ducu me lobo.

²Man en coye me agege, ame otimere kun onwoŋo Kurenio loo Curia.

³Jo luŋ aluŋa owoto me coye kun ŋat acel acel dok i paco turgi.

⁴Yucepu daŋ rik oya i Galilaya, i paco me Najaret, me wot i Judaya, i paco a Daudi ame nyiŋe Beterekem, pien onwoŋo rik en ŋat acel i akina ikwae a Daudi,

⁵me ecoye gin i Maliam ame ocikere kede, ame onwoŋo doŋ ogogoro.

⁶I kare ame onwoŋo doŋ gin tye kuno, kare me nywallere te romo oko.

⁷En te nywalo wode me kao, te wume kede boŋo me atin okere, eka te pyele i weer me cem a dok, pien kabuto onwoŋo oremogi oko i ot wele.

⁸I lobo-nu rik tye iye okwat ame bedo i tim, kun ogwoko rommigi dyewor.

⁹Cutocuto amalaika a Rwot onen, ocuŋ i akinagi, kwogo a Rwot oryeny, ocarogi, lworo te makogi atek.

¹⁰Amalaika okobbigi ni, “Kur ilwor wunu pien nen, akelliwu amut aber me yomcuny ame bino nya baŋ jo ducu.

¹¹Tin-ni, i paco a Daudi, onywalliwu Alar, en Kricito Rwot.

¹²Man bino bedo gin a nyuto: ibino nwoŋo wunu atin okere ame owumo i boŋo, kun opyelo obuto i weer me cem a dok.”

¹³Cucuttono onwoŋo tye lwak mony me polo karacel kede amalaika-nono: gin opako Obaŋa kun obume ni,

¹⁴“Kwogo bed baŋ Obaŋa malo i polo, kuc obed i lobo i akina jo ame epwoo.”

¹⁵I kare a doŋ omalaika oya i baŋi, odok i polo, okwat oporo kop kekengi ni, “Owot wunu koŋ i Beterekem, me owot onen wunu gin ame Rwot onyuttiwa.”

¹⁶Gin owoto oyotoyot, ote nwoŋo Maliam kede Yucepu, kede atin ame obuto i weer me cem a dok.

¹⁷Ka gin oneno, otito baŋ jo kop ame okobbigi i kom atin man;

¹⁸jo ducu ame owinyo, owuro pi kop ame okwat otittigi.

¹⁹Ento Maliam okano kop magi ducu kun tamo i cunye.

²⁰Okwat odok a kun mio kwogo baŋ Obaŋa, opake pi gigu ducu ame gin owinyo, dok oneno, acalo koŋ otittigi.

²¹Ka nino aboro doŋ oromo me lire, ocako nyiŋe Yecu, nyiŋ ame amalaika omio a kun mom ru en tye i yic.

²²Ka kare me lonyeregi oromo, acalo cik a Muca okobo, Maliam kede Yucepu otero atin i Jerucalem pi miyo baŋ Rwot,

²³(acalo ocoo i cik a Rwot ni, “Itino kao ducu a co obino cwanogi acil pi Rwot”)

²⁴dok me miyo mot ame oŋolo me yalo Obaŋa, acalo rik ocoo i cik a Rwot ni, “awele aryo onyo otino amam aryo.”

²⁵Rik tye i Jerucalem dano a nyiŋe Cimeon. Rik en dano a kite atir, a woro Obaŋa, kun kuro kare a waŋoro obino kweyo iye cuny jo Icrael; Cuny Acil ceŋ tye i kome.

²⁶Cuny Acil rik otyeko doŋ yabbe ni en mom bino to a mom ru oneno Kricito a Rwot.

²⁷Cuny Acil otiŋe obino i ot Obaŋa. Ka onywal atin Yecu okele, me wek ocob gin ame cik mito i kome.

²⁸Cimeon otiŋe i bade, opwoo Obaŋa, okobo ni,

²⁹“Aman doŋ iciko amiro meri, Rwot, me wot i kuc, kun ilubo gin a nwaŋ iciko;

³⁰pien waŋa doŋ oneno lar meri

³¹ame iyiko i nyim rok ducu,

³²me bedo ceŋ a menyo muŋ baŋ Orok, kede me bedo kwogo a jo meri Icrael.”

³³Pappere kede tottere ote wuro kop ame okobo i kome.

³⁴Cimeon olamo winyo i komgi, kun kobo baŋ tottere Maliam ni, “Nen, atin man ocibo wek jo Icrael apol rette, dok ya, dok me bedo anen ame jo okwero,

³⁵(dok pala karu bino cobo tiponi kero), wek tam opono i cuny jo apol yabere.”

³⁶Rik tye adwarpinnyoro a dako, nyiŋe Anna, nyaka a Panuel, me i atekere Acer; onwoŋo doŋ oteggo meicel, kun otyeko mwakki abiro baŋ cware cakere i kare ame onyome,

³⁷icennere ka cware oto, te bedo kene, naka ituno i mwaka pyeraboro wie aŋwen. En pe rwenyo i ot Obaŋa ka woro Obaŋa kede kanyo kec kede kwae dyewor kede dyeceŋ.

³⁸En opwoo Obaŋa ka obino i caa-nono, te rabo nyiŋ atin baŋ jo ducu ame yam kuro kare me lakoro Jerucalem.

³⁹Ka doŋ gin otyeko cobo gin ducu a tye i cik a Rwot, gin odok i Galilaya, i pacogi Najaret.

⁴⁰Atin odoŋo, odoko atek, kun opoŋ kede ryeko. Winyo Obaŋa onwoŋo tye i kome.

⁴¹Onywal Yecu rik woto i Jerucalem mwaka i mwaka i ecuban me Kato.

⁴²Ka mwaka me dittere doŋ oromo tomon wie aryo, gin owoto i ecuban acalo yam kite tye.

⁴³Ka ecuban doŋ otum, ame doŋ odok cen paco, awobi Yecu odoŋ cen i Jerucalem, ento onywalle pe oŋeo;

⁴⁴gin otamo ni en tye i akina lwak ame owoto kedgi. Gin te woto wot me nino acel, oyenye i akina watigi kede owotegi;

⁴⁵ka pe onwoŋe, gin odok i Jerucalem me wot yenye.

⁴⁶Ka nino adek doŋ okato, gin onwoŋe i ot Obaŋa, obedo i akina opwony ka winyogi kede penyogi.

⁴⁷Jo ducu ame onwoŋo owinye, owuro ryeko me niaŋŋere kede kit dokkere i peny.

⁴⁸Ka gin onene, gin owuro atek, tottere te penye ni, “Woda, itimowa aman piŋo? Nen, wan i pappi obedo yenyi kede kumo.”

⁴⁹En ogamo doggi ni, “Iyenya wunu piŋo? Mom iŋeo wunu ni an myero abed i ot a Pappa?”

⁵⁰Gin pe oniaŋ kop ame en okobbigi.

⁵¹Onywako yo kedgi aton i Najaret, dok obedo kede winy baŋgi: cite tottere okano kop magi ducu i cunye.

⁵²Yecu odoŋo, omedde i ryeko, kun medde nwoŋo pwoc baŋ Obaŋa kede baŋ jo.