Read lango Luka 20 Bible Online

Luka 20 - lango bible

Luka 20

¹I nino moro acel ame Yecu tye apwonyo lwak i ot Obaŋa, kede rabo amut aber, olamdog adoŋo kede opwony-cik anaka odoŋe obino baŋe.

²Ote penye ni, “Kobbiwa, twerrene omio itimo kit man? Onyo ŋa ame omii twer man?”

³En ogamo doggi ni, “An daŋ koŋ abino penyowu kede pennyoro acel, me idokka wunu iye.

⁴Batija a Lakana oya i baŋ Obaŋa, aŋar onyo oya i baŋ dano?”

⁵Gin oporo kop kengi kengi, kun okobo ni, “Ka okobo ni, ‘Oya i baŋ Obaŋa,’ en bino penyowa ni, ‘Kara piŋo mom iye wunu en?’

⁶Cite dok ka okobo ni, ‘Oya i baŋ dano,’ lwak luŋ bino napowa kede gweŋ, pien gin oye atika ni Lakana obedo adwarpiny.”

⁷Omio gin ote dokke iye ni, “Kan ame oya iye wan okwia giwa.”

⁸Yecu daŋ te kobbigi ni, “An daŋ mom abino kobbiwu twerrene omio atimo kite man.”

⁹Eka te cako kobo carokop man baŋ lwak ni mano, “Nwaŋ tye dano moro ame opito poto olokkere te joko baŋ opur, eka te wot oko i lobo ocele, odikere kuno pi kare alac.

¹⁰Ame kare doŋ oromo, en te cwayo amiro baŋ opur me gin mie dul ginnoro ocek i poto. Cite opur opwode, oryeme, odok i ciŋe nono.

¹¹Dok ooro amiro ocele; en daŋ dok opwode, omie lewic, daŋ oryeme, odok i ciŋe nono.

¹²Dok te oro me adekkere; man daŋ owano, ote bole oko,

¹³lcennere won poto olok te kobo ni, ‘Kara man doŋ abino timo ŋo? Abino oro woda ame amaro; aŋar onyo obino wore.’

¹⁴Ento ka opur onene, ote kobo kengi kengi ni, ‘Kom man en ale-lim; ber oneke wunu oko, me lim eleyo-nono bed megwa.’

¹⁵Ocore oko teŋe i poto olok, ote neke oko. Kara won poto olok bino timo jonono niŋo?

¹⁶En bino bino, te neko opur-ru oko, te miyo poto olok baŋ jo apat.” Ka gin owinyo kop man, okobo ni, “Pe amannono!”

¹⁷Cite en onenogi, okobbigi ni, “Kara te kop ame ocooni tere niŋo, ni mano, ‘Kidi ame ogedo okwero en ame odoko kidi me gwic ot?’

¹⁸Dano acel acel ame orette i kom kidi man bino ŋidde oko atitino; ka kidi man orette i kom ŋattoro, bino ŋinyo oko.”

¹⁹Opwony-cik kede olamdog adoŋo otemo make i caanono, cite ote lworo lwak oko; pien gin oniaŋ aber ni en okobo carokop man i komgi.

²⁰Gin obedo kiye, eka ote oro orot ame poro ni gin jo a kitegi atir, me mak kop ame ya i doge, wek ote miye i ciŋ aloc kede twerrere.

²¹Gin openye ni, “Apwony, wan oŋeo ni yin ikobo dok ipwonyo kop ame tye atira, mom ipoko akina jo, cite ipwonyo yo Obaŋa i ateni.

²²Myero ogelli Kaicari ocoro, onyo mom?”

²³Ento en oŋeo ryekogi oko, te kobbigi ni,

²⁴“Koŋ inyutta wunu ciliŋŋoro. Cal kede coc ame ogoro i yie-ni mea ŋa-nono?” Gin ogamo ni, “Mea Kaicari.”

²⁵Eka en te kobbigi ni, “Aco do, dwok wunu baŋ Kaicari jami a Kaicari, jami Obaŋa dwoku baŋ Obaŋa.”

²⁶Mako kop ame oya i doge te loyogi oko i nyim lwak; gin owuro kite ame en odok kede i kop, ote doŋ liŋ aliŋa.

²⁷Ocadukayo mogo obino baŋe; jo-ni gin jo ame kobo ni, jo oto pe cer.

²⁸Gin okelo peny baŋe ni, “Apwony, Muca nwaŋ ocoo pirwa ni, ka omin a ŋattoro oto oko ame etye kede cege cite itino mere mom, ominnere myero lak dako mere me nywal ominnere itino.

²⁹Aco, nwaŋ tye jo abiro ame gin omego. Dano me agege onyomo dako, te to boŋo atinnoro.

³⁰Dano me aryo,

³¹kede me adekkere daŋ olako dan-nu; kite-nono gin abiro luŋ obedo kede dannu, ote to boŋo atinnoro.

³²Icennere dako daŋ te to oko.

³³Kara i kare me cer, da-nu bino bedo cik a ŋa? Pien gin abiro luŋ obedo kede.”

³⁴Yecu okobbigi ni, “Awobe kede anyira me lobo man gin nyomere,

³⁵cite jo ame okwanogi ni gin oromo tuno i lobo ca, kede cer iyi akina jo oto, mom obino nyomere,

³⁶pien gin mom dok twero to. Gin rom aroma kede omalaika; daŋ doŋ gin itino Obaŋa, pien gin doŋ jo ocer.

³⁷Ento anaka Muca ikome onyuto ni jo oto ocerogi, i dul i kom yat obuŋere ame olyel, kan ame olwoŋo iye Rwot ni, Obaŋa Iburaim, Obaŋa Icaka, Obaŋa a Yakobo.

³⁸En mom Obaŋa ajo oto, ento meajo akwo; pien jo luŋ bedo kwo pire.”

³⁹Opwony-cikkogo ogamo doge ni, “Apwony, ikobo aber.”

⁴⁰Pien gin mom dok otiŋere me penye kopporo.

⁴¹Cite en openyogi ni, “Kara okobo niŋo ni Kricito en akwar Daudi?

⁴²Aco kono Daudi ikome okobo i buk me Jabuli ni mano, ‘Rwot okobbi Rwotta ni, Bed i laŋeta tuŋ cem i kabedo me kwogo,

⁴³ituno ka abino miyo okworri doko aten tyeni.’

⁴⁴Kite-nono Daudi lwoŋe ni Rwot; en dok bedo akware niŋo?”

⁴⁵Ka lwak ducu tye a winyo koppere, en okobbi jo mere a lube ni,

⁴⁶“Gwokere wunu i kom opwony-cik ame maro wot a kun orukere kede boŋŋi abeco, ame omito daŋ ni jo motgi i cuk, kede bedo i kome me dito i kacokere, kede i kabedo me kwogo i dog cem.

⁴⁷Gin mao udi a mon a coggi oto, dok okwao Obaŋa nakanaka me gobagoba. Kop ame obino ŋolo i wigi bino bedo pek akato.”