Read lango Luka 22 Bible Online

Luka 22 - lango bible

Luka 22

¹Ecuban me Ogati a Tobi Mom iye, ame olwoŋo ni Kato, onwoŋo onoko ceggi.

²Olamdog adoŋo kede opwony-cik oyenyo yo a myero gin neke kede, pien onwoŋo gin olworo lwak.

³Catan odonyo i cuny Juda ame olwoŋo me Keriot, ame okwane i wei olub Yecu apar wie aryo.

⁴En owoto, oporo kop kede olamdog adoŋo kede odoŋe cirikale, kite a myero emie kede baŋgi.

⁵Cunygi obedo yom, ote ciko miye lim.

⁶En daŋ te ye, te yenyo kare aber me miye baŋgi ame nwoŋo lwak mom iye.

⁷Nino me Ogati a Tobi Mom iye otuno, ame myero oŋol iye atin romo me Kato.

⁸Yecu ooro Petero kede Lakana kun cikogi ni, “Ape wunu, yiku cam me Kato pirwa me ocamu.”

⁹Gin openye ni, “Imito ni owot oyik tuŋ kwene?”

¹⁰Okobbigi ni, “Nen ba, ka idonyo wunu i Jerucalem, lonnoro bino romere kedwu ame oyeo gulu pii. Lube wunu anaka i ot ame ebino donyo iye.

¹¹Kobbi wunu won ot ni, ‘Apwony okobo ni, Ane ot welo kan ame abino camo iye Kato karacel kede jo mera a luba?’

¹²En bino nyuttiwu icika alac i malo ame opeto; yik wunu kuno.”

¹³Gin owoto, ote nwoŋo tye acalo en oporrigi, ote yiko cam me Kato.

¹⁴Ka caa oromo, Yecu obedo piny i dog cem karacel kede okwena.

¹⁵Okobbigi ni, “Onwoŋo ceŋ aparo meicel pi camo Kato man kedwu, kum mom ru akanyo can;

¹⁶pien akobbiwu ni mano, mom dok abino camo, ituno ka bino cobere kakare i loc Obaŋa.”

¹⁷Ogamo ikopo; ka doŋ opwoo, okobo ni, “Maku man, ipok wunu i akinawu;

¹⁸pien attitiwu ni mano, cakere amanni, mom dok abino mato pig olok, ituno ka loc Obaŋa bino tuno.”

¹⁹Omako ogati; ka doŋ opwoo, onyinyilo, omiogi kun kobo ni, “Man en koma ame omio pirwu. Tim wunu man me poyo an,”

²⁰Amannono ka gin ocamo otum, otiŋo ikopo kun kobo ni, “Ikopo man en cikere anyen i remona ame oony pirwu.

²¹Cite nen ba, ciŋ dano a keto erupe i koma tye i wi meja kan karacel keda.

²²Pien Wot a dano awot gire i kite a nwaŋ oyiko; ento dano a keto erupe i kome, kite ame ebino neno can kede!”

²³Gin ote penyere kengi kengi ni, ŋa i akinagi ame bino timo man.

²⁴Pyem dok te erre i akinagi ni mano, ŋa i akinagi myero otam ni dit a loogi?

²⁵Yecu okobbigi ni, “Rwode Orok bwoo jo megi kede teko; jo ame tye kede twer i akinagi olwoŋogi ni otim aber.

²⁶Cite i baŋwu mom myero bed amannono; ento ŋat ame adit i akinawu myero lokere dok acalo ŋat atidi, kede atelwic myero bed acalo dano ame tio pi jo.

²⁷Ŋa ce ame loo kede dit, ŋat ame bedo i dog cem, ya onyo ŋat ame kelo cam? Pe ŋat ame bedo i dog cem? Cite an abedo i akinawu acalo ŋat ame tio pi jo.

²⁸“Wun giwu jo ame obedo i laŋeta i kare luŋ ame obedo tema.

²⁹Acalo Pappa oyikka loc, an daŋ ayiko pirwu ni,

³⁰ibino camo, ibino mato wunu i dog mejana i locca, dok ibino bedo wunu i wi kome me kwogo kun iŋolo wunu kop i kom atekere apar wie aryo a jo Icrael.

³¹“Cimon, Cimon we, Catan otyeko kwayo ni omiwu baŋe me apyeta acalo kal,

³²cite atyeko kwayo Obaŋa piri atek ni, iyee meri kur dok cen. Yin daŋ, ka doŋ ilokere, myero ijiŋ cuny omegoni.”

³³En te kobbe ni, “Rwot, doŋ ayikere me wot kedi i buc, anaka kede i to daŋ.”

³⁴En odok iye ni, “Petero, akobbi ni mano, twon gweno mom bino koko tin, ituno ka koŋ ikwera tyen adek, ni mom iŋea.”

³⁵Openyogi ni, “Ka cwany aorowu boŋo cao me lim, kadi ocoe, kadi war, ginnoro rik tye ame oremowu?” Gin ogamo ni “Mom gire.”

³⁶Te cikogi ni, “Ento koni, ŋat ame tye kede cao lim, ber teri; kede me ocoe daŋ amannono. Ŋat a mom tye kede pala bat cat kanyi mere me wil kede.

³⁷Pien akobbiwu ni, coc man a nwaŋ ocoo myero cobere kakare i koma, ni, ‘Okwane karacel kede obalo’; pien kop ame ocoo i koma tye a cobere kakare.”

³⁸Gin okobbe ni, “Rwot, neno, pala bat aryo en, tye kan-ni.” Ogamo ni, “Mano romo.”

³⁹Yecu okato oko, owoto i wi kidi me Jeituni, acalo kite mere tye; jo a lube owapo yore.

⁴⁰Ka otuno i kabedono-no, okobbigi ni, “Kwa wunu Obaŋa, me kur idony wunu i abita.”

⁴¹Opokere kedgi, owoto teŋe a rom i kan a dano twero yuyo iye gweŋ, orumo piny, te kwayo ni,

⁴²“Pappa, ka imito, kwany ikopo man i koma oko; cite kur bed acalo an amito, ento gin ame yin imito myero timere.” [

⁴³Amalaika ame oya i polo te nen baŋe, omie teko.

⁴⁴Ame en tye akumo atek meicel, daŋ te medde i kwac atek; omio kwok i kome ocwer adwoŋ, oony piny acalo remo.]

⁴⁵Ka doŋ oya i ka kwac me bino baŋ jo a lube, onwoŋogi doŋ onino oko pi wancunygi.

⁴⁶Openyogi ni, “Inino wunu pino? Ya wunu, ikwau Obaŋa, me kur idony wunu i abita.”

⁴⁷Ame en pwod tye ka kop, lwak jo te pello; ŋat ame olwoŋo ni Juda, ŋat acel i akina jo apar wie aryo ca, en otelo yo. Onoko laŋet Yecu aceggi me emote kun enoto Ieme.

⁴⁸Yecu te penye ni, “Juda, iketo erupe i kom Wot a dano kun inoto leme?”

⁴⁹Jo ame onwoŋo ceggi kede, ka oneno gin ame amito timere, te penyo ni, “Rwot, otongi oko kede pala bat?”

⁵⁰Ŋat acel i akinagi te toŋo opii alamdog adwoŋ, te mworo yite tun cem oko.

⁵¹Yecu te kobo ni, “Wek oko. Kur dok imedi!” Yecu te mulo yite, caŋo oko.

⁵²Icennere Yecu te kobo baŋ olamdog adoŋo, kede odoŋe cirikale me ot Obaŋa, kede odoŋe ame obino i kome ni, “Ibino wunu i koma i pale romo kede abiriŋ, bala ibino wunu i kom ayak?

⁵³Nino luŋ rik atye kedwu i ot Obaŋa, mom imaka wunu. Ento amanni en karewu, kede twer me piny acol.”

⁵⁴Gin omake, ote tere oko naka i ot alamdog adwoŋ. Petero olubo yore icecen.

⁵⁵Ka gin okuto mac i dyekal, gin te bedo piny, ŋinne iye karacel; Petero daŋ obedo i akinagi.

⁵⁶Aŋeca moro te nene kun eganakino kan a mac ocaro; te bedo niye atek, te kobo ni, “Jal-li daŋ woki tye karacel kede.”

⁵⁷Ento en okwero oko, kun kobo ni, “Dako, an mom aŋeo gira lonnono.”

⁵⁸Kare te kato kom anok keken, ŋat ocele te dok nene oko, te kobbe ni, “Yin daŋ i ŋat acel i akinagi.” Petero te gamo ni, “Lo-nie, mom an gira.”

⁵⁹A doŋ caa acel okato, dano ocele okobo kun moko atek ni, “Ateni, kom lo-ni woki tye karacel kede; kom en Agalilaya ikome.”

⁶⁰Ento Petero ogamo ni, “Loni we, an mom aŋeo kop ame ikobo.” Cuto ame pwod ekobo kop man, twon gweno te mwoco koko.

⁶¹Rwot te lokere neno Petero, Petero te cako po i kom kop a ceŋ Rwot okobbe, ni mano, “Ame mom ru twon gweno okok tin, ibino kwera tyen adek.”

⁶²Okato oko, okok kun cunye waŋ meicel.

⁶³Jo ame omako Yecu oŋale, opwode.

⁶⁴Otweo waŋe kede itambara, ote penye ni, “Yin adwarpiny do, tuci! Kara ŋa ojwati?”

⁶⁵Gin okobo kop ocele apol i kome, kun oyete kede-gu.

⁶⁶Ka piny oru, odoŋe me ot Obaŋa ocokere karacel, olamdog adoŋo karacel kede opwony-cik. Gin otere i nyim okiko megi, ote kobo ni,

⁶⁷“Ka yin i Kricito, tittiwa.” Cite en okobbigi ni, “Ka atittiwu, mom ibino ye wunu;

⁶⁸daŋ ka apenyowu, wun pe ibino wunu dokka iye.

⁶⁹Ento cakere amanni, Wot a dano bino bedo piny i kabedo me kwogo i laŋet Twer Obaŋa tuŋ cem.”

⁷⁰Gin ducu ogamo ni, “Doŋ yin Wot Obaŋa bo?” En ogamo ni, “Wun ikobo wunu ni an a en.”

⁷¹Gin okobo ni, “Kara dok omito caden me ŋo? Wan doŋ owinyo giwa kede yitwa gin ame en okobo kede doge.”