Read lango Luka 23 Bible Online

Luka 23 - lango bible

Luka 23

¹Lwak jo-nu luŋ oya, otere i nyim Pilato.

²Gin ocako pide kun okobo ni, “Dano man wan onwoŋo kun arwenyo rok mewa oko. Ogeŋowa ni kur ogelli Kaicari ocoro, daŋ-gu lwoŋere kene ni en e Kricito, abaka.”

³Pilato openye ni, “Yin abaka Ojudaya?” En te gamo ni, “Yin ikobo giri.”

⁴Pilato te kobo baŋ olamdog adoŋo kede baŋ lwak ecipan ni, “Mom anwoŋo kopporo arac i kom dano man.”

⁵Ento gin odie tetek kun okobo ni, “Lo-nu popoo lwak, pwonyo naka i Judaya luŋ aluŋa, cakere i Galilaya anaka kom kan twal.”

⁶Ka Pilato owinyo kop man, openyo ka onyo en dano me Galilaya.

⁷Ka doŋ oniaŋ ni en tye i te loc a Kerode, ocwae baŋ Kerode, pien en daŋ onwoŋo tye i Jerucalem i kare-nono.

⁸Kerode ka oneno Yecu, oyomoro yie atek meicel, pien yam con onwoŋo paro pi nene, pien yam owinyo pire, dok onwoŋo egeno ni ebino neno anyuttoro a en bino timo.

⁹Omio en openyo Yecu kede peny apopol, ento en mom odok iye itik.

¹⁰Olamdog adoŋo kede opwony-cik ocuŋ i laŋete kun opide kede tekogi.

¹¹Kerode daŋ ocae kede cirikale mere, oŋale, eka te ruke kede boŋo me kwogo, te dwoke kede baŋ Pilato.

¹²Omio Kerode gin kede Pilato omer i ceŋŋono, pien nwaŋ otye kede amone i akinagi kengi.

¹³Pilato olwoŋo olamdog adoŋo kede oloc kede lwak karacel,

¹⁴te kobbigi ni, “Ikelo wunu dano man baŋa ni en ŋat a rwenyo lwak. An apenye i nyimwu, nenu ba, mom anwoŋo kopporo arac i kome i kom kop luŋ ame ipide wunu iye.

¹⁵Kadi Kerode daŋ mom onwoŋo, pien en dok odwoggo en baŋwa. Nen, en mom otimo ginnoro a romo neke.

¹⁶Pi mano, an abino pwode, ate gonye oko.” [

¹⁷I kare me ecuban myero ceŋ gonnyigi ŋattoro acel.]

¹⁸Cite gin luŋ ote wo karacel, oredo ni, “Neke oko! Gonnyiwa Baraba!”

¹⁹Baraba nwaŋ en dano ame otweo i buc pi tubo lwak i Jerucalem, kede pi nek.

²⁰Pilato dok okobo kedgi, kun mito ni egony Yecu,

²¹cite gin owo kun oredo ni, “Gure i kom yataria! Gure i kom yataria!”

²²En dok openyogi tyen me adek ni, “Piŋo kara? Gin aŋo arac ame otimo? An mom anwoŋo kopporo arac i kome a romo neke. Pi mano, abino pwode, ate gonye oko.”

²³Ento gin oredo kede dwon aloŋo kun odie ni myero gure i kom yataria, dwongi te loyo;

²⁴omio Pilato oŋolo kop ni myero time acalo gin okwao.

²⁵Ogonyo dano ame nwaŋ otweo i buc pi tubo lwak kede pi nek; ento ojalo Yecu me time kite a gin omito.

²⁶Ame otye ka tere, omako Cimon, dano me Kurene, ame onwoŋo abino kun oya i myere, oyimo yataria i wi gwoke, wek eye, elub i Yecu.

²⁷Lwak jo ecipan olube, kede mon apol, ame okumo kun okoke.

²⁸Yecu olokere tuŋ baŋgi, okobo ni, “Anyira me Jerucalem, kur ikoku pira; kok wunu pirwu kenwu kede pi itinowu.

²⁹Pien, nen, kare bino tuno ame obino kobo iye ni, ‘Otye kede winyo, mon ame oraŋa, kede ot nyodo a mom onywal, kede tuno ame mom odoto!’

³⁰I kare-nono obino ero kobbi kiddi adoŋo ni, ‘Rette wunu i komwa’; kede baŋ kiddi atino ni, ‘Wumwa wunu’.

³¹Pien ka jo timo man ame yat pwod dyaka, bino bedo nino ka yat doŋ otyeko two?”

³²Jo aryo ocele a nwaŋ gin otim areco daŋ oterogi me nekgi karacel kede.

³³Ka gin otuno i kabedo ame olwoŋo Cogo Wic, ogure i kom yataria kuno, kede otim areco, ŋat acel tuŋ cem, ŋat acel tuŋ cam.

³⁴Yecu okobo ni, “Pappa, timgi ber, pien gin mom oŋeo gin a gin atimmo.” Gin opoko boŋŋi mere oko i akinagi kun obolo iye kwir.

³⁵Lwak ocuŋ kun oneno, cite oloc oŋale, kun okobo ni, “Yam laro jo ocele; koŋ larre kene, ka en Kricito Obaŋa ame eyero!”

³⁶Cirikale daŋ oŋale; gin obino baŋe, omie koŋo awac,

³⁷kun okobo ni, “Ka yin Abaka Ojudaya, larre keni!”

³⁸I waraga ame oguro tuŋ wie ocoo ni, “Man en Abaka Ojudaya.”

³⁹Ŋat acel i akina otim areco ame ogurogi karacel kede oyete kun kobo ni, “Yin mom i Kricito bo? Larre keni, kede wan daŋe!”

⁴⁰Ento dano ocele ca te juke, kun kobo ni, “Yin mom ilworo Obaŋa, a kun oŋolli kop a rom aroma i mere?

⁴¹Wan giwa oŋolliwa kop kakare, pien oculliwa a rom i gin a wan otimo; cite dano man mom otimo gin arac kadi acelloro.”

⁴²Te kobo ni, “Yecu, po i koma ka ituno i locci.”

⁴³Odokke iye ni, “Ateni akobbi ni, tin ibino bedo keda i Paradic.”

⁴⁴Caa onwoŋo doŋ mito romo abicel, piny te doko col i wi lobo luŋ, tuno anaka i caa aboŋwen.

⁴⁵Onwoŋo waŋ ceŋ owumere oko; boŋo icika me ot Obaŋa oyec oko dul aryo.

⁴⁶Yecu oredo i dwon aloŋo, okobo ni, “Pappa, amio cunya i ciŋi.” Ka doŋ okobo kop man, te to oko.

⁴⁷Ka adwoŋ me cirikale oneno gin ame otimere, opako Obaŋa kun kobo ni, “Ateni, ba, dano man kara dano ame kite atir!”

⁴⁸Lwak luŋ ame ocokere ka neno, ka oneno gin ame otimere, odok paco kun obapo korgi.

⁴⁹Owote mere ducu ocuŋ i teŋe, kede mon daŋ a nwaŋ obino kede kun oya i Galilaya, kun oneno anena.

⁵⁰Onwoŋo cen tye lo moro a nyiŋe Yucepu; en daŋ rik dano acel i akina jo a bedo i kancil, en dano aber, ame kite atira.

⁵¹Nwaŋ mom onotte kedgi i tamgi anaka i timgi. Turgi paco Ojudaya ame olwoŋo Arimataya; daŋ en kuro loc Obaŋa.

⁵²En owoto baŋ Pilato, okwao kom Yecu,

⁵³ogweto i kom yat, te boyo kede cuka me camanini, te pyele iyi lyel ame oboro abora i lela; kannono onwoŋo pe ru opyelo iye kom ŋattoro oto.

⁵⁴Rik onwoŋo nino me Yikere, cabit daŋ onwoŋo ceggi cakere.

⁵⁵Mon a rik obino kede kun oya i Galilaya owapo yorgi, gin te neno lyellere, kede kite ame opyelo kede kome;

⁵⁶eka gin ote dok paco, oyiko gin a ŋwece kur kede moo wir. I cabit gin ote weo, acalo cik tye.