Read lango Luka 24 Bible Online

Luka 24 - lango bible

Luka 24

¹I nino ame lubo cabit Ojudaya gin odilo ka ibayi, obino i wi lyel kun okelo gin a ŋwece kur ame gin oyiko.

²Gin ote nwoŋo ni ocoro kidi oko i dog lyel;

³cite ka gin odonyo iye, pe onwoŋo kom Rwot Yecu.

⁴Ka pwod tamgi ocuŋ pi kop man, cucuttono gin oneno co aryo ocuŋ i laŋetgi, ame orukere i boŋŋi a mimila.

⁵Lworo omakogi meicel, ote ryebere piny. Co-nu te penyogi ni, “Kara piŋo iyenyo wunu dano akwo iyi akina a jo oto? [En mom tye kan, ocer oko.]

⁶Po wunu i kop a rik en okobbiwu ka pwod tye i Galilaya,

⁷ni mano, Wot a dano myero mie i ciŋ jo ame obalo, daŋ myero gure i kom yataria, i nino me adekkere myero en cer oko.”

⁸Gin ka opoyo koppere,

⁹oya oko i lyel, odok cen, orabo kop-pi ducu baŋ jo apar wie acel ca, kede baŋ jo ocele luŋ.

¹⁰Jo a rik orabo kop-pi baŋ okwena onwoŋo Maliam me Magdala, kede Yoanna, kede Maliam tota a Yakobo, kede mon ocele ame onwoŋo tye kedgi;

¹¹cite kop a gin okobo owinyere bala kop atata i tuŋ baŋ jo-nono, gin mom oye gigi. [

¹²Ento Petero oya, oriŋo i wi lyel; ka oguŋo, oŋio yi lyel, oneno boŋŋi me camanini odoŋ kakare, odok paco kun wuro gin man ame otimere-ni.]

¹³I nino acel-lu, jo mogo aryo i akinagi onwoŋo owot i paco ame olwoŋo ni Emau, ame mito romo mairo abiro ya i Jerucalem;

¹⁴onwoŋo gin otye ka kop kengi kengi i kom gin a doŋ otimere.

¹⁵Ame otye ka kop, kun olaro kop karacel, Yecu onokogi a ceggi, owoto kedgi.

¹⁶Cite waŋgi owumere oko, mom oŋee.

¹⁷Openyogi ni, “Kara kop ŋo ame ilaro wunu kenwu kenwu wi cuŋocuŋo-ni?” Gin ocuŋ kun waŋgi nen myemye.

¹⁸Ŋat acel i akinagi, nyiŋe Kelopa, ogamo koppere ni, “Yin i welo keni i Jerucalem, ame mom iŋeo gin otimere iye i kare man-ni?”

¹⁹En openyogi ni, “Ŋo-no?” Ote gamo ni, “Kop i kom Yecu me Najaret, a ceŋ obedo adwarpiny atek i koppere kede ticcere i nyim Obaŋa kede i nyim jo luŋ.

²⁰Olamdog adoŋo kede olocwa oŋolle kop me to, ote gure i kom yataria.

²¹Aco onwoŋo wan yam ogeno ni en ame bino lakoro jo Icrael. Dok medo i kom mano ducu, tin doŋ nino me adekkere, geye a mannono otimere.

²²Cite monnogo i akinawa ocuŋo wi wa oko, pien gin odilo i wi lyel odiko con,

²³naka mom onwoŋo kome. Gin odwogo cen kun okobo ni, omalaika onyutte baŋgi acalo lek, kun kobbigi ni, en gire kwo.

²⁴Jo ocele onwoŋo tye karacel kedwa, gin daŋ owoto i wi lyel, ote nwoŋo tye kit acalo mon okobo-nono, ento mom onene.”

²⁵En te kobbigi ni, “Wun omiŋo, dok owackom i cunywu pi gal ye kop ducu a rik odwarpiny okobo!

²⁶Nwaŋ mom myero Kricito koŋ kany can magi, ete donyo i kwogo mere?”

²⁷Te doŋ niaŋogi i coc a rik ocoo i kome luŋ, geye i kom Muca naka odwarpiny ducu.

²⁸Ka gin onoko ŋet paco a cen gin owot iye-ni, en te nen bala akato akata i wottere i nyim.

²⁹Cite gin odie meicel kun okobo ni, “Bed kedwa, pien piny doŋ ceggi i yuto, ceŋ daŋ doŋ ceggi poto.” Omio en odonyo i ot, obedo kedgi.

³⁰Ka en tye i dog cem karacel kedgi, omako ogati okwao winyo iye, onyinyilo, omiogi.

³¹Waŋgi te yabere, ote ŋeye oko; dok daŋ te rwenyo oko i waŋgi.

³²Gin openyere kengi kengi ni, “Cunywa woki mom opupuka ame en akop kedwa i waŋa yo, kun oyabbiwa coc a rik ocoo?”

³³Gin oya i caa-nono, odok i Jerucalem. Gin onwoŋo jo apar wie acel ca ocokere karacel, kede jo onwoŋo tye baŋgi.

³⁴Jonono te tittigi ni, “Rwot ocer ateteni, onyutte baŋ Cimon!”

³⁵Gin daŋ ote tito gin otimere i waŋayo, kede kite ame gin oŋee kede i kare ame onyinyilo ogati.

³⁶Ka pwod gin otye akobo kop man, Yecu ikome ocuŋ i akinagi, [okobbigi ni, “Kuc obed baŋwu!”]

³⁷Komgi oto tido, gin olworo kun otamo ni oneno tipo.

³⁸Openyogi ni, “Ŋo omio cunywu opoto? Piŋo ipenyere wunu kenwu kenwu i cunywu?

³⁹Koŋ inenu ciŋa i tyena gie, man an ikoma. Mula wunu, inena wunu, pien tipo mom tye kede kom, anaka cogo, i kite acalo ineno wunu an atye kedeni.” [

⁴⁰A doŋ okobo kop man, te nyuttigi ciŋe kede tyene.]

⁴¹A kun mom ru gin oye pi yomcunygi, kun owuro, okobbigi ni, “Itye wunu kede ginnoro me acama kan?”

⁴²Gin omie nucu rec ame obulo,

⁴³en ogamo, ocamo i nyimgi.

⁴⁴Icennere te kobbigi ni, “Mano koppa a ceŋ akobbiwu ame pwod atye kedwu, ni mano, kop luŋ ame ocoo i koma i cik a Muca kede i kop odwarpiny, kede ijabuli myero cobere kakare.”

⁴⁵Oyabo tamgi me gin oniaŋ coc a rik ocoo,

⁴⁶kun okobbigi ni, “Rik ocoo ni mano, Kricito myero koŋ kany can, eka i nino me adek myero cer oko iyi akina jo oto,

⁴⁷dok ni, myero rab kop i nyiŋe i kom ŋut kede weko bal baŋ rok ducu, geye i Jerucalem.

⁴⁸Wun giwu ocaden me kop magi.

⁴⁹Nen, abino cwayo gin ame Pappa ocikere me miyowu; bed wunu i Jerucalem ituno ka orukowu kede teko ame oya i malo.”

⁵⁰Icennere te terogi oko ituno naka Betania, otiŋo ciŋe malo, olamo winyo i komgi.

⁵¹Ka pwod alamo winyo i komgi, opokere oko i baŋgi, otiŋe, otere malo i polo.

⁵²Gin owore, eka ote dwogo i Jerucalem kede lelo adwoŋ,

⁵³orio i ot Obaŋa dikdik kun opwoo Obaŋa.