Read lango Luka 4 Bible Online

Luka 4 - lango bible

Luka 4

¹Yecu odwogo i Jordan a doŋ Cuny Acil opoŋ i yie, Cuny Acil obedo tele i dye tim

²pi nino pyeraŋwen, kun Catan bite, i kare-nu ducu onwoŋo mom camo ginnoro; ka otum, kec oneke.

³Catan okobbe ni, “Ka yin i Wot Obaŋa, koŋ ikobbi gweŋ man lokere dok kwon.”

⁴Yecu te gamo ni, “Yam ocoo ni, ‘Dano mom bino bedo kwo ka i kwon keken.’ ”

⁵Catan te dok tere malo, te nyutte loc luŋ me wi lobo i akina anonokkoro keken,

⁶te kobbe ni, “Abino miyi twer magu ducu, kede kwogo megi, pien otyeko miya, atwero miyo baŋ ŋattoro ame an amito.

⁷Doŋ ba, ka yin iwora, ducu abedo megi.”

⁸Yecu ogamo ni, “Yam ocoo ni, ‘Wor Rwot Obaŋani, iti pi en keken.’ ”

⁹Icennere dok otere i Jerucalem, ocibe i wi atenni ot Obaŋa malo, te kobbe ni, “Ka yin i Wot Obaŋa, koŋ iŋoye irette piny kan,

¹⁰pien yam daŋ ocoo ni, ‘En bino ciko omalaika mere piri, me gwoki,’

¹¹daŋ ni, ‘Gin obino joli i ciŋi, me kur itwom tyeni kede gweŋ.’ ”

¹²Yecu te gamo ni, “Yam okobo ni, ‘Kur iom yi Rwot Obaŋani.’ ”

¹³Ka Catan otyeko bite i yore luŋ, oweke me ekur kare aber.

¹⁴Yecu odwogo i Galilaya i teko a Cuny Acil; pire owinyere i lobo ducu a ceggi i kuno.

¹⁵Opwonyo i kacokeregi, jo luŋ oketo kwogo i kome.

¹⁶Yecu obino i Najaret, kan a rik edoŋo iye, odonyo i kacokere i ceŋ cabit, acalo kite mere me kare luŋ, oya malo ka kwan.

¹⁷Omie buk adwarpiny Icaya. Oyabo buk, te nwoŋo kan a rik ocoo ni.

¹⁸“Rwot doŋ ocwao Cunye i koma, pien en okwera wek arab amut aber baŋ ocan, Oora pi rabbi jo a tye i opii ni obino gonyogi oko, kede baŋ otowaŋ ni obino yabo waŋgi; me agony jo a yam owunogi, owot i kuc;

¹⁹dok arab pi mwaka ame Rwot timo iye jo ber.”

²⁰Owumo buk, odwoko baŋ atic, te bedo gire piny; jo ducu i kacokere waŋgi ocuŋ i kome.

²¹Ocako rabbigi ni, “Coc man tin ocobere kakare, iwinyo wunu i yitwu.”

²²Jo luŋ okobo kop aber i kome, a kun daŋ owuro kop abeco me kica ame oya i doge. Gin te penyere ni “Man mom wot a Yucepu?”

²³En te gamo doggi ni, “An aŋeo atira ni, wun ibino kobba wunu ni, ‘Dakatal caŋere keni; tic a rik owinyo itio i Kapernaum, ti daŋ i paco me turu.’ ”

²⁴Te dok medde kede ni, “Ateni, akobbiwu ni, mom tye adwarpinnyoro ame ojolo i loba me turgi.

²⁵Ento i ateni mere akobbiwu ni, rik tye mon apol i Icrael ame coggi oto i kare Elia, ka kot rik okwero cwe oko pi mwakki adek kede dwete abicel, ame kec atek rik opoto i lobo ducu,

²⁶ento mom ocwao Elia baŋ ŋattoro i akinagi, kono baŋ dako ame cware oto me Jarepat i loba me Cidon.

²⁷Dok daŋ i lobo Icrael rik tye iye odobo apol i kare adwarpiny Erica; ŋattoro ame ocaŋo i akinagi obedo mom, kono ka Naaman, dano me Curia.”

²⁸Jo ecipan ame tye i kacokere, ka owinyo kop man, akemo omakogi atek.

²⁹Gin ote twarre i piny oko, ote tere teŋe i ŋet paco, okele i wi kidi ame gin ogero pacogi i wie, me wek ote core piny oko.

³⁰Ento en okato i akinagi, te wot gire oko.

³¹Yecu owoto i Kapernaum, ame en boma moro me Galilaya; obedo ka pwonyogi i ceŋ cabit.

³²Gin te gano pwonnyere, pien okobo kede twer.

³³I kacokere rik tye iye dano moro a tye i cen arac; en oredo kede dwon aloŋo ni,

³⁴“Eeei, kara ilaro ŋo kedwa, yin Yecu me Najaret? Ibino me tyekowa atyeka bo? An aŋei, yin i ŋat Acil Obaŋa.”

³⁵Ento Yecu te juke ni, “Liŋ iti, ya oko i kome.” Cen arac te reto dano ca piny i nyimgi, oya oko i kome aboŋo timme ginnoro arac.

³⁶Jo ducu owuro kun openyere kengi kengi ni, “Man kop aŋo-nie? Pien en ciko cen areco kede twer kede teko, gin te ya oko.”

³⁷Pire owinyere i kabedo luŋ ame omano kannono.

³⁸Yecu oya te kato oko i kacokere, odonyo i ot a Cimon. Maro a Cimon onwoŋo two, lyeto ociro atek; okwae ni konye.

³⁹En obino ocuŋ i ŋete, ojuko lyeto, lyeto te ket oko i kome; cucuttono oya malo, okonyogi.

⁴⁰Ame cen amito poto, jo luŋ ame tye kede jo a komgi lit, ame toogi papat, okelogi baŋe; oketo ciŋe i kom ŋat acel acel i akinagi, ocaŋogi.

⁴¹Cen areco daŋ oya i kom jo apol, kun oredo ni, “In giri i Wot Obaŋa!” Ento en ojukogi, mom oye ni gin kob kopporo, pien gin ŋeo ni en Kricito.

⁴²Ka piny oru, Yecu owoto kan ame jo mom iye. Lwak obedo yenye, gin te bino baŋe, ote temo gene ni kur ya i baŋgi.

⁴³Ento en okobbigi ni, “Myero an arab amut aber me loc Obaŋa i boma ocele daŋ, pien an oora pi kop man.”

⁴⁴En obedo ka rabo kop ikacokere me Judaya.