Read lango Luka 5 Bible Online

Luka 5 - lango bible

Luka 5

¹Ka rik lwak odiye baŋ Yecu pi winyo kop Obaŋa, onwoŋo en ocuŋ i dog nam me Genecaret.

²Oneno yede aryo i dog nam; ocik rec onwoŋo oya iye oko, otye ka lwoko bwoyigi.

³En te donyo i yee acel ame onwoŋo mea Cimon, okwae ni koŋ ekwaŋ anok i nam. En obedo piny, opwonyo lwak kun en tye i yee.

⁴Ka doŋ otyeko kop, okobo baŋ Cimon ni, “Kwaŋ iwot kan atut, irye wunu bwoyiwu me mak rec.”

⁵Cimon ogamo ni, “Adwoŋ, doŋ ocanne kwe dyewor benebene, mom omako ginnoro, doŋ pi kop ikobonono, koŋ abino ryeyo bwo.”

⁶Ka gin otimo kite-nono, omako lwak rec apol ata, bwoyigi te ero cocota oko.

⁷Ote gweto owotegi a tye i yee ocele ni bin konygi. Gin obino, ote loko rece i yede aryo luŋ opoŋ, doŋ ote cako lwiny oko.

⁸Cimon Petero ka oneno man, oryebere i coŋ Yecu, okobo ni, “Rwot, ape giri okoŋ, pien an dano ame abalo.”

⁹Pien en kede jo ame etye kede owuro pi rec ame gin omako;

¹⁰Yakobo kede Lakana itino a Jebedayo, ame rik ribere i tic gin i Cimon, gin daŋ owuro. Yecu te kobbi Cimon ni, “Kur ilwor; ya amanni ibino coko jo akaka rec.”

¹¹Ka doŋ gin otyeko tero yedegi oko i wi tela, oweko jamigi luŋ, ote lube.

¹²Ka Yecu tye i boma moro, ŋattoro obino ame dobo onwanne i kome. Ka oneno Yecu, oryebere piny, obako doge ni, “Adwoŋ, ka imito, itwero lonya.”

¹³Yecu te ryeyo bade, te gude, kun kobo ni, “Ee, amito; lonyere giri.” Cucuttono dobo te ony i kome oko.

¹⁴Yecu te cike ni pe myero kobbi ŋattoro. Dok te cike ni, “Woti, inyutte keni baŋ alamdog, imi mot pi lonyere meri, acalo rik Muca ociko, me bed anyut baŋgi.”

¹⁵Ento rwoŋe te dok medde winyere atek meicel. Lwak ecipan ocokere ka winyo Yecu, dok me can toogi.

¹⁶Ento en rik pokere oko, woto i tim kakwayo Obaŋa.

¹⁷I nino moro acel Yecu onwoŋo tye apwony, kun Oparicayo kede opwonycik, ame oya i pacci ducu me Galilaya kede Judaya kede Jerucalem, onwoŋo tye i kome.

¹⁸Cucuttono jo te kela dano ame odyelo i tanda, ame two too me akwea kom. Gin omito tere i ot me owot opyele i nyim Yecu,

¹⁹naka mom onwoŋo yo me tere i ot, pi pol a lwak. Ote lunyo yito malo i wi ot, ote cwaye piny i akina mategula kede gibuto mere i dye ot i nyim Yecu,

²⁰Ka en oneno iyeegi, okobo ni, “Lo-ni, balli doŋ oweko oko.”

²¹Opwony-cik kede Oparicayo te ero penyere kengi ni, “Man kara ŋa a kobo kop me yeto Obaŋa-nie? Ŋa ame twero weko bal, kono Obaŋa keken gire?”

²²Ka Yecu oniaŋ i kom penyere megi, te gamo doggi ni, “Pino ipenyere wunu i cunywu?

²³Kara ayottere mene, ka okobo ni, ‘Bali doŋ oweko oko’, onyo ka okobo ni, ‘Ya iwoti?’

²⁴Ento man me miyowu ŋeyo ni, Wot a dano tye kede twer i lobo me weko bal,” en te kobbi lo ame two too akwea kom ni, “An akobbi ni, ya, itiŋ gi-butoni, iwot giri paco.”

²⁵Yotoyot en te cuŋ i nyimgi, otiŋo gin a rik opyele iye, odok paco kun pako Obaŋa.

²⁶Gin ducu owuro atek meicel, daŋ ote pako Obaŋa; gin olworo atek kun okobo ni, “Oneno gin a welo tin.”

²⁷Icennere Yecu te wot oko, dok te neno ara-ocoro ame obedo piny i ka rayo ocoro, nyiŋe Levi; okobbe ni, “Luba.”

²⁸En oweko jami luŋ aluŋa, te ya lubo Yecu.

²⁹Levi otedde arama adwoŋ tuŋe; onwoŋo lwak ora-ocoro apol kede jo ocele daŋ obedo piny i dog cam karacel kedgi.

³⁰Oparicayo kede opwony-cikgi oŋuŋura i kom jo a lubo Yecu kun openyogi ni, “Piŋo icamo dok imato wunu karacel kede ora-ocoro anaka obalo-gu?”

³¹Yecu te gamo doggi ni, “Jo a komgi yot mom mito dakatal, kono jo ame komgi lit.

³²An mom abino me cwano jo ame kitegi atir, ento obalo, me gin ŋut.”

³³Jo mogo te kobbi Yecu ni, “Jo a lubo Lakana maro kanyo kec, kede kwayo Obaŋa, anaka jo a lubo Oparicayo daŋ, ento jo a lubi gin cemo dok mato.”

³⁴Yecu openyogi ni, “Itwero wunu miyo owote a ŋat a nyom kanyo kec a kun en anyom tye baŋgi?

³⁵Kare bino tuno ame obino kwanyo anyom oko i baŋgi, en a mio gin te kanyo kec i kare-nono.”

³⁶Dok te kobbigi carokop ni, “Mom tye dano moro ame yeco dul boŋo i kom boŋo a pwod nyen, eka te dapo dok i kom boŋo ame doŋ oti. Ka ce en otimo kite-nono, bino lunyo yeco en anyen, dok dul boŋo anyen mom bino rwatte kede en oti.

³⁷Dok mom tye dano ame piko koŋo anyen i ocoe acon; ka ce opiko, koŋo anyen bino yeco ocoe, dok bino ony, ocoe daŋ bino baile.

³⁸Ento kono anyen myero pik i ocoe anyen.

³⁹Mom tye dano moro ame, ka omato kono acon, dok yie te gomo en anyennere, pien kobo ni, ‘En aconnere mit wok.’ ”