Read lango Luka 6 Bible Online

Luka 6 - lango bible

Luka 6

¹Ka nwaŋ Yecu woto kun aŋolle i poto bel i nino me cabit, jo a lube te rito wit bel, te ŋinyo i ciŋgi, te mwodo.

²Ento jo mogo i akina Oparicayo te penyo ni, “Kara piŋo itimo wunu gin ame cik okwero ni jo kur ti i ceŋ cabit?”

³Yecu te gamo doggi ni, “Wun ce mom ikwano wunu gin ame Daudi otio ka rik kec oneke, en kede jo a rik tye karacel kede?

⁴Kite ame en odonyo kede i ot Obaŋa, te kwanyo ogati ame oketo i nyim Obaŋa, a yam cik okwero ni dano kur cam, kono ka olamdog keken? En ocamo dok te miyo baŋ jo ame tye karacel kede.”

⁵Te dok kobbigi ni, “Wot a dano en Rwot me cabit.”

⁶I cabit ocele Yecu odonyo i kacokere, opwonyo jo; onwoŋo dano moro tye kuno ame bade tuŋ cem omito.

⁷Opwony-cik kede Oparicayo okie ka ce bino caŋe i ceŋ cabit, me onwoŋ yo me pide.

⁸Cite en te ŋeyo tamgi oko, te kobbi dano a bade omito ni, “Ya icuŋ i dyere.” En oya, te cuŋ.

⁹Yecu te penyogi ni, “I cen cabit, cik ye ni tim iye gin aber onyo gin arac, lar kwo onyo nek aneka?”

¹⁰En oŋoloro waŋe i akinagi ducu, te kobbe ni, “Rye badi oŋ.” En oryeo bade, te can oko.

¹¹Ento akemo omakogi atek, ote poro kop kengi kengi, gin a myero otim i kom Yecu.

¹²I kare-nono Yecu owoto i wi kidi ka kwac iye; obedo ka kwayo Obaŋa dyewor benebene.

¹³Ka piny oru, ocwano jo a lube baŋe, te yero jo apar wie aryo iyi akinagi, te miyogi nyiŋ ni, okwena.

¹⁴Jo-nono ene: Cimon ame ocako nyiŋe Petero, kede Anderiya ominnere, Yakobo kede Lakana, Pilipo kede Bartolomayo.

¹⁵Matayo kede Tomaci, Yakobo wot a Alipayo, Cimon me eryoŋet a jo a pyem i abumente.

¹⁶Juda wot a Yakobo, kede Juda me Keriot, ame ceŋ oketo erupe i kom Yecu.

¹⁷Yecu obino kedgi piny te cuŋ i kabedo opirre, lwak ecipan i akina jo a lube onwoŋo daŋ tye kuno, kede lwak jo ecipan ame oya i Judaya kede i Jerucalem, kede i dog nam me Turo kede Cidon, ame rik gin obino me winyo pwonnyere, dok me can too i komgi.

¹⁸Jo a cen areco wunogi daŋ ocaŋogi.

¹⁹Lwak luŋ otemo gudo kome, pien teko rik oya i kome, te canogi ducu.

²⁰Otiŋo waŋe i kom jo a lube, te kobo ni, “Itye wunu kede winyo, wun ocan, pien loc Obaŋa mewu.

²¹“Itye wunu kede winyo, wun jo a kec nekowu amanni, pien ibino yeŋ wunu. “Itye wunu kede winyo, wun jo a kok amanni, pien ibino nyero wunu.

²²“Itye wunu kede winyo kajo dagwu, ame oryemowu oko i akinagi, kun oŋalowu, kede ka obalo nyinwu oko ni rac, pi Wota dano!

²³Lel wunu i ninono no, kun ipye wunu i yomcuny, pien, nen ba, mot me pwoyowu bup meicel i wi polo; pien kwarigi rik daŋ otimo odwarpiny amannono.

²⁴“Ento ibino wunu neno can, wun olonyo, pien ityeko wunu nwoŋo gin a kweo cunywu oko.

²⁵“Ibino wunu neno can, wun jo ame yeŋ amanni, pien kec bino nekowu. “Ibino wunu neno can, wun jo ame nyero amanni, pien ibino kumo wunu kede koko.

²⁶“Ibino wunu neno can ka jo ducu pwoowu, pien kwarigi rik daŋ otimo odwarpiny ame ogoba amannono.

²⁷“Ento an akobo baŋwu, wun jo a winyo koppa, ni, Mar wunu okworwu, tim wunu ber baŋ jo a dagwu,

²⁸lam wunu winyo i kom jo a cenowu, kwa wunu Obaŋa pi jo a yetowu.

²⁹Dano ame obapo lemi tuŋ cel, lokke tuŋ ocele daŋ obapi; ŋat omao kanyini, kur daŋ itwonne kotini.

³⁰Jo luŋ ame kwai, migi, ŋat ame mao jamini, kur dok ipenye.

³¹Kite ame imito wunu ni jo timwu kede, wun daŋ tim wunugi amannono.

³²“Ka imaro wunu ka jo a marowu, kara ibino nwoŋo wunu iye pwoccene? Pien obalo daŋ maro jo a marogi.

³³Ka itimo wunu gin aber baŋ jo a timowu gin aber, kala ibino nwoŋo wunu iye pwoccene? Pien obalo daŋ timo kittono.

³⁴Dok ka imio wunu banya baŋ jo ame igeno wunu ni twero culliwu, kara ibino nwoŋo wunu iye pwoccene? Obalo daŋ mio banya baŋ obalo wadgi, me gin culgi arorom.

³⁵Ento mar wunu okworwu, tim wunu gin aber, miu banya kun mom igeno wunu ni obino culliwu doki. Mot me pwoyowu bino bedo abup, dok ibino bedo wunu itino a En Amalo Meicel; pien en ber baŋ jo a mom pwoc, kede baŋ jo areco.

³⁶Bed wunu i kica, acalo Papawu en akica.

³⁷“Kur iŋol wunu kop, wun daŋ mom obino ŋolliwu kop. Kur iŋol wunu kop loo jo, wun daŋ mom obino Ŋolo kop loowu. Tim wunu jo kica i balgi, wun daŋ obino timowu kica i balwu.

³⁸Mi wunu, wun daŋ obino miyo baŋwu. Obino pimmiwu i gwata aber, ame odio, ame oyeŋo, ame aony aonya. Pien kit gin ame ipimo wunu kede, en ame daŋ obino pimmiwu kede.”

³⁹En dok te kobbigi carokop ni, “Atowaŋ twero peyo atowaŋ wadgi? Gin aryo luŋ mom bino rette oko i bur?

⁴⁰Ŋat a pwod opwonyo apwonya mom bedo adwoŋ akato ŋat a pwonye; ento dano acel acel ka owok aber, bino bedo bala ŋat opwonye.

⁴¹Piŋo ineno cuŋ kal ame tye i waŋ ominni, aco kono ikoŋ a tye i waŋ i ikomi neno loi oko?

⁴²Itwero kobo ominni niŋo ni, ‘Ominna, wek akwany cuŋ kal i wani-ni oko,’ a kun yin ikomi mom ineno ikoŋ a tye i waŋi? Yin agoba, koŋ ige kwanyo ikoŋ a tye i waŋi, eka ite doŋ neno aber me kwanyo cuŋ kai a tye i waŋ ominni.

⁴³“Pien mom tye yattoro aber ame dok te nyako nyige areco, kadi yat arac ame dok te nyako nyige abeco;

⁴⁴pien yat acel acel ŋeye i kom nyige. Ibuu mom opwono i kom oryaŋ, olok daŋ mom opwono i kom laŋo.

⁴⁵Dano aber kwanyo gin aber i akina jami abeco ame en okano i cunye, dano arac kwanyo gin arac i akina jami areco ame en okano; pien dog dano kobo gin ame opoŋ i cunye.

⁴⁶“Ŋo omio ilwoŋa wunu ni, ‘Rwot, Rwot,’ ame kun mom itio wunu gin ame acikowu iye?

⁴⁷Dano acel acel ame bino baŋa, ame winyo koppa, daŋ te tiyo, abino nyuttiwu ŋat ame en cal kede.

⁴⁸Rom kede dano ame ogero ot, te kunyo atut, ame ocibo acakki te ot i kom lela. Doŋ ka kulo opoŋ, omol kede teko, ocoro ot, ot pe twero yeŋere, pien nwoŋo ogero aber.

⁴⁹Ento ŋat ame winyo koppa kun mom tio, rom aroma kede dano a rik ogero ot i kom lobo aboŋo acakki tere, ame ka kulo omol kede teko, ocore, ot orette oyotoyot; rette a ot-tu obedo dwoŋ atek.”