Read lango Luka 7 Bible Online

Luka 7 - lango bible

Luka 7

¹A doŋ Yecu otyeko koppere ducu ame lwak awinyo, odonyo i Kapernaum.

²Onwoŋo tye adwoŋ cirikale ame rik tye kede opii mere ame emaro meicel, rik kome lit a doŋ ceggi to.

³Ka en owinyo pi Yecu, ooro odoŋe a jo Judaya baŋe kun kwae ni myero bin caŋ opii mere.

⁴A doŋ gin otuno baŋ Yecu, gin obako doggi baŋe atek, kun okobo ni, “En ber, myero itimme man,

⁵pien maro rokwa, daŋ en ame ogero kacokerewa.”

⁶Yecu rik te wot kedgi. Ka en doŋ onoko ceggi i ŋet paco, adwoŋ me cirikale ooro owote mere mogo baŋe kun kobbe ni, “Adwoŋ, kur icanne, pien mom oporre yin idonyo i oda,

⁷daŋ en gin omio atamo ni an mom aromo bino baŋi. Twara ikob ka kop keken, amirona bino caŋ.

⁸Pien an daŋ a dano ame oloo aloa, dok daŋ atye kede cirikale ame aloogi. Ka akobbi moro ni, ‘Woti,’ en woto; onyo moro ocele ni, ‘Biye,’ en bino; dok ka akobo opiina ni, ‘Ti man,’ en tio.”

⁹Yecu ka owinyo kop man owuro meicel, olokere tuŋ baŋ lwak a lube, te kobbigi ni, “Atittiwu ni, pe ru anwoŋo iyee a rom man, kadi i Icrael.”

¹⁰Ka jo ame ooro odwogo paco, gin onwoŋo opii doŋ kome yot.

¹¹Ka kare okato anok, Yecu owoto i paco ame olwoŋo Nain; jo mere a lube kede lwak apol owoto karacel kede.

¹²Ka obino, a doŋ gin ceggi kede dogcel me paco-nu, onen ni jo mogo tye adyello dano oto, otero oko. Dano-ni onwoŋo tottere onywalo en kene, daŋ doŋ en dako a cware oto. Lwak jo apol ame oya i paco-nono onwoŋo tye karacel kede.

¹³Ka Rwot onene, ocone, te kobbe ni, “Kur ikoki.”

¹⁴En obino ogudo alago, jo a tye ka dyelle-nu ocuŋ mot. En okobo ni, “Awobi, akobbi ni, ya malo!”

¹⁵Dano ame oto-nu te ya bedo abeda, daŋ te cako kop oko. Ote miye baŋ tottere.

¹⁶Lworo te mako jo luŋ, ote pako Obaŋa kun okobo ni, “Adwarpiny adwoŋ doŋ onwoŋere i akinawa!” dok ni, “Obaŋa doŋ olimo jo mere!”

¹⁷Kop man ame okobo i kome owinyere i lobo Judaya ducu kede i lobo a cocok i ŋete luŋ.

¹⁸Jo a lubo Lakana otitte kop magi luŋ.

¹⁹Lakana olwoŋo jo aryo i akina jo mere a lube, oorogi baŋ Rwot me penye ni, “Yin dano a bino ca, onyo okur en ocele?”

²⁰Ka jo-nu obino baŋ Yecu, okobbe ni, “Lakana Abatija oorowa baŋi kun penyo ni, ‘Yin dano ame abino ca, onyo okur en ocele?’ ”

²¹I karenono ocaŋo jo apol i kom too kede cen areco, daŋ omio jo apol ame waŋgi oto oneno piny.

²²En odokkigi iye ni, “Wot ikobbi wunu Lakana gin ame ineno wunu kede gin ame iwinyo wunu: otowaŋ waŋgi oyabere, jo oŋwalo owoto, kom odobo olony, jo a yitgi odiŋ owinyo, jo oto ocerogi oko, dok orabbi ocan amut aber.

²³Dano ame tammere mom balle i koma nwoŋo tye kede winyo.”

²⁴Ka jo ame Lakana ooro doŋ otyeko dok, Yecu ocako kop kede lwak kop i kom Lakana ni, “Yam iwoto wunu i tim ka neno ŋo ba? Ka neno ogada a yamo yeŋo bo?

²⁵Kara iwoto wunu ka neno ŋo? Ka neno dano ame ruko boŋŋi abeco? Nenu ba, jo a ruko boŋŋi me kwogo, dok ame bedo kede jami me wek, bedo i pacci oloc.

²⁶Kara doŋ iwoto wunu ka neno ŋo? Ka neno adwarpiny? Ee ta, akobbiwu ni, ŋat ame kato adwarpiny.

²⁷Man en ŋat a rik ocoo pire ni, ‘Nen, acwao aorra i nyimi, ame bino gero yo piri i nyimi.’

²⁸Atittiwu ni, i akina jo ame mon onywalo, mom tye moro ame kato Lakana i dit; ento ŋat atidi meicel i loc Obaŋa dit kato en.”

²⁹Ka gin owinyo kop man, lwak ducu kede ora-ocoro te ye ni Obaŋa kite atir, pien yam gin obatija kede batija mea Lakana.

³⁰Ento Oparicayo kede opwony-cik okwero gin ame Obaŋa oyiko pirgi con, pien mom oye ni batijagi.

³¹Yecu dok te kobo ni, “Kara abino poro jo me kare man kede ŋo? Gin calladi?

³²Gin orom kede itino ame bedo i cuk, ame lwoŋo otino wadgi kun okobo ni, ‘Wan okuttiwu nyamulere, wun mom imyelo wunu; owerriwu wer lyel, wun mom ikok wunu.’

³³“Pien Lakana Abatija doŋ obino kun mom camo kwon, mom mato koŋo, wun ikobo wunu ni, ‘En tye kede cen.’

³⁴Wot a dano obino ame camo dok mato daŋ, wun dok ikobo wunu ni, ‘Nen dano owor kede amero, awot ora-ocoro kede obalo.’

³⁵Ento ryeko Obaŋa nen atir ni tye kakare baŋ jo ogamo luŋ.”

³⁶Ŋattoro i akina Oparicayo ocwane me cem baŋe; en owoto i ot Aparicayo, obedo piny i dog cem.

³⁷Nen, rik tye dako moro ame abalo i paco-nono; ka oŋeo ni Yecu tye ka cem i ot Aparicayo, okelo adomo me moo a ŋwece kur,

³⁸ocuŋ i ŋee a ceggi i tyene kun kok, pig waŋe te ton i tyen Yecu, obedo ka weyo kede yer wie kun noto tyene, wiro kede moo.

³⁹Aparicayo ame olwoŋe, ka oneno, okobo i cunye kene kene ni, “Kono lo-ni obedo adwarpiny, kono oŋeo dako man ame ogude-ni oko, anaka kite, ni en abalo.”

⁴⁰Yecu odokke iye ni, “Cimon, atye kede kop ame amito kobbi.” En ogamo ni, “Apwony, kob to kobbi.” En ogamo ni, “Apwony, kobi.

⁴¹Dano moro ame ami-baŋya onwoŋo rik tye kede jo aryo ame omako banya baŋe; dano acel ocamo banya me ciliŋ[1] mia abic, dano ocele pyerabic.

⁴²Ka culo oloogi, gin aryo ducu ote timogi kica. Kara ŋa i akinagi ame bino mare atek?”

⁴³Cimon odok iye ni, “Atamo ni en ame otimo kica ame banya mere bup.” Yecu te gamo doge ni, “Iŋolo giri kakare.”

⁴⁴Olokere tuŋ baŋ dako, openyo Cimon ni, “Ineno dako man? An adonyo i odi, mom imia pii me lwoko tyena, ento en oweko pig waŋe oton i tyena, oweo kede yer wie.

⁴⁵Yin mom inoto lema, ento cakere ame adonyo i ot, en mom oweko noto tyena.

⁴⁶Yin mom iwiro wia kede moo, ento en owiro tyena kede moo a ŋwece kur.

⁴⁷En gin omio akobo ni, ballere apol wok-ki doŋ oweko oko, pien marrere adwoŋ onyuto; cite dano ame ballere nok ame oweko, marrere daŋ nok.”

⁴⁸Okobbi dako ni, “Balli doŋ oweko oko.”

⁴⁹Jo ame obedo kede i dog cem te cako penyere kengi kengi ni, “Kara man ŋa ame weko bal-li?”

⁵⁰Okobbi dako ni, “Iyeeni olari; wot giri i kuc.”