Read lango Luka 8 Bible Online

Luka 8 - lango bible

Luka 8

¹Ka kare okato anok, owoto i boma apapat kede pacci atino kun tito kop, dok rabo amut aber me loc Obaŋa. Jo mere apar wie aryo onwoŋo tye kede,

²karacel kede monnogo a rik ecanogi i cen areco kede too: Maliam ame olwoŋo ni me Magdala, ame cen abiro cen oya i kome;

³Yoanna cik a Kuja, agwokjami a Kerode; Cucanna, kede mon ocele apol. Mon magi yam konyogi kede limgi.

⁴Ka lwak jo ecipan ocokere karacel, kun jo bino baŋe oya i boma apol, en okobo i carokop ni,

⁵“Lo moro rik owoto ka coyo koti mere. Ame en tye ka coc, koti mogo okir i dye yo, jo onyono oko, winy a twarre malo obino odepo oko.

⁶Mogo okir i lela; odoŋo, te two oko, pien pii mom i tere.

⁷Mogo te kir i akina okuto; okuto odoŋo karacel kede odie.

⁸Mogo te kir gigi i lobo aber, odoŋo, tyene acel acel ocek iye nyige mia acel.” Ka doŋ okobo kop man kede teko ni, “Ŋat a tye i yit me winyo, myero winy!”

⁹Jo mere a lube openye te kop me carokop man.

¹⁰En ogamo ni, “Wun omiowu ŋeyo muŋ me loc Obaŋa, ento jo ocele omiogi i carokop, me bed acalo rik ocoo, ni ka gin oneno, kur onen, dok ka gin owinyo, kur oniaŋ tere.

¹¹“Carokop-pi tere en: Koti en kop Obaŋa.

¹²Gin ame i dye yo, gin jo ame winyo, icennere Catan bino, te kwanyo kop i cunygi oko, me kur gin oye dok olarre.

¹³Gin ame i lela, gin jo ame ka owinyo, ogamo kop kede yomcuny, ento mom otye kede lwitgi, ye megi tye pi kare anok, ento i kare ame obitogi, gin poto oko.

¹⁴Gin ame okir i akina okuto, gin jo ame winyo, ento ka gin omedde kede kwo megi, par apol, lonyo kede yomcuny me kwo man diogi, nyiggi mom cek aber.

¹⁵Gin ame i lobo aber, gin jo ame ka owinyo kop, olido atek kede cuny aber, ame genne, onyako nyiggi kun odio cunygi.

¹⁶“Mom tye ŋattoro ame cwinyo tara te dok wumo oko kede gulu, aŋar keto i te tanda, ento keto malo i wi gol, me jo ame bino i ot nen lero mere.

¹⁷Pien mom tye ginnoro ame okano ame mom bino nen kannaler, dok mom tye ginnoro ame owumo ame mom bino ŋeye, dok ame mom obino yabo kannaler.

¹⁸Gwokere wunu i kom kite ame iwinyo wunu kede; pien ŋat a mere tye, obino medde, ŋat a mere mom, obino gamo i baŋe gin ame en tamo ni mege.”

¹⁹Tottere kede omego mere obino baŋe, cite pi lwak mom otwero tuno baŋe.

²⁰Jo te titte ni, “Totti kede omegoni ocuŋ oko, gin mito neni.”

²¹Ento en odokkigi iye ni, “Totta kede omegona gin jo ame winyo kop Obaŋa, dok oketo i tic.”

²²I nino moro acel en odonyo i yee karacel kede jo mere a lube, okobbigi ni, “Koŋ okat wunu loka nam tuŋ ca,” gin ote cako wot.

²³Ame doŋ otye ka kwaŋ, en te nino oko, yamo te cako kodo atek i dye nam, pii daŋ te ero poŋ oko iyi yee, onwoŋo doŋ gin otye arac.

²⁴Gin obino baŋe ote coye oko kun okobo ni, “Adwoŋ, Adwoŋ, oto oko!” En te co oko, daŋ te juko yamo kede pii a tagere, te kwe, nam daŋ te liŋ oko.

²⁵Openyogi ni, “Iyeewu tye kwene?” Lworo omakogi kun owuro, ame openyere kengi kengi ni, “Man kara ŋa, ame ciko yamo kede pii-gu, gin te winye-nie?”

²⁶Gin te bino i lobo a jo Geraca ame otemere kede Galilaya.

²⁷Ka okato i wi tela, dano moro me paco-nu orwatte kede ame won cen areco. Onwoŋo doŋ ori kare alac a kun mom ruko boŋo i kome; pe bedo i ot, bedo i ka lyele.

²⁸Ka en oneno Yecu, oredo, te ryebere i nyime, te kop kede dwon aloŋo ni, “Yecu, Wot Obaŋa Amalo Meicel, kara ilaro ŋo keda? Abako doga baŋi, kur iwuna.”

²⁹Pien onwoŋo ociko cen arac ni ya oko i kom dano-nu. Tyen apol onwoŋo dwogo i kome, obedo ka gwoke agwoka kun otwee kede jegere kede nyony; en rik turo gin ame otwee kede oko, cen tere i tim.

³⁰Yecu openye ni, “Yin nyiŋi ŋa?” Te gamo ni, “Mony[2]”, pien lwak cen apol tye i keme.

³¹Gin te bako doggi baŋe ni kur cikgi owot i bur ame agikki tere mom.

³²Lwak puno ecipan onwoŋo tye ka cem i kor kidi kuno. Gin ote bako doggi baŋe ni oye wek gin odony i punni; oyegi.

³³Cen te ya oko i kom dano-nu, te pikere i punni; lwak puno obelle i ŋwec i kor kidi, ote mwonyere oko iyi nam.

³⁴Okwat ka oneno gin otimere, ote riŋo oko, otero koppere i boma kede i akina pacci.

³⁵Jo te ciro wot neno gin ame otimere. Gin te bino baŋ Yecu, ote nwoŋo dano ame cen areco oya i kome obedo piny i ŋet Yecu, orukere i boŋŋi, wie odoko aber; lworo omakogi.

³⁶Jo ame oneno otito baŋgi kit ame dano a yam tye kede cen areco doŋ ocaŋ.

³⁷Jo ducu ame bedo i lobo a jo Geraca acocok okwae ni myero ya oko i baŋgi, pien lworo onwoŋo omakogi meicel; omio en odonyo i yee, odok cen.

³⁸Dano ame cen oya i kome obako doge ni ber ebed doŋ baŋe: ento en ocwae kun ci ke ni,

³⁹“Dok paco, irab pi gin adit ame Obaŋa otimo i komi.” En owoto kun rabo i dye boma-nono luŋ gin adit ame Yecu otimo i kome.

⁴⁰Ka Yecu odwogo, lwak ojole kede yomcuny, pien onwoŋo gin luŋ otye ka kure.

⁴¹Dano moro a nyiŋe Yairo obino; en rik obedo adwoŋ a loo kacokere. Oryebere piny i te tyen Yecu, obako doge baŋe ni wot i ode,

⁴²pien rik tye kede nyare ame onywalo acel keken, onwoŋo adedera, mwaka me dittere bwot romo apar wie aryo. Ka en tye ka wot, lwak odie.

⁴³Dako moro onwoŋo tye kuno a rik otwo too me kwer remo mwakki apar wie aryo, ame doŋ obalo limmere ducu baŋ dakatal, naka pe tye ŋattoro ame twero caŋo.

⁴⁴Obino i tuŋ ŋec, te gudo boŋo mere; cucuttono remo mere ame cwer te cok oko.

⁴⁵Yecu openyo ni, “Kara ŋa oguda-nie?” Ka jo ducu okwero, Petero kede jo ame tye karacel kede ogamo ni, “Adwoŋ, itye i dye lwak, jo tye adiyi.”

⁴⁶Ento Yecu ogamo ni, “Ŋattoro gire oguda, pien awinyo teko moro oya i koma.”

⁴⁷Dako ka oneno ni mom etwero pono, obino ame kome myel amyela, te ryebere i nyime, otito i nyim lwak ducu gin omio egudo, anaka kite ame ecan kede cutocuto.

⁴⁸Yecu te kobo ni, “Nyara, iyeeni ocaŋi oko; wot giri i kuc.”

⁴⁹Ame en pwod tye ka kop, dano obino ame oya i paco adwoŋ me kacokere, ote kobo ni, “Nyari doŋ oto oko; kur dok imedde cano apwony.”

⁵⁰Ento Yecu ka owinyo, okobo ni, “Kur ilwor; ye ayea keken, en bino caŋ gire.”

⁵¹Ka en odonyo i ot, mom oye ni dano dony kede i ot, kono ka Petero kede Lakana kede Yakobo, kede papa atin kede tottere keken.

⁵²Jo luŋ onwoŋo tye akokko kun okumo pire; ento Yecu okobo ni, “Weku koko obedi, pien nya-nu mom oto gire, ento onino anina.”

⁵³Gin onyere atek meicel, pien gin oŋeo ni doŋ oto oko.

⁵⁴En omako ciŋe olwoŋe ni, “Atin, ya malo.”

⁵⁵Cunye te dwogo oko, oya malo cutocuto; Yecu te ciko ni mie cem.

⁵⁶Jo onywale owuro meicel; ento en ocikogi atek ni kur otit gin ame otimere baŋ dano moro.