Read lango Luka 9 Bible Online

Luka 9 - lango bible

Luka 9

¹Olwoŋo jo mere apar wie aryo karacel, te miyogi teko kede twer i kom cen ducu, anaka me caŋo two,

²oorogi ka rabo kop me loc Obaŋa, kede me caŋo jo.

³En okobbigi ni, “I wotwu-ni, kur iter wunu ginnoro, kadi abiro, kadi cao, kadi cem, kadi lim; dok daŋ kur ibed wunu kede kanyi aryo.

⁴Ot ame idonyo wunu iye, bed wunu iye ituno ka ibino ya wunu i kuno.

⁵Kan a mom ojolowu iye, ka iya wunu i boma-nono, ten wunu apua tyenwu me bed caden baŋgi.”

⁶Gin oya te wot i akina pacci, ote rabo amut aber, kun ocaŋo otwo i kabedo ducu.

⁷Kerode ame aloc owinyo gin ducu ame obedo ka timere, okalo akala meicel, pien jo mogo kobo ni, “Lakana Abatija doŋ ocero gire oko iyi akina jo oto.”

⁸Jo ocele ni, “Elia doŋ onen”; jo ocele ni, “Ŋat acel i akina odwarpiny acon doŋ ocer.”

⁹Kerode okobo ni, “Lakana doŋ atyeko toŋo wie oko do; kara man ŋa ame awinyo kop acalo magi i komenie?” En oyenyo yo me nene.

¹⁰Ka okwena odwogo, gin otitte gin ame gin otio. En oterogi owoto kedgi i paco ame olwoŋo ni Betecaida, i muŋ.

¹¹Ka lwak owinyo, olube; en ojologi, orabbigi kop me loc Obaŋa, ocaŋo jo ame komgi lit.

¹²Ame piny amito yuto, jo mere apar wie aryo obino baŋe, okobbe ni, “Cwa lwak wot i akina myere kede i akina pacci ame ceggiceggi, oyeny kabuto kede cem; pien otye kan i dye tim.”

¹³En te gamo ni, “Wun mi wunugi cem.” Gin te gamo ni, “Wan otye kede ogati abic kede rece aryo keken, kwanyo ka ce imito ni owot owil pi lwak magi luŋ.”

¹⁴Pien co rik mito romo tutumia abic. En te ciko jo mere a lube ni, “Miugi obed piny awu awu, awu acel acel jo pyerabic pyerabic.”

¹⁵Gin te timo amannono, ote miyo jo luŋ bedo piny.

¹⁶Omako ogati abic kede rece aryo-nu, oneno malo i polo, okwao iye winyo, onyinyilo omio baŋ jo a lube me gin ket i nyim lwak.

¹⁷Gin ducu ocamo, oyeŋ. Ote coko ŋide cem ame oloogi, oromo aditti apar wie aryo.

¹⁸Ka rik en tye akwac kene, a kun jo a lube tye karacel kede, en openyogi ni, “Kara lwak kobo ni an ŋa?”

¹⁹Gin ogamo ni, “Lakana Abatija; ento jo mogo ni, Elia; jo ocele ni, ‘ŋat acel i akina odwarpiny acon doŋ ocer.’ ”

²⁰Te dok penyogi ni, “Kara wun kono, ikobo wunu ni an ŋa?” Petero te gamo ni, “Yin Kricito Obaŋa.”

²¹En ocikogi atek ni mom myero otit baŋ dano moro.

²²Dok okobo ni, “Wot a dano myero kany can apol, dok odoŋe kede olamdog adoŋo kede opwony-cik myero kwere, neke, ento i nino me adek myero cere oko,”

²³Dok okobo baŋ jo luŋ ni, “Ka dano moro mito luba, myero koŋ oge kwerre kene, tiŋ yataria mere nino i nino, luba.

²⁴Pien dano ame mito laro kwo mere, bino rwenyo kwo mere arwenya, ento dano ame rwenyo kwo mere pira, bino laro.

²⁵Kara konyo dano kede ŋo ka ocamo lobo luŋ, kun kwo mere orwenyo onyo omao oko?

²⁶Dano ame lewic bino make pira kede pi kop mera, Wot a dano daŋ lewic bino make i kome i kare a en bino dwogo iye kede kwogo mere, kede kwogo Obaŋa Papo kede me omalaika acil.

²⁷Ento akobbiwu ateni ni, tye jo mogo ame ocuŋ kan ame mom bino bilo to, a mom ru oneno loc Obaŋa.”

²⁸Ka cabit acel okato a doŋ okobo kop magi, otero Petero kede Lakana kede Yakobo, oyito kedgi i wi kidi me kwayo Obaŋa.

²⁹Ame doŋ tye ka kwayo Obaŋa, nen me waŋe te lokere apat, rukkere te lokere atar ame ryeny aryenya.

³⁰Jo aryo te nen ame tye ka kop kede; jo-ni ceŋ gin Muca kede Elia,

³¹ame gin onen kun otye kede kwogo, okobo pi to mere ame ebino cobo kede tic Obaŋa i Jerucalem.

³²Petero kede jo ame tye karacel kede onwoŋo nino doŋ onuro waŋgi atek, ento ka gin oco, oneno kwogo a Yecu, kede jo aryo ame ocuŋ karacel kede.

³³A doŋ jo aryo-nu amito ya oko i baŋe, Petero okobbi Yecu ni, “Adwoŋ, ber meicel wan ibedo kano Wek oger gonye adek, acel meri, acel mea Muca, acel mea Elia,” daŋ onwoŋo mom aŋeyo gin ame en akobbo.

³⁴Ka en pwod tye ka kop, tipo pol obino owumogi, lworo ocirogi oko me donyo i pol.

³⁵Dwonnoro oya i polo kun kobo ni, “Man en Woda a doŋ ayero; winye wunu.”

³⁶Ame doŋ dwon-nu owinyere, onen ni Yecu odoŋ kene. Gin ote doŋ liŋ aliŋa, mom otito kopporo baŋ jo i kom gin ame gin oneno.

³⁷Orwo mere a doŋ gin oyitto piny i wi kidi, lwak ecipan orwatte kede.

³⁸Dano moro acel i akina lwak te redo ni, “Apwony, abako doga baŋi inen woda-ni, pien anywale en acel keken.

³⁹Nen, cen bedo make, mie kok oyotoyot; ryee, kelo bwoo i doge, mom ya i kome piopio, nyoŋo kome atek.

⁴⁰Woki abako doga baŋ jo meri a lubi ni gin oryem, ryemo oloogi oko.”

⁴¹Yecu ogamo ni, “Wun lwagi jo ame iyeewu mom, kitewu doŋ oballe oko; kara abino bedo kedwu naka awene? Abino diyo cunya i komwu ituno awene? Kel wodi kan.”

⁴²Ame en abino, cen odole piny, omie oryeryea atek. Yecu te juko cen arac oko, ocaŋo awobi, te dwoko baŋ pappere.

⁴³Jo luŋ ogano dit Obaŋa. Ka pwod otye ka wuro gin ducu ame en otio, en okobo baŋ jo mere a lube ni,

⁴⁴“Mi wunu kop man dony i yitwu; pien Wot a dano obino miye i ciŋ jo.”

⁴⁵Ento gin mom oniaŋ i kop man, rik okano oko i tuŋ baŋgi me kur oŋe tere; gin olworo penye pi kop-pu.

⁴⁶Pyem rik obedo i akinagi ni, ŋa i akinagi ame loo kede dit?

⁴⁷Yecu ka oŋeo pyem i cunygi, otero atin, omio ocuŋ i ŋete,

⁴⁸okobbigi ni, “Dano ame jolo atin man i nyiŋa, nwoŋo ojolo an; dano ame jola, nwoŋo ojolo ŋat ame oora; pien ŋat ame tidi meicel i akinawu ducu, en ŋat ame dit.”

⁴⁹Lakana ogamo ni, “Adwoŋ, oneno ŋattoro ame aryemo cen kede nyiŋi, ojuke, pien mom lubi karacel kedwa.”

⁵⁰Ento Yecu okobbe ni, “Kur ijuke wunu, pien ŋat a mom akworwu tye tuŋ baŋwu.”

⁵¹Ka kare doŋ mito romo me tiŋe malo i polo, waŋe ocuŋ atek me wot i Jerucalem.

⁵²Ooro jo ame okwoŋo nyime; gin te wot donyo i paco moro mea jo Camaria pi yikke kabedo.

⁵³Ento mom ote jole, pien waŋe okemo tuŋ Jerucalem.

⁵⁴Ka Yakobo kede Lakana oneno, ame gin jo mere a lube, gin okobo ni, “Rwot, omito ocik mac ya i polo me tyekgi oko?”

⁵⁵Ento en olokere, ojukogi [kun kobo ni, “Mom iŋeo wunu kit cuny ame itye wunu kede; pien Wot a dano mom obino me tyeko kwo a jo, ento me larogi.”]

⁵⁶Gin te wot i paco ocele.

⁵⁷Ame otye ka wot iyo, ŋattoro te kobbe ni, “An abino lubi i kan ame ibino wot iye luŋ.”

⁵⁸Yecu odok iye ni, “Ekwe tye kede gorogorogi, winyi daŋ tye kede udigi, ento Wot a dano mom tye kede kan ame epyelo iye wie.”

⁵⁹Okobo baŋ dano ocele ni, “Luba.” Ento en okobbe ni, “Koŋ iweka awot ayik pappa.”

⁶⁰Ento Yecu ogamo doge ni, “Wek jo oto yik jo oto wadgi, ento yin woti, irab kop me loc Obaŋa.”

⁶¹Dano ocele okobo ni, “Abino lubi, Adwoŋ; ento koŋ iwek awoti, acik jo i oda.”

⁶²Yecu okobbe ni, “Mom tye dano moro ame mako kweri dyaŋ, dok neno ŋec, ame bino porre i loc Obaŋa.”