Read lango Lodo Cik 1 Bible Online

Lodo Cik 1 - lango bible

Lodo Cik 1

¹Man en kop a Muca rik otito baŋ jo Icrael luŋ iŋe Jordan i tim, iyi Araba ame otikere i Cup, ame tye i akina Paran kede Topel, Laban, Kajerot kede Di-jaab,

²Ya i Koreb wot i Kadecbarnea ka ilubo yo abeo i lobo obedo kidikidi me Ceir, onwoŋe romo wot me nino apar wie acel.

³I nino dwe acel me dwe me apar wie acel me mwaka me pyeraŋwennere, en ame Muca otitti jo Icrael cik luŋ ame Rwot rik ociko ni ekobbigi,

⁴Man en okobo i kare ame doŋ otyeko loyo Cikon abaka a jo Amor ame rik tye onwoŋo bedo i Kecbon, karacel kede Og abaka me Bacan ame rik onwoŋo bedo i Aciterot, kun loogi i lweny ame obedo i Edrei.

⁵I Moab loka Jordan, Muca omiye me gonyo te cik man kun kobo ni,

⁶“Rwot Obaŋawa rik okobo kedwa i Koreb ni ‘Doŋ ityeko bedo wunu ite kidi man pi kare alac meicel;

⁷lokere wunu, icak wunu wotwu, idok wunu tutuŋ lobo obedo kidikidi mea jo Amor, kede jo luŋ ame ceggi kedgi, ame tye i Araba, i lobo otiŋere malo kede en a tye i te kidi, i Negeb kede i lobo ame omano dog nam, i lobo ajo Kanaan kede i Lebanon, tuno naka i kulo adwoŋ, ame en kulo Eufrate.

⁸Nen ba, doŋ atyeko keto lobo ame Rwot rik okwoŋo baŋ kwariwu Iburaim, Icaka, kede Yakobo, ni ebino miyo baŋ ikwae ame bino lubo ŋegi.’

⁹“I kare-naca rik okobbiwu ni, ‘An gira mom aromo yeyo pekowu an kena;

¹⁰Rwot obaŋawu doŋ omiowu inya wunu atek, ame omiowu aman doŋ ipol wunu calo acer ame tye i polo.

¹¹Myero doŋ Rwot ame obedo Obaŋa a kwarowu, omi imedde wunu apol kite a rik ociko kede.

¹²Kara doŋ atwero yeyo pekowu kena niŋo kun doŋ idoko wunu yec apek meicel, karacel kede pyem ame tye i akinawu?

¹³Yer wunu jo aryek, jo aniaŋ, dok ame tye i ŋec aromo, kun lubo kite ame atekerewu tye kede, an abino ketogi bedo odoŋe ame loowu.’

¹⁴Wun rikite dokka wunu iye ni, ‘Gin ame ikobo ni wan oti-nono gire ber, myero oti.’

¹⁵Rik daŋ ate kwanyo odoŋe a loo itekerewu, jo a ryek a dok daŋ tye i ŋec oromo, ate ketogi me loyowu, odoŋe ame loo jo tutumia, odoŋe ame loo jo mia, odoŋe ame loo jo pyerabic kede odoŋe a loo jo tomon, karacel kede kite otel ocele i atekerewu luŋ.

¹⁶I kare-nono rik ate ciko oŋolkopwu ni, ‘Winy wunu pido ame tye i akina omegowu, eka ite daŋ ŋolo wunu atira i akina dano kede ominnere, onyo kede arokkoro ame bedo baŋe.

¹⁷Kur ileŋere wunu i ŋolokop; ibino winyo wunu kop a ŋat atidi kede me a ŋat adwoŋ daŋ; mom ibino wunu lworo waŋ ŋattoro, pien ŋolo kop obedo me Obaŋa. Ka ce inwoŋo wunu ni kopporo tekkiwu, ibino kela wunu baŋa, an abino winyo.’

¹⁸I kare-naca rik acikowu i ginnoro luŋ ame myero i tim wunu.

¹⁹“Doŋ kite a rik Rwot Obaŋawa ocikowa kede, omio wan ocako wotwa me ya oko i Koreb, ote wot coro yi dye twon tim alac kod iyiliyili ame rik ineno wunu, ame owoto i lobo a jo Amor ame obedo kidikidi, eka ote tuno i Kadec-barnea.

²⁰An rik ate kobbiwu ni, ‘Wun doŋ ituno wunu i lobo a jo Amor ame obedo kidikidi, ame Rwot Obaŋawa amiyowa.

²¹Nen ba, Rwot Obaŋawu doŋ otyeko keto lobonono oko i nyimwu; wot wunu iye me iwot igam wunu bed megwu. Kite ame Rwot okobbiwu, Rwot ame obedo Obaŋa a kwarowu. Kur ilwor wunu dok cunywu daŋ kur poti.’

²²Wun luŋ rik inoka wunu ceggi, eka ite kobo wunu ni, ‘Wek ocwa wunu jo wot i nyimwa, me wek gin wot rottiwa lobo-naca, eka gin te dwoggiwa kop i kom yo a myero olub me wot malo kuno, kede i kom boma ame obino bebea iye.’

²³An rik ate neno ni tammono ber, omio rik ate kwanyo jo apar wie aryo i akinawu, kun akwanyo dano acel i atekere acel acel.

²⁴Jo-nono rik te ya wot malo i lobo obedo kidikidi, ote tuno naka i luŋ me Ecikol, ote roto lobo-nono luŋ.

²⁵Gin rik ote kwanyo nyig yennogo me lobo-naca ote mako i ciŋgi, ote kela naka baŋwa, ote daŋ dwoggiwa kop kun okobo ni, ‘Lobo ame Rwot Obaŋawa amiyowa-nono obedo lobo aber.’

²⁶“Cite wun rik mom iye wunu wot malo kuno, kun ijem wunu i kom gin ame Rwot Obaŋawu ociko,

²⁷Rik daŋ ite ŋuŋura i kemawu kun ikobo wunu ni, ‘Pien Rwot dagowa, en omio en okwanyowa i lobo me Miciri, me wek ebin emiwa i ciŋ jo Amor, me tyekowa oko.

²⁸Kara doŋ kit lobo aŋo ame wan owot iye? Omegowa rikomio koyo onyere i komwa pi kobo ni, “Jo-nono doŋodoŋo, dok obocoboco okatowa oko; bomagi daŋ doŋodoŋo kun daŋ ocecelo oko atek, ame wigi tye malo naka i polo twal; dok daŋ oneno jo Anak kuno”.’

²⁹An rik ate kobbiwu ni, ‘Kur inyobere wunu, akadi bedo i lworo moro i komgi.

³⁰Rwot Obaŋawu ame tye ka telo nyimwu en ame bino lweny pirwu, kite en obedo lweny kede pirwu i Miciri kun ineno wunu,

³¹karacel kede i tim daŋ, kan ame ineno wunu iye kite ame Rwot Obaŋawu otiŋowu kede, kite ame dano tiŋo kede wode, obedo timo kittono i kabedo luŋ ame iwoto wunu iye, naka tuno kede i kabedo man,’

³²Cite kadi bed rik akobbiwu kittono wun giwu ikwero wunu geno Rwot Obaŋawu,

³³ame onwoŋo obedo telowu i yo me yenyo kan a myero igur wunu kemawu iye. En obedo telowu i mac dyewor kede pol dyeceŋ, me nyuttiwu yo me wotwu.

³⁴“Kare ame Rwot rik owinyo kop ame ikobo wunu, akemo omako, omio te kwoŋ ni,

³⁵‘Mom tye ŋattoro i akina lwagi jo man areco-ni ame bino neno lobo aber ame rik akwoŋo ni abino miyo baŋ kwariwu,

³⁶kono ka Kaleb wot a Jepune keken. En bino neno, dok daŋ abino miyo lobo ame yam tyene onyono baŋe kede baŋ itino mere, pien en obedo lubo Rwot iyore ducu.’

³⁷Akemo rik daŋ te mako Rwot naka i koma pirwu, eka te kobo ni, ‘Akadi yin daŋ mom ibino tuno i lobo-naca.

³⁸Yocwa wot a Nuni ame konyi bino tuno iye; yin myero imi cunye bed tek, pien en bino miyo jo Icrael gamo lobo-naca me bedo megi.

³⁹Itino ame wun ikobo wunu ni bino doko gin ame okworwu bino yako, itino ame aman mom romo poko gin aber kede gin arac, gin en ame bino wot kuno; abino miyo lobo-naca baŋgi, eka te bedo megi.

⁴⁰Aco wun, lokere iwot wunu i dye tim tutuŋ Nam Arema.’

⁴¹“Wun rikite gamo wunu doga ni, ‘Wan doŋ otyeko balo baŋ Rwot, obino wot lweny kite ame Rwot Obaŋawa ocikowa kede.’ Ŋat acel acel rik te tweye i jami mere me lweny kun tamo ni bedo yot me wot kwaro lobo obedo kidikidi.

⁴²Ento Rwot rik te kobbe ni, ‘Kob baŋgi ni, Mom ibino wot wunu kuno, dok daŋ mom ibino lweny wunu, pien an mom abino wot kedwu i akinawu; mannono bino miyo okworwu loowu oko.

⁴³Man en gin ame rik akobbiwu, cite wun giwu rikite jem wunu, kun ikwero wunu winyo gin ame Rwot ociko oko; rikite nwette wunu wot kwaro lobo obedo kidikidi.

⁴⁴Jo Amor ame onwoŋo bedo i lobo obedo kidikidi kuno te bino i komwu, ote ryemowu calo kic, ote keketowu oko i Ceir tuno kede naka i Korma.

⁴⁵Rik ibin idwogo wunu, ite bino kok wunu i nyim Rwot; cite Rwot mom daŋ te winyo kokowu, te daŋ kwero ciko yite oko i kopwu.

⁴⁶Mannono te miyowu bedo ri i Kadec pi kare alac meicel.