Read lango Lodo Cik 10 Bible Online

Lodo Cik 10 - lango bible

Lodo Cik 10

¹“I kare-nono Rwot te kobbi Muca ni, ‘Muk dok kiddi apada aryo, tyeŋgi obed ame calli mega me agege ca, ite bino baŋa malo i wi kidi. Ti daŋ canduk me bao.

²Abino coyo i komgi kop ame rik koŋ aco i kom kiddi apada me agege ca, ame rik iŋiŋido oko ca, eka ite ketogi i canduk.’

³An daŋ rik ate tiyo canduk, kun atio i bao okuto alwii, ate daŋ muko kiddi apada aryo, ate daŋ tyeŋo ame rom aroma i maca acon ca, ate doŋ yito malo i wi kidi kun amakogi i ciŋa.

⁴Rwot te coyo kiddi apada aryo-nono, kite a rik koŋ ogeo coyo kede, gin cik apar ame rik en okobo baŋwu; Rwot rik te miyogi baŋa.

⁵I ŋe mannono, an doŋ ate dwogo oko piny i wi kidi, ate keto kiddi apada aryo i canduk ame rik atio ca, kite ame Rwot onwoŋo ocika kede; gin tye iye kuno.”

⁶(Jo Icrael rik te ya oko i Beerot bene-jakan, ote tuno Mocera. Aron rik te to kuno, ote yiko daŋ kuno; wode Eleajar te leyo kakare i tiyo tic me alamdog.

⁷Gin te ya i kuno, ote wot tuno i Gudgoda, ote wot Jotbata, ame en lobo ame tye iye kulo apipim ame pii opoŋ yigi.

⁸I kare-nono en ame Rwot rik te cako poko iye atekere a jo Levi pat, gin te bedo otiŋ canduk me cikere a Rwot, kun ocuŋ i nyim Rwot me tiyo tic a Rwot, kede lamo gum kun otio kede nyiŋe, kite ame tye kede naka i kare man.

⁹Man en gin omio jo Levi mom tye kede dul lobo moro ame obedo megi i akina omegogi; Rwot en ame obedo gin ame gin onwoŋo me bedo megi kite ame Rwot Obaŋawu rik ociko baŋgi.)

¹⁰“An rik ate ri i wi kidi pi nino pyeraŋwen, iceŋ kede iwor, kite ame abedo kede i me agege ca, Rwot rik daŋ te dok winyo kwacca i kare-nono, Rwot doŋ te weko tam me tyekowu oko.

¹¹Rwot te kobba ni, ‘Ya doŋ oko, imedde wunu i wotwu kun yin itelo nyim lwak, me gin wot dony i lobo ame rik akwoŋo pire baŋ kwarigi ni abino miyogi, owot ogam bed megi’.

¹²“Aman doŋ ba, yin Icrael, ŋo kara ame Rwot Obaŋani mito i baŋi? Man keken ni, Myero ilwor Rwot Obaŋani, ilub yo mere luŋ, imare, kun itio baŋ Rwot Obaŋani i cunyi ducu kede tiponi ducu,

¹³dok daŋ imako cikkere kede icwillere luŋ, ame tin acikowu kede, me wek ibed wunu aber.

¹⁴Nen ba, polo luŋ aluŋa me a Rwot Obaŋawu, karacel kede lobo, kede jami ducu a tye iye.

¹⁵Kadi bed amannono, en rik oketo cunye i kom kwariwu, omarogi, te yero ikwaegi ame olubo ŋegi, ame gin obedo wun, i akina rok luŋ, kite ame itye wunu kede naka tin.

¹⁶Pi mannono, wek wunu doŋ bedo jo ame ŋutgi nwaŋ, lirre wunu doŋ i cunywu, imak wunu cikere mere luŋ.

¹⁷Pien Rwot Obaŋawu en Obaŋa ame loo kit obaŋe ocele luŋ, en Rwot a rwode ducu, en Obaŋa ame dwon, ame tek dok daŋ iyiliyili meicel; Obaŋa a mom leŋere i ŋolo koppere, a mom owilo kede lim.

¹⁸En ŋolo kop atira i kom atin kic kede i kom dako a cware oto; dok en nyuto marrere baŋ arok dok mie daŋ cam kede ruk.

¹⁹Wun daŋ myero imar wunu orok ame bedo i akinawu, pien wun daŋ rik ibedo wunu orok i Miciri.

²⁰“Myero ilwor Rwot Obaŋani, iti baŋe, dok imok daŋ i kome, kun ikwoŋo daŋ kede nyiŋe keken.

²¹En Obaŋa ame myero ipak wunu, pien en a rik otimo pirwu twoni jami mogo adoŋodoŋo, dok daŋ iyiliyili, ame ineno wunu kede waŋwu.

²²Kwariwu rik welgi romo ka pyerabiro keken i kare ame gin woto i Miciri, cite aman Rwot Obaŋawu doŋ omio ipol wunu meicel acalo lwak acer apipim ame tye i polo.