Read lango Lodo Cik 11 Bible Online

Lodo Cik 11 - lango bible

Lodo Cik 11

¹“Pi mannono, myero imar Rwot Obaŋani, ilub gin a en ociko, icwillere kede cikkere luŋ i kare ducu.

²Koŋ tin doŋ itam wunu pwony ame Rwot Obaŋawu opwonyowu kede, pien an mom atye ka kop itinowu ame yam mom oŋeo dok daŋ mom oneno. Tam wunu pi dittere, ciŋe atek, kede bade ame en oryeo.

³Wun rik ineno wunu anyut luŋ kede ginnoro luŋ ame en rik otio i Miciri i kom Parao abaka me Miciri karacel kede i kom lobo mere luŋ.

⁴Gin aŋo a rik en otimo i kom mony a jo Miciri, i kom aguraguragi kede i kom gadigadigi. Rwot rikomio gin luŋ omwonyere oko i Nam arema i kare ame gin ryemo yorwu te miyogi tum oko atwal naka tin.

⁵Tam wunu koŋ gin ame en otimo i komwu i tim, tuno waŋ ame ituno wunu i kabedo man,

⁶kede gin a en otimo i kom Datan, kede Abiram, itino Eliab, wot a Reuben; kite ame lobo oŋamo kede doge kun jo Icrael luŋ neno, te mwonyogi oko, karacel kede jo me doggolagi, kede kemagi kede jo luŋ a rik owinyo kopgi.

⁷Wun i komwu rik ineno wunu ticcogo adoŋodoŋo luŋ ame Rwot obedo tiyo.

⁸“Pi mannono, myero imak wunu cik luŋ ame acikowu kede tin, me ibed wunu atek, iwot idony wunu i lobo ame iwot wunu iye loka, me gamo bedo megwu;

⁹dok me iperakino wunu kare alac i lobo ame rik okwoŋo pire baŋ kwariwu ni ebino miyogi kede baŋ ikwaegi, lobo ame cak kede moo kic mol amola iye.

¹⁰Pien lobo ame iwot donyo wunu iye me gamo bedo megwu mom rom i lobo me Miciri ame iya wunu iye, ame ka icoo kotini koŋ dok ionyo pii iye i tyenwu, acalo poto dek.

¹¹Ento lobo man ame iwot wunu iye loka me wot gamo bedo megwu, en lobo ame obedo kidikidi, dok daŋ luŋ pol iye, ame mato pii me kot a cwe i polo.

¹²En lobo ame Rwot Obaŋawu gwoko. Waŋ Rwot Obaŋawu kare ducu tye iye, cakere iyi ageyi mwaka tuno kede naka iyi agikki mwaka.

¹³“Doŋ ka ce ibino wunu bedo i winy i cik luŋ ame acikowu kede tin, imaro wunu Rwot Obaŋawu, kun itio wunu baŋe kede cunywu luŋ kede tipowu luŋ,

¹⁴en bino miyo kot cwe i lobowu i kare luŋ ame kot mitte iye, kot me cwir kede kot me iporo, me inwoŋ wunu kal, kono olok kede moo.

¹⁵En bino miyo lum bedo tye iyi eletwu pi dokwu, ibino wunu cam ite yeŋ wunu.

¹⁶Cite myero igwokere wunu me kur bwolwu, ite lokere wunu teŋe tiyi obaŋe mogo ocele kun daŋ iworo wunugi.

¹⁷Ka ce itimo wunu kittono, akemo bino mako Rwot Obaŋawu i komwu, eka te cego dog polo oko, kot doŋ te bedo mom. Lobo mom te ceko cem, wun ite ru to wunu oko i lobo aber ame Rwot amiyowu.

¹⁸“Doŋ pi mannono ba, myero imi wunu koppa-ni luŋ bed i tamwu kede i cunywu, twegi i ŋut ciŋwu, obedo me anen, twe wunu daŋ i tur nyimwu.

¹⁹Pwony kede itinowu, kob kop i komgi ka itye paco, ka itye ka wot i yo, ka ibuto, kede ka iya malo i kabuto.

²⁰Cogi daŋ i kom yen me doggola odi kede i dog cel me boma,

²¹me wun karacel kede itinowu iperakino wunu kare alac i lobo ame Rwot rik okwoŋo me miyo baŋ kwariwu, pi kare luŋ ame polo bino bedo kede malo i wi lobo.

²²Pien ka ibino gwokere wunu me lubo cik magi luŋ ame atye amiyowu, imaro wunu Rwot Obaŋawu, kun ilubo wunu yo mere, dok daŋ imoko wunu i kome,

²³mannono bino miyo Rwot ryemo i nyimwu rok magi adoŋodoŋo dok atek katowu oko, wunu ite gamo wunu lobogi bedo megwu.

²⁴Kakannoro luŋ ame tyenwu bino nyono, bino bedo megwu; wan lobowu bino cakere i tim tuno naka i Lebanon, kede dok cakere i kulo ame en kulo Epurate, tuno naka i nam ame tye tuŋ to.

²⁵Mom tye lomoro ame bino cuŋ i nyimwu: Rwot Obaŋawu bino miyo lworowu nyobo jo luŋ i lobo ame ibino wunu nyono, kite a en rik ocikowu kede.

²⁶“Nen ba, an tin aketo i nyimwu gum kede cen.

²⁷Ibino nwoŋo wunu gum ka ibedo wunu owinyo cik a Rwot Obaŋawu, ame acikowu kede tin-ni.

²⁸Obino ceno wu ka ce mom iwinyo wunu cik a Rwot Obaŋawu, ento igak wunu oko i yo ame acikowu iye tin-ni, kun ilubo wunu yo obaŋe mogo ocele ame yam mom iŋeo wunu.

²⁹I kare ame Rwot Obaŋawu bino kelowu i lobo ame iwot wunu donyo iye me gamo doko megwu, myero iket wunu gum i wi kidi me Gerijim, aco cen ter wunu i kom kidi me Ebal.

³⁰Kidi magi luŋ tye loka Jordan i ŋet yo tutuŋ to, tuŋ ame ceŋ poto iye, i lobo a jo Kanaan ame bedo i Araba, ame otikere kede Gilgal, kun ceggi i kworo me More.

³¹Pien wun iwot wunu ŋolo Jordan, ite donyo wunu gamo loba ame Rwot Obaŋawu amiyowu me bedo megwu. Ka doŋ lobo-nono odoko megwu, ame doŋ ibedo wunu iye,

³²myero igwokere wunu me cobo icwil luŋ kede gin ame ociko ame aketo i nyimwu tin.