Read lango Lodo Cik 12 Bible Online

Lodo Cik 12 - lango bible

Lodo Cik 12

¹“Magi icwil kede gin ociko ame myero ibin igwokere wunu me cobo i lobo ame Rwot, ame obedo Obaŋa a kwariwu, omiowu me bedo megwu, pi kare luŋ ame ibino bedo wunu kwo i lobo.

²Ateteni, myero inen wunu ni imumuko wunu kabedo luŋ a yam orok ame iryemo wunu i lobogi woro iye obaŋegi, ame tye malo i wi kidi abocoboco, kede i kabedo luŋ obedo kidikidi, kede i te yen luŋ obuŋere.

³Mumuko wunu keno me yalo jogigi oko, ŋininyo wunu kiddigi ame ocibo me awora oko, waŋ wunu Acerimgi oko kede mac, toŋu cal obaŋegi ame opao apaa oko, mi wunu nyingi rweny oko i kabedo-nono.

⁴Mom ibino timo wunu kittono baŋ Rwot Obaŋawu.

⁵Rwot Obaŋawu ikome bino yero kabedo moro i akina atekerewu luŋ kan ame en bino keto iye nyiŋe, eka te loko kuno doko kabedo mere; kuno keken en ame ibino wunu wot penyo Rwot Obaŋawu iye.

⁶Ibino tero wunu motwu me awaŋa kuno, kede kite motwu ocele mege luŋ, ame oŋolo me yalo Obaŋa, kede motwu me acel me apar, kede motwu ame imio wunu, acalo bala mot me cobo kwoŋ, kede mot me ler a yic, kede itino kao me dokwu kede rommiwu.

⁷Ibino camo wunu kuno i nyim Rwot Obaŋawu, eka yin karacel kede jo me odi ite lelo wunu pi ginnoro luŋ ame ciŋwu ogudo, ame Rwot Obaŋawu onwoŋo omio iyegum.

⁸“Mom ibino timo wunu kite ame wan otye ka timo wunu kanni, ame dano acel acel tye ka timo gin ame en neno ni ber baŋe.

⁹Pien mom ru ituno wunu ka weowu, i loba ame Rwot Obaŋawu amiyowu me bedo megwu.

¹⁰Ento Rwot Obaŋawu amiyowu me alea, dok ka en doŋ omiowu weo, i kom okworwu ame omanowu luŋ, ame doŋ te miyowu bedo i kuc,

¹¹myero ikel wunu jami luŋ ame acikowu iye i kabedo kan ame Rwot Obaŋawu bino yero me keto iye nyiŋe. Kel wunu iye motwu me awaŋa, kede kite motwu ocele luŋ ame oŋolo me yalo Obaŋa, acel me apar, kede motwu ocele ame imio wunu, kede motwu luŋ ame cobo kwoŋ ame ikwoŋo wunu baŋ Rwot.

¹²Ibino bedo wunu kede lelo i nyim Rwot Obaŋawu, wun karacel kede itinowu awobe kede anyira, kede opiiwu, kede aŋecawu, karacel kede jo Levi ame tye i bomawu luŋ, kite acalo gin mom otye i dul lobo moro onyo lobo moro ame gin oleo me bedo meggi karacel kedwu.

¹³Gwokere wunu ba, kur imi wunu motwu me awaŋa i kabedo moro kekename waŋwu oneno;

¹⁴myero imi wunu motwu me awaŋa, dok daŋ iti wunu ginnoro luŋ ame acikowu iye, i kabedo ame Rwot bino yero keken i akina atekerewu moro acel.

¹⁵“Kadi bed amannono, itwero wunu neko leyi me acama i bomawu moro kite ame imito wunu, kun lubo winyo ame Rwot Obaŋawu omiowu. Jo a cik ogeŋo kede jo a mom cik ogeŋo twero camo riŋo-nono, bala riŋo amor onyo amyem.

¹⁶Cite remo myero kur cam, myero ony oko piny bala pii.

¹⁷Cite acel me apar me cam ocek, onyo me koŋo olokwu, motwu moro me cobo kwoŋ ame ikwoŋo wunu, onyo motwu me ler a yic, onyo motwu moro ocele ame imio wunu, myero kur icam wunu i bomawu.

¹⁸Magi luŋ myero icam wunu kan ame Rwot oyero keken, i nyim Rwot Obaŋawu. Wun karacel kede itinowu awobe kede anyira, opiiwu kede aŋecawu, kede jo Levi luŋ ame bedo i bomawu, myero icam wunu kuno. Ibino bedo wunu kede lelo i nyim Rwot Obaŋawu pi ginnoro luŋ ame ciŋwu ogudo.

¹⁹Pi kare ame ibedo wunu i lobowu, myero igwokere wunu, kur iwek wunu jo Levi.

²⁰“Ka Rwot Obaŋawu onyao lobowu obedo adwoŋ kite a rik en ociko, eka ite kobo ni, Abino camo riŋo pien cunya mito camo riŋo, itwero camo kite ame yii mito.

²¹Ka ce kan ame Rwot Obaŋawu oyero me keto iye nyiŋe bor kedi, itwero neko dyaŋi moro onyo romo moro ame Rwot omii, kite ame acikowu kede; itwero daŋ camo kannoro keken i bomawu, kite ame yii mito.

²²Itwero camo riŋo-nono kite ame onwoŋo itwero camo kede amor onyo amyem; jo a cik ogeŋo twero camo.

²³Cite myero inen ni mom icamo wunu remo; pien en kwo a dano, doŋ mom ibino camo wunu kwo karacel kede riŋo.

²⁴Kur icam wunu, ento myero iony wunu piny bala pii.

²⁵Kur icam wunu; me nyimwu karacel kede me itinowu ame bino lubowu bed aber ka ce itimo wunu gin a tye atira i nyim Rwot.

²⁶Cite jamiwu luŋ acillege kede motwu luŋ me cobo kwoŋ, ibino kelo wunu kan ame Rwot bino yero.

²⁷Motwu me awaŋa riŋo kede remo, myero imi wunu i wi keno lam a Rwot Obaŋawu. Remo me motwu ame oŋolo me yalo Obaŋa, myero ony i kom keno lam a Rwot Obaŋawu, cite riŋo mere itwero camo wunu.

²⁸Myero igwokere wunu i kop magi luŋ ame cikowu iye, me nyimwu karacel kede me itinowu ame bino lubowu bed aber nakanaka, kun itimo wunu gin aber dok a tye atira i nyim Rwot Obaŋawu.

²⁹“Ka Rwotbino tyeko rok i nyimwu ame iwot wunu leyo lobogi, ka doŋ iryemo wunugi oko, ite bedo wunu i lobogi,

³⁰myero igwokere wunu, kur imak wunu i kumma, ilub wunu kitegi. Ka doŋ otyekogi oko, kur ipeny wunu kopporo i kom obaŋegi ni, ‘Jo-ni kara woro obaŋegi niŋo, me an daŋ awor kite ame gin woro kede?’

³¹Kur iwor wunu Rwot Obaŋawuiiyore ame gin woro kede megi; pien ginnoro luŋ me kwer ame Rwot dag, gin otimo baŋ obaŋegi. Gin waŋo anaka itinogi awobe kede anyira i mac me yalo obaŋegi.

³²“Ginnoro luŋ ame acikowu iye, myero igwokere wunu icobo; kur imed wunu moro iye, kur daŋ ibol wunu moro oko iye.