Read lango Lodo Cik 14 Bible Online

Lodo Cik 14 - lango bible

Lodo Cik 14

¹“Wun ibedo wunu itino a Rwot Obaŋawu, myero kur iŋoŋolo wunu komwu, kur daŋ ilyel wunu yer me tur nyimwu pi kwero cola a jo oto,

²Pien wun ibedo wunu jo acil baŋ Rwot Obaŋawu; Rwot otyeko yerowu i akina rok ocele luŋ ame tye i wi podo, me ibed wunu jo mere.

³“Kur icam wunu ginnoro ame kwer.

⁴Leyi ame myero icam wunu ene: dyel, romo, dyaŋ,

⁵amor, amyem, emalet, dyel ame bedo i tim, alop, akal, kede rommi ame bedo i wi kidi.

⁶Leyi luŋ ame lwet tyengi okaro aryo, kun akina tyengi okaro aryo, dok daŋ omedo nyamo cem a koŋ omwonyo oko i yigi, ame tye i akina leyi, itwero camo wunu.

⁷Kadi amannono, i akina leyi ame medo nyamo cem a koŋ omwonyo oko i yigi, onyo ame tyengi okaro aryo, myero kur icam wunu magi: inaga, apwo, anyeri; gin medo nyamo cem a koŋ omwonyo oko i yigi, cite lwet tyengi mom okaro aryo, cik mom oyewu camogi.

⁸Puno daŋ kadi bed lwet tyene okaro aryo cite mom medo nyamo cem a koŋ omwonyo; mano daŋ cik mom oyewu camo. Kur icam wunu riŋogi, kur daŋ igud wunu komgi oto.

⁹“I kom gin a kwo luŋ ame bedo i pii ibino camo wunu magi: itwero camo wunu gin i pii luŋ ame tye kede icikigir kede pok komgi.

¹⁰Aco en ame mom tye kede icikigir kede pok komgi, mom ibino wunu camo; magi-nono cik mom oyewu camo.

¹¹“Itwero camo wunu winy luŋ ame cik mom ogeŋo.

¹²Cite magi en winy ame mom ibin wunu camo: Cur, acut, ekekom,

¹³ekulukulu, ogole kede eponegi;

¹⁴kite agak luŋ kede eponegi;

¹⁵udo, ojoro, jigijigigur, olwit kede eponegi,

¹⁶itukere atino kede etukere adoŋo, okumbere,

¹⁷etolo ewuma kede alwinyalwiny,

¹⁸araptela ogoro kede kite eponegi luŋ, otebakori kede olik.

¹⁹Kudi luŋ ame tye kede bwomgi; gin luŋ obedo gin me kwer baŋwu; mom ibino wunu camo,

²⁰Ginnoro luŋ a cik mom ogeŋo ame tye kede bwomgi, ibino wunu camo.

²¹“Mom ibino wunu camo ginnoro ame oto kene; itwero miyo wunu arokkoro ame bedo i bomawu me en cam; onyo itwero cato wunu baŋ welo moro; pien wun ibedo wunu jo acil baŋ Rwot Obaŋawu. “Kur ited wunu riŋo atin dyel kede cak a tottere.

²²“Ibino miyo wunu acel me apar me gin ocek i pottiwu, ame ya i pottiwu mwaka i mwaka.

²³Dok daŋ ibino wunu camo acel me apar me kalwu kede me koŋo olokwu, kede me moowu kede itino kao a dok kede rommi, i nyim Rwot Obaŋawu kan ame en bino yero me keto iye nyiŋe, me ipwony wunu lworo Rwot Obaŋawu kare luŋ.

²⁴Ka ce kan ame Rwot Obaŋawu oyero me keto iye nyiŋe bor meicel, ame wot iye tero kare alac, ame mio tero acel me apar kuno tek meicel baŋi, ka ce Rwot onwoŋo omii winyo,

²⁵cat acel me apar oko me ilok dok cente, ite doŋ mako i ciŋi tero kan ame Rwot Obaŋawu oyero.

²⁶Limmono, wil kede gin ame yii omito, twon onyo romo onyo koŋo olok onyo kit mattoro akeccere, ginnoro keken ame cunyi okwanyo. Cam gin ame iwilo-nono i nyim Rwot Obaŋani kuno, bed kede lelo, yin karacel kede jo odi,

²⁷Dok daŋ myero kur iwek jo Levi ame bedo i bomawu luŋ, pien gin mom tye kede dul lobo moro ame gin oleo me bedo meggi karacel kedwu.

²⁸“Iyi agikki me mwaka adek adek ibino kela wunu acel me apar me gin ocek baŋwu ducu i mwaka-nono, ite kano wunu i dye bomawu,

²⁹me jo Levi bin cam, pien gin mom tye kede dul lobo moro onyo lobo moro ame gin oleo me bedo meggi karacel kedwu, kede dok arokkoro ame bedo i akinawu, kede itino kic, kede mon a coggi oto, ame gin bedo i bomawu, gin luŋ obin ocam, oyeŋ; me Rwot Obaŋawu miwu gum i kom ticwu luŋ ame itio wunu.