Read lango Lodo Cik 15 Bible Online

Lodo Cik 15 - lango bible

Lodo Cik 15

¹“I agikki me mwaka abiro abiro, ibino jalo wunu bannyiwu oko.

²Kite me jalo bannyi bino bedo kit man: ŋat acel acel ame yam omio banya baŋ awottere ame obedo dano me Icrael, en bino jalo oko luŋ. Mom dok bino medde pido banya i baŋ awottere ame obedo dano me Icrael wadgi, pien Rwot en a doŋ otito pi jalo bannyi-nono oko,

³Itwero pido banyani baŋ arok, cite banya ame tye baŋ dano me Icrael wadwu, myero ijal oko.

⁴Kadi bed amannono, acannono gire mom bino nen i akinawu, pien Rwot bino miyowu winyo i lobo ame Rwot Obaŋawu bino miyowu me bedo megwu,

⁵ka ce wun ibino wunu winyo kop a Rwot Obaŋawu kun igwokere wunu atek icobo cik ame an acikowu kede tin-ni,

⁶Pien Rwot Obaŋawu bino miyowu winyo kite ame en rik ocikowu kede. Ibino miyo wunu rok apol koporo banya baŋwu, cite wun mom ibino kopporo wunu ginnoro i baŋgi. Wun ibino loyo wunu rok apol, cite gin mom bino loyowu.

⁷“Ka ce ominwu moro tye i akinawu ame acan, i boma moro ame tye i lobowu ame Rwot Obaŋawu amiyowu, mom ibino miyo wunu cunywu bedo nwaŋ, onyo kur idwok ciŋi i ŋei i kom ominni ame acannono,

⁸ento myero iyare ciŋi imi en kopporo ginnoro keken ame en omito, ame romo cobo mittere.

⁹Gwokere ba, me tammoro arac kur bed i cunyi, eka te miyi kobo ni, ‘Mwaka me abiro doŋ ceggi acega, ame en mwaka me jalo bannyi’, eka ite miyo waŋi balle i kom ominni ame acan, mom ite miye ginnoro. En bino kok i komi i nyim Rwot, eka te lunyo doko bal i komi.

¹⁰Gin ame imiyo ominni myero imie i cunyi acil kun daŋ mom dok it ye kede gulloro i cunyi; pien mannono bino miyo Rwot Obaŋawu mii winyo i ticci luŋ kede i ginnoro luŋ ame ciŋi ogudo.

¹¹Pien jo ame ocan mom bino rwenyo i lobowu. Mannono omio acikowu, ni, ‘Myero iyab wunu ciŋwu alac baŋ omegowu ame tye i lobowu, kede baŋ ocan ame mito ginnoro i baŋwu.

¹²“Ka ce ocato baŋi ominni moro ame obedo dano me Eburania onyo aminni moro ame obedo nya jo Eburania wadwu en bino tic baŋi pi mwakki kanyape, eka i mwaka me kany wie aryo mere ite weko wot oko aboŋo culloro,

¹³Cite myero kur icwalle i ciŋe nono i kare ame en doŋ aya oko i baŋi.

¹⁴Ibino miyo en woto i jami mogo i kom rommini onyo dyegini, kede i kom jamini ame ikwanyo i dero, kede en ame ikwanyo i bur biyo olok; ibino miye kun ilubo kite ame Rwot omii kede winyo.

¹⁵Myero ipo ni wun daŋ yam koŋ ibedo wunu opii i lobo Miciri, eka Rwot Obaŋawu te lakorowu, mannono en omio an acikowu tin.

¹⁶Aco ka en bino kobo ni, ‘An gira mom abino ya i baŋi’, pien en mari karacel kede jo me odi, pi kite ame ibedo tic kede aber,

¹⁷ibino kwanyo atero ite wot tuco kede yite i doggola en doŋ te bedo opiini nakanaka. Opiini a dako daŋ ibino timo kittono.

¹⁸Ka iweko en owoto aboŋo culloro, mom ibino miyo cunyi bedo nwaŋ, pien obedo tic baŋi pi mwakki abicel kun ticcere kato me apakaca tye aryo twal. Rwot Obaŋawu bino miyi winyo i gin ame itiyo luŋ pi mannono.

¹⁹“Itino kao luŋ ame limmi akwo onywalo, itino twoni onyo itino nyogi rommi kede me a dyegi, ibino kwero wunugi pi Rwot Obaŋawu. Mom ibino miyo twonini me kao tio ticcoro, dok daŋ mom ibino nyaro yer kom nyogi rommini a kao mege.

²⁰Yin karacel kede jo me odi, ibino camo wunu rinogi i nyim Rwot Obaŋawu mwaka i mwaka, kan ame Rwot bino yero.

²¹Ento ka balloro tye i kome, ka oŋwalo onyo waŋe oto, onyo balloro ocele arac tye i kome, mom ibino ŋolo wunu me yalo Rwot Obaŋawu.

²²Ibino camo wunu kodi mannono i bomawu, jo a cik ogeŋo kede jo a cikkoro mom ogeŋo twero camo kite ame ocamo kede riŋo amor onyo riŋo amyem.

²³Cite remo mere myero kur cam, myero ony oko piny calo pii.