Read lango Lodo Cik 16 Bible Online

Lodo Cik 16 - lango bible

Lodo Cik 16

¹“Gwok wunu dwe me Abib, dok daŋ ikwer wunu Kato a Rwot Obaŋawu; pien i dwe me Abib Rwot Obaŋawu rik okwanyowu i lobo me Miciri dyewor.

²Ibino yalo wunu Rwot Obaŋawu i leyiwu ame oŋolo me Kato, ame ikwanyo wunu i akina rommi kede dok, i kabedo kan ame Rwot Obaŋawu bino yero me keto iye nyiŋe.

³Kur icam wunu kede ogati ame orubo i tobi, ento myero icam wunu kede ogati ame tobi mom iye pi nino abiro, ame en ogati me can ame ineno wunu; pien rik iya wunu i lobo Miciri kun iruye wunu arua. Man bino poyo wiwu i kom nino ame iya wunu kede i Miciri pi kare luŋ me kwowu.

⁴Tobi moro myero kur nen baŋwu i lobowu pi nino abiro; akadi riŋo moro ame oŋolo me yalla otyeno me nino me agege, myero daŋ kur wek bed naka tuno odiko.

⁵Myero kur iŋol wunu lee me Kato i boma moro ame Rwot Obaŋawu bino miyowu,

⁶kono ka i kabedo moro ame Rwot Obaŋawu bino yero me keto nyiŋe iye. Yal wunu Obaŋa i leyiwu ame oŋolo me Kato kunnu, ŋol wunu otyeno ame ceŋ adonyo, ame en kare a rik iya wunu kede i Miciri.

⁷Ted wunu ite camo wunu kan ame Rwot Obaŋawu bino yero, eka odiko ite lokere wunu dok wunu i kemawu.

⁸Cam wunu ogati a mom orubo i tobi pi nino abicel; eka nino me kany wie aryo ite bedo wunu kede cokere acil i nyim Rwot Obaŋawu; i nino-nono mom ibino gudo wunu ticcoro.

⁹“Ibino kwano wunu cabit abiro kun icako kwano wunu i nino ame icako wunu kac iye.

¹⁰Kwer wunu koŋ ecuban me cabit abiro kite ame Rwot Obaŋawu mito kun ikelo wunu motwu me ber a yic a lubere kede kite ame Rwot Obaŋawu omiowu.

¹¹Yin karacel kede wodi, kede nyari, opiini kede aŋecani kede Alevi moro ame bedo i bomawu, arokkoro ame bedo i akinawu kede atin kic kede dako a cware oto ame bedo i akinawu, ibino lelo wunu i nyim Rwot Obaŋawu i kabedo kan ame Rwot Obaŋawu bino yero me keto iye nyiŋe.

¹²Myero ipo wunu ni yam wun daŋ ibedo wunu opii i lobo me Miciri; dok daŋ myero igwokere wunu igwoko icwil magi luŋ.

¹³“Ibino kwero wunu ecuban me gonye nino abiro, i kare a doŋ ityeko coko wunu camwu oko i laro me dino kal kede i bur me biyo olok.

¹⁴Yin karacel kede nyari, opiini kede aŋecani, kede Alevi moro, kede arokkoro ame bedo i akinawu, atin kic kede dako a cware oto ame bedo i bomawu moro, ibino kwero wunu ecubannono kede lelo.

¹⁵Kwer wunu ecubannono pi nino abiro kite ame Rwot Obaŋawu mito i kabedo ame Rwot Obaŋawu bino yero. Ibino bedo wunu kede lelo ka Rwot Obaŋawu bino miyowu winyo i kom ticwu luŋ ame itio wunu.

¹⁶“Co luŋ i akinawu bino tuno i nyim Rwot Obaŋawu i kabedo ame en bino yero tyen adek i mwaka acel acel, i kare me ecuban me Ogati a Tobi Mom iye, kede ecuban me Cabit Abiro, kede i kare me ecuban me Gonye. Myero gin kur bin i nyim Rwot ciŋgi nono;

¹⁷ŋat acel acel myero kel mottere ame eromo kela kun lubo kite a Rwot Obaŋawu omie kede winyo.

¹⁸“Ibino keto wunu oŋolkop kede odoŋe a loo lwak i boma ducu ame Rwot Obaŋawu amiyowu, kun ilubo wunu itekerewu. Gin bino ŋolli jo kop kakare.

¹⁹Myero kur ibal wunu pido, kur daŋ ileŋere wunu i pido, kur daŋ igam wunu limmoro me wil, pien lim me wil wumo waŋ jo a ryek, dok daŋ balo pido a jo a kitegi atira.

²⁰Tam pi ŋolo kop atira keken, me ibed kwo, igam lobo ame Rwot Obaŋawu omiowu me bedo megwu.

²¹“Mom ibino pito wunu yattoro me bed Acera i ŋet keno lam a Rwot Obaŋawu, ame ibino wunu camo.

²²Kur daŋ icib wunu gweŋŋoro ocuŋ atira me awora ame Rwot Obaŋawu dag.