Read lango Lodo Cik 17 Bible Online

Lodo Cik 17 - lango bible

Lodo Cik 17

¹“Kur iyal wunu Rwot Obaŋawu kede twon, romo onyo dyelloro ame kit roccoro keken tye i kome, pien mannono obedo gin me kwer baŋ Rwot Obaŋawu.

²“Ka ce ibino nwoŋo wunu dano moro i akinawu, ame tye i boma moro ame Rwot Obaŋawu omiowu, ico onyo dako, ame timo ginnoro arac i nyim Rwot Obaŋawu, ame turo kede cikere a Rwot,

³eka te wot tic baŋ obaŋe mogo ocele kun worogi, onyo woro ceŋ, onyo dwe, onyo ginnoro keken i kom lwak mony apipim ame tye i polo, ame atyeko geŋo kede gin ame aciko,

⁴ka ce iwinyo wunu kop man, myero ipeny wunu koppere kun iyenyo wunu tere aber meicel. Ka ce iniaŋ wunu, dok daŋ imoko wunu ni timmoro me kwer otimere ateni iyi Icrael,

⁵kel wunu lonnono onyo dano-nono ame otimo gin araccono i dog cel me boma, ite neko wunu lonnono onyo dako-nono oko kun inanapo wunu kede gweŋe.

⁶Obino neko dano-nono pi kop ocaden aryo onyo adek, cite mom obino neko ŋattoro pi kop a caden acel.

⁷Ciŋ ocaden en ame bino geyo tuno i kome ka doŋ aneke, eka icennere ciŋ jo ocele te doŋ onyere i kome. Myero iwe wunu bal man i akinawu kittono.

⁸“Ka ce i bomawu moro pido moro obino i nyimwu ame tek, ibino wunu tero pido-nono i kabedo ame Rwot Obaŋawu bino yero; pido acalo me poko kit nek apapat onyo kit pido mogo ocele onyo me kit lweny apapat.

⁹Ibino wot wunu baŋ olamdog ame gin obedo jo Levi, kede baŋ aŋolkop ame onwoŋo tye i tic i kare-nono, ite wot penyo wunugi. Gin bino tittiwu kite ame oŋolo kede,

¹⁰eka ite daŋ timo wunu kite ame gin otitiwu kede i kabedo-naca, kan ame Rwot Obaŋawu bino yero. Myero igwokere wunu me cobo wunu kite ame gin okobbiwu kede;

¹¹kite ame gin opwonyowu kede, kede kite ame gin oŋolo kede, wun myero itim wunu kittono; myero kur dok igak wunu oko i kom gin ame gin oŋolo, kur igak wunu tuŋ cem onyo tuŋ cam.

¹²Lon ame apala, ame okwero winyo kop alamdog ame onwoŋo tye ka tiyo tic a Rwot Obaŋawu, onyo me aŋolkop, dano-nono myero nek oko. Myero iwe wunu bal man i kom jo Icrael kittono.

¹³Jo luŋ bino winyo te bedo kede lworo, mom dok ote medde bedo opala.

¹⁴“Ka doŋ ituno wunu i lobo ame Rwot Obaŋawu amiyowu, ame ibino wunu gamo me bedo megwu, ite bedo wunu iye, eka ite kobo wunu ni, ‘Oket wunu abaka me loyowa, kite ame rok ocele luŋ ame omannowa tye ka timo kede’;

¹⁵itwero keto wunu abaka me loyowu, cite myero iket wunu ŋat ame Rwot Obaŋawu en oyero. Ŋat ame iketo wunu-nono myero bed dano me Icrael; myero kur iket wunu arokkoro me loyowu, ame mom obedo dano me Icrael.

¹⁶En dano-nono myero kur dok med wel aguragura mere dok apipim, dok daŋ myero kur dok dwok jo Icrael i Miciri kun tye kede cuny me medo wel aguragura mere. Rwot dokokobbiwu oko ni mom dok ibino wunu dok cen kuno.

¹⁷Myero kur daŋ dur mon apol apola, naka mio bino balo tammere; myero daŋ kur dok obed twon alonyo i ryal kede jabu.

¹⁸“I kare ame en doŋ obedo i wi kom me loccere, en myero co cik man i bukkoro pire, kun okwanyo koppere i buk ame olamdog ame gin jo Levi en agwoko.

¹⁹Buk cikkono bino bedo baŋe, en bino kwano pi kare me kwo mere luŋ, me en pwony lworo Rwot Obaŋa mere, i mako koppere ame tye i cik man, kede icwil magi, kun daŋ ketogi i tic,

²⁰me en kur yiye me bedo twon lomoro a tye malo meicel i wi omego mere, eka te gak weko cik oko, te gak i ciŋe tuŋ cem onyo tuŋ cam; me en perakino i loccere iyi Icrael, en karacel kede itino mere.