Read lango Lodo Cik 18 Bible Online

Lodo Cik 18 - lango bible

Lodo Cik 18

¹“Olamdog ame gin obedo jo Levi, ame gin jo me atekere a Levi luŋ, gin mom bino bedo kede dulloro onyo lobo moro ame obedo megi karacel i jo Icrael; gin bino camo mot ame owaŋo i mac baŋ Rwot, kede ginnoro luŋ ame myero mi baŋe.

²Gin mom bino bedo kede lobo moro ame obedo megi i akina omegogi, Rwot en ame obedo gin ame gin onwoŋo me bedo megi, kite a en ocikogi kede.

³Man en ame bino bedo iner olamdog ame gin onwoŋo i baŋ lwak i baŋ jo ame mio motgi me yalo Obaŋa, kadi bed omio twon onyo romo; gin bino miyo baŋ olamdog bade, kede leme ryoryo, kede amonten luŋ.

⁴Kal kede koŋo olok kede moogi me wi mwaka kede yer romogi ame ogeo mworo, ibino miyo wunu baŋ olamdog.

⁵Pien Rwot Obaŋawu otyeko yerogi i akina itekere me Icrael, me wek gin karacel kede ikwaegi obedo jo ame tio i nyim Rwot atwal.

⁶“Doŋ ka ce dano moro me Levi oya i bomawu moro ame tye iyi Icrael luŋ, kan ame onwoŋo en bedo iye, en twero bino kan ame Rwot bino yero, ka ce cunye mito.

⁷Ook en daŋ twero tic i nyim Rwot Obaŋa mere bala omego mere ame obedo jo Levi ame tio i nyim Rwot kuno.

⁸Iner ame gin bino camo, bino bedo a rom i meggi, medo i kom gin ame en onwoŋo i kom jami a kwaro mere ame en ocato.

⁹“Ka doŋ ituno wunu i lobo ame Rwot Obaŋawu amiyowu, myero kur ipwony wunu lubo kite timmogo me kwer ame orok a tye kuno timo.

¹⁰Ŋattoro i akinawu myero kur waŋ wode onyo nyare acalo mot me yalo Obaŋa, ŋattoro kur daŋ dok ajoka ame tyeto tyet kede ajaa, onyo ŋat ame ŋio yi dyel, onyo atim timmogo me jojok, onyo akor tipo,

¹¹onyo alam amuk, onyo emuru, onyo ajok onyo ayeny tipo.

¹²Pien ŋat ame timo kodi timmono, dano-nono Rwot bino kwero oko. Pi timo kodi tim me kwerrono, omio Rwot Obaŋawu tye aryemo rok ocele oko i nyimwu,

¹³Rwot Obaŋawu mito ni ibed wunu aboŋo balloro i nyime.

¹⁴Pien rok ame iceggi wunu gamo lobogi me bedo megwu, gin keto cunygi i kop a jo atyeto kede ajaa kede kite ajoka ocele mege, ento wun Rwot Obaŋawu mom mito ni itim wunu kodi timmono.

¹⁵“Rwot Obaŋawu bino miyowu adwarpinnyoro ame bino ya i akina omegowu, ame cal keda; myero iwinye wunu.

¹⁶Man en bino timo me cobo kwacwu a rik ikwao wunu kede Rwot Obaŋawu i kare ame icokere wunu i Koreb. I kare-naca rik ikobo wunu ni, ‘Kur dok imedde miya winyo dwon Rwot Obaŋana, akadi neno twon maccere adwoŋ wok ca, naka mio ato oko.’

¹⁷Rwot rik te kobba ni, ‘Kop luŋ ame gin okobo, okobo kakare.

¹⁸Abino miyogi adwarpinnyoro acal kedi, ame bino ya i akina omegogi; an abino keto koppa i doge, en bino kobbigi kop luŋ ame an acike iye.

¹⁹Doŋ ŋat ame mom bino winyo koppa ame en bino kobo i nyina, an ikoma en ame abino penye pire.

²⁰Cite adwarpiny ame bino poro doga nono kun nwoŋo an mom acike onyo ame kobo koppere i nyiŋ obaŋe mogo ocele, adwarpinnyoro bino to oko.’

²¹Gwok onyo ibino kobo i cunyi ni, ‘Kara obino ŋeyo kop a Rwot mom okobo ni’,

²²ka ce adwarpiny okobo kopporo i nyiŋ Rwot, eka kop ame en okobo-nono mom te timere, onyo mom te cobere, mannono nwoŋo kop ame Rwot mom okobo. Adwarpinnyono nwoŋo obedo kobo kop ame en oporo apora kede wie kene, myero kur ilwore wunu.