Read lango Lodo Cik 19 Bible Online

Lodo Cik 19 - lango bible

Lodo Cik 19

¹“Ka Rwot Obaŋawu doŋ otyeko rok ame lobogi Rwot Obaŋawu awot miyowu, me bedo megwu, ite bedo wunu i bomagi kede i udigi,

²ibino poko wunu boma adek pat pirwu i lobo ame Rwot Obaŋawu amiyowu-nono.

³Ibino pupuro wunu yo iye, eka ite poko wunu yie adek, en loba ame Rwot Obaŋawu amiyowunono, me wek ŋat oneko nek riŋ lar kuno.

⁴“Man en kop a mako ŋat oneko nek, ame ka ce oriŋo olaro kuno, twero laro kwo mere: ka ce ŋattoro oneko awottere kun mom oneko me akaka, dok amone moro onwoŋo daŋ mom i akinagi i kare okato,

⁵me anennere, ka ce ŋattoro onwoŋo owoto toŋo yen gin kede awottere iyi buŋ, eka lee ame onwoŋo etono kede yen te wotte oko i purrere, te wot goyo awottere neko oko; dano-nono twero riŋo i boma moro i akina magi, te laro kwo mere.

⁶Ka ce mom itimo wunu amannono, bino miyo aculculo kwor i twon akemo mere ame nwoŋo en tye kede, twero ryemo anek, te mako neko oko, pien yo nwoŋo bor, aco kun nwoŋo bal a dano-nono mom romme to, pien amone moro onwoŋo mom i akinagi i kare okato.

⁷Pi mannono, omio acikowu ni, Myero ipok wunu boma adek pat.

⁸Dok ka ce Rwot Obaŋawu bino nyayo waŋ lobowu kite a rik okwoŋo kede baŋ kwariwu, eka te miyowu lobo luŋ ame rik en ociko baŋ kwariwu ni ebino miyowu.

⁹Myero imed wunu boma adek ocele i kom magi adek-ki. En bino miyowu ka ce wun igwokere wunu, imako wunu gin a en ociko luŋ, ame acikowu kede aman-ni, imaro wunu Rwot Obaŋawu, dok daŋ ilubo wunu yo mere kare ducu,

¹⁰me remo a mom i bal kur cwer i lobo ame Rwot Obaŋawu amiyowu me bedo megwu, wek bal me remo ame oony kur bed i wiwu.

¹¹“Ento ka ce dano moro onwoŋo dago awottere, eka te bedo kiye, te ero lweny i kome, ame te cobo neko oko, eka dano-nono te riŋo laro boma acel i akina magi.

¹²Odoŋe me boma mere bino cwayo kop, ote ome oko i kuno, ote miye i ciŋ acul kwor me remo, me en daŋ neke oko.

¹³Kica myero kur makwu i kome, cite myero ilwok wunu bal me remo a mom i bal oko iyi Icrael, me nyimwu bed aber.

¹⁴“Ilobowu ame ibino leyo wunu, ame Rwot Obaŋawu amiyowu me bedo megwu, mom ibino wunu kobo waŋ kiŋa ame opoko lobo awotti, ame yam odoŋe otyeko poko oko.

¹⁵“Kop mom bino loyo dano moro pi kop acaden acel, pi kit timmoro arac onyo balloro arac ame en obalo. Myero ŋol kop pi kop ocaden aryo onyo adek.

¹⁶Ka ce acadennoro ame cunye rac opido ni ŋattoro ni otimo bal,

¹⁷jo aryo-nono luŋ ame tye i pyem i akinagi, gin luŋ bino cuŋ i nyim Rwot kede i nyim olamdog kede oŋolkop ame onwoŋo tye i tic i kare-nono,

¹⁸oŋolkop te yenyo te koppere aber meicel, ka ce gin onwoŋo ni acaden obedo ŋat ame agoba, dok daŋ okelo pido me goba i kom ominnere,

¹⁹ibino keto wunu can i kome, can ame rom i can ame en onwoŋo mito timo i kom ominnere. Myero iwe wunu bal man i akinawu kittono.

²⁰Jo ocele bino winyo pire ote bedo i lworo, mom dok te medde timo balloro i akinawu.

²¹Kica myero kur makwu; kwo myero cul i kwo, waŋ kede waŋ, lak kede lak, ciŋ kede ciŋ, tyen kede tyen.