Read lango Lodo Cik 2 Bible Online

Lodo Cik 2 - lango bible

Lodo Cik 2

¹“Wan rik ote cako wotwa i tim kun odok tutuŋ Nam Arema, kite a rik Rwot onwoŋo ocika kede; rik ote bedo rorona i lobo me Ceir ame obedo kidikidi pi kare alac meicel.

²Rwot te dok kobba ni,

³‘Ibedo wunu doŋ rorona i lobo obedo kidikidi-ni pi kare alac meicel, doŋ oromowu oko; wirre wunu doŋ odok wunu tutuŋ anyarodi.

⁴Cik lwak ni, Nen doŋ iceggi beo wunu i lobo omegowu ame obedo ikwae Ecau, ame gin bedo i Ceir; gin bino bedo i lworo i komwu, doŋ myero igwokere wunu meicel.

⁵Kur ilweny wunu i komgi, pien mom abino miyowu dul lobogi moro kadi acel, akadi dul lobo moro aduno ame dano romo cuŋ iye keken, pien doŋ atyeko miyo lobo obedo kidikidi me Ceir baŋ Ecau me bedo mere.

⁶Itwero nwoŋo wunu cam kede pii baŋgi, cite ibino wilo wunu awila.

⁷Pien Rwot Obaŋawu otyeko miyowu winyo i kom ginnoro luŋ ame ciŋwu ogudo; en kite ame iwoto wunu kede i dye twon tim alac-ci. I mwaka pyeraŋwen-ni luŋ Rwot Obaŋawu obedo bedo kedwu omio mom tye ginnoro ame oremowu.’

⁸Mannono omio wan okato oweko omegowa ame obedo ikwae Ecau, ame onwoŋo bedo i Ceir, mom obeo i yo me Araba, ame ya i Elat kede i Ejion-geber. “Eka dok ote wot tutuŋ tim me Moab.

⁹Rwot dok te kobba ni, ‘Kur iwot agwa i kom jo Moab, kur daŋ ilweny i komgi, pien mom abino miyi dul lobogi moro me bedo meri, pien doŋ atyeko miyo Ar baŋ ikwae a Lot me bedo megi.’

¹⁰(Jo Emim en a rik ogeo bedo kuno; gin obedo rok adwoŋ dok jo mere pol atek kun obocoboco calo Anak.

¹¹Jo man daŋ rik okwanogi i kom jo Repa calo jo Anak, ento jo Moab lwoŋogi ni, jo Emim.

¹²Jo Kori rik con daŋ koŋ obedo i Ceir, ento ikwae Ecau rik te mayo lobogi oko bedo megi, gin te tyekogi oko i nyimgi, eka te leyo kabedogi kite a rik jo Icrael otimo i kom lobo ame odoko megi, ame Rwot rikomiogi.)

¹³‘Doŋ ba, ya wunu oko aman, iwot iŋol wunu luŋ me Jered’. Wan daŋ rik ote wot ŋolo luŋ me Jered,

¹⁴Cakere i kare ame oya kede i Kadec-barnea tuno wan ame oŋolo luŋ me Jered, onwoŋo doŋ oromo mwakki pyeradek wie aboro. I kare-nono onwoŋo doŋ lwak luŋ ame romo lweny ototoa oko kite ame Rwot rik okwoŋo kede.

¹⁵Pien ciŋ Rwot rik onwoŋo tye i komgi, me tyekogi oko i gonygi, tuno waŋ ame gin otum iweŋ.

¹⁶“Mannono omio i kare ame jo luŋ ame onwoŋo romo lweny otum oko i akina lwak.

¹⁷Rwot okobba ni,

¹⁸Tin doŋ ibino beo i kato i waŋ lobo me Moab kede Ar.

¹⁹Kare a doŋ i ceggi i jo Ammon, kur iwot agwa i komgi, kur daŋ ilweny i komgi, pien mom abino miyo dul lobo a jo Amon moro me bedo meri, pien doŋ a tyeko miyo baŋ ikwae a Lot me bedo megi.

²⁰Mannono daŋ obino lwoŋo ni lobo a jo Repa rik koŋ obedo kannono, jo Ammon rik lwoŋogi ni, jo Jamjum.

²¹Gin rik obedo rok adwoŋ dok jo mere pol atek kun obocoboco calo Anak, ento Rwot rik obino otyekogi luŋ i nyimgi, ote ryemogi oko, eka gin te leyo kabedogi,

²²kite ame rik otimo kede pi ikwae Ecau ame bedo i Ceir, i kare ame otyeko jo Kori oko i nyimgi, eka ikwae Ecau te mayo lobogi oko, ote leyo kabedogi; gin pwod bedo kuno naka atot onyoni.

²³Dok jo Avim daŋ ame rik onwoŋo bedo i pacci gi tuno naka i Gaja, jo Kaputor ame rik obino i Kaputor, en ame oryemogi, te leyo kaoedogi oko.

²⁴‘Ya wunu doŋ iwot iŋol wunu luŋ me Arnon. Nen ba, atyeko doŋ miyo i ciŋwu Cikon abaka a jo Amor, abaka me Kecbon, karacel kede lobo mere; cak wunu gamo lobo mere bed megwu kun ilwenyo wunu i kome.

²⁵Tin abino cako miyo koyo onyere i kom rok luŋ ame tye piny i te polo kun olworowu. Ka gin bino winyo kop i komwu, komgi bino myel, kun cunygi ton atek pirwu.’

²⁶“En omio acwao kwena i tim me Kedemot baŋ Cikon abaka me Kecbon kede kop me kuc, kun akobbe ni,

²⁷‘Tim ber imia abe i loboni. Abino bea kun alubo ka yo keken, mom gira abino gak akadi tuŋ cem onyo tuŋ cam.

²⁸Cam ame abino camo kede pi i ame abino mato, ibino miya awilo awila. Wek abe kom ka i tyena,

²⁹kite ame ikwae Ecau ame bedo i Ceir kede Moab ame bedo i Ar rik otimo kede, tuno waŋ ame aŋolo Jordan akato naka i lobo ame Rwot Obaŋawa bino miyowa.’

³⁰Ento Cikon abaka me Kecbon mom oye ni wan obe i lobo mere; pien Rwot Obaŋawu omie tekcuny, cunye te bedo nwaŋ, me wek emie i ciŋwu, acalo lobo mere pwod tye i ciŋwa naka tin.

³¹Rwot te kobba ni, ‘Nen doŋ acako miyo Cikon kede lobo mere oko i ciŋi; cak doŋ gamo lobo mere bed megi, me ibed i lobo mere’.

³²Cikon karacel kede jo mere te mukere lweny i komwa i Jakaj,

³³Rwot Obaŋawa te miye i ciŋwa wan ote loye oko karacel kede awobe mere kede lwakkere luŋ.

³⁴I kare-nono wan omao boma mere luŋ, ote jwero jo i bomagi luŋ, co kede mon kede itino; mom oweko ŋattoro odoŋ.

³⁵Wan ote tero lim akwo keken ame oyako me doko megwa, karacel kede jami ocele ame oyako i boma luŋ ame omao.

³⁶Mom tye boma moro atek a rik ogero malo i wi kidi ame mayo oloowa, cakere i Areor ame tye i ŋet luŋ me Arnon kede dok cakere i boma ame tye i luŋ, tuno kede naka i Gilgal, Rwot Obaŋawa omiogi luŋ i ciŋwa.

³⁷Kadi bed amannono, lobo a jo Ammon rik mom inoko wunu ceggi, kadi en ame tye i dog kulo me Jabok onyo bomagi moro ame tye i lobo obedo kidikidi, kede kan ame Rwot Obaŋawa ogenowa iye luŋ.