Read lango Lodo Cik 20 Bible Online

Lodo Cik 20 - lango bible

Lodo Cik 20

¹“Ka ce iwoto wunu me wot lweny i kom okworwu, eka ite neno wunu aguragura kede gadigadi me lweny apipim karacel kede mony adwoŋ akato megwu oko, kur ibed wunu i lworo moro i komgi, pien Rwot Obaŋawu tye kedwu, Obaŋa ame rik okwanyowu i lobo me Miciri.

²Kare a doŋ ituno wunu ceggi i ka lweny, alamdog bino kato anyim, eka te kop i lwak.

³En bino kobbi lwak ni, ‘Winy wunu ba, wun jo Icrael; nen tin doŋ iceggi lweny wunu i kom okworwu, myero kur tipo komwu riŋ oko; kur daŋ ibed wunu kede lworo; komwu daŋ kur gire myel, dok kur daŋ inyobere wunu oko pirgi;

⁴pien Rwot Obaŋawu en ame tye awot kedwu, me wot lweny pirwu i kom okworwu, me miyowu loyogi oko.’

⁵Eka odoŋe a loo lwak te kobbi lwak ni, ‘Tye ŋattoro ame ogero ode pwod nyen ento mom ru oyabo me donyo i yie? Myero en dok i ode, naka ŋit mio en woto to oko i lweny, eka ŋat ocele en ate lunyo yabo ode.

⁶Tye ŋattoro ame opito olokkere ame mom ru ogeo camo nyige? Myero en daŋ dok tuŋe, naka ŋit en to oko i lweny eka ŋat ocele en ate lunyo camo nyig olokkere.

⁷Tye ŋatoro ame ocikere me nyomere i nyannoro ento mom ru oŋeye kede? Myero en dok paco, naka ŋit en woto to oko i lweny, eka ŋat ocele en ate lunyo nyomo nyannono.’

⁸Odoŋe a loo lwak dok te bino medo kobbi lwak ni, ‘Tye ŋattoro ame alworo, ame koyo doŋ oonyere oko i kome? Myero en dok paco pien bino miyo koyo daŋ oonyere i kom owote mere bala mege.’

⁹Kare ame odoŋe a loo lwak doŋ otyeko kop baŋ lwak, obino keto otel wi mony i ticgi me telo mony.

¹⁰“Kare a doŋ ituno wunu ceggi iboma ame iwot cobo wunu mony i kome koŋ icak cwayo wunu dwon me mito kuc iye.

¹¹Ka ce gin oye pi kac, eka daŋ ote yabbiwu dogcel, jo luŋ ame inwoŋo wunu i boma-nono bino bedo opiiwu kun otio tic atek.

¹²Ka ce gin mom oye bedo kedwu i kuc, ento gin ocako lweny i komwu, monywu bino guro bomanono oko,

¹³Ka Rwot Obaŋawu omio boma-nono i ciŋwu, myero inek wunu co luŋ iye i pala lweny.

¹⁴Ento mon kede itino, dok kede jami ocele luŋ ame tye i bomanono, jami ayaka iye luŋ, myero iyak wunu, iter wunu me bedo megwu; yomoro wunu cunywu i jami okworwu ame Rwot Obaŋawu omiowu.

¹⁵Man en gin ame ibino timo wunu i kom boma luŋ ame tye kannabor kedwu, ame mom obedo boma a rokkoro ame tye ceggi kedwu kan.

¹⁶Ento boma a jo man ame Rwot Obaŋa amiyowu me bedo megwu, mom ibino weko wunu ginnoro iye ame we doŋ akwo.

¹⁷Ento myero ijwer wunu ducu acalo gin me kwer, jo Kitti, jo Amor, jo Kanaan, jo Periji, jo Kivi, kede jo Jebuc, kite ame Rwot Obaŋawu ociko kede.

¹⁸Tim wunu man me gin kur pwonywu tiyo timgi me kwer ame nwoŋo gin otimo i woro obaŋegi; eka te miyowu balo i nyim Rwot Obaŋawu.

¹⁹“Ka ce iguro wunu boma moro kare alac, kun ilwenyo wunu pi mito ni myero ima wunu, myero kur ibabalo wunu yen i ŋete kun itoŋo wunu kede lee. Itwero camo wunu nyig yen i ŋete, ento myero kur iret wunu tyene piny. Yen daŋ odoko dano bo, ame mio wun dok imedo wunu i kom gin iguro wunu?

²⁰Kono ka yen ame iŋeo wunu ni mom ocamo nyiggi, en ame itwero balo wunu, itwero toŋo wunu me celoboma ame ilweny wunu i kome, tuno waŋ ame imako wunu boma-nono.