Read lango Lodo Cik 21 Bible Online

Lodo Cik 21 - lango bible

Lodo Cik 21

¹“I lobo ame Rwot Obaŋawu amiyowu me bedo megwu, ka ce obino nwoŋo kom ŋattoro ame oneko iye, kun tye obuto piny kan a ŋattoro mom iye, kun mom oŋeo ŋat oneko,

²odoŋe kede oŋolkop bino wot kuno, te pimo bor a piny, ya i kom dano ame oneko-nono tuno i boma acel acel ame omano ŋet ato.

³Odoŋe ame bomagi ceggi kede ato bino kela roa ame mom ru otio ticcoro, dok daŋ mom ru oowao kweri dyaŋ.

⁴Gin bino kelo roa-nono i luŋŋoro ame pii mere mol, ame mom ru opuro, akadi coyo koti moro iye. Gin bino mojoro ŋut roa-nono oko i luŋŋono.

⁵Olamdog ame obedo ikwae a jo Levi myero daŋ bed tye, pien Rwot Obaŋawu otyeko yerogi me tiyo tic baŋe kede lamo winyo kun otio i nyiŋ Rwot; pyemmoro luŋ myero ŋol kun olubo kopgi.

⁶Odoŋe luŋ ame bomagi ceggi i kom ato bino lwoko ciŋgi i kom roa ame omojoro ŋute i luŋ;

⁷kun okobo ni, ‘Ciŋwa gire mom en oonyo remo man, waŋwa daŋ mom gire oneno ka oonyo remo man.

⁸Ama Rwot, tim jo Icrael kica, ame gin obedo joni a yam ilakoro, kur imi bal me remo a mom i bal bed i akina joni Icrael; cite myero tim kica i kom bal me remo man.’

⁹Mannono bino miyo iweo wunu bal me remo a mom i bal i akinawu, ka ce itimo wunu man kakare kite ame Rwot mito.

¹⁰“Ka iwoto wunu lweny i kom okworwu, Rwot Obaŋawu te miyogi i ciŋwu, ite terogi wunu me bedo opiiwu,

¹¹ka ce ineno dako moro aber i akina opii, eka cunyi te teri i kome, kun imito iter obed dakoni,

¹²itwero tero dako-nono tuŋi. Ka en doŋ olyelo wie oko, okepo daŋ lwete oko,

¹³dok daŋ ogonyo boŋo mere me opii oko, en bino bedo i paco ni kun koko pappere kede tottere pi kare me dwe acel luŋ. I ŋe ennono, yin doŋ itwero wot bedo kede, ite doŋ bedo cware kun en bedo dak oni.

¹⁴Ka ce en mom oyomoro cunyi, ibino wek o en woto gire kan ame cunye mito. Yin mom dok ibino ca te onyo tic kede acalo opii pien yin doŋ ilane oko.

¹⁵“Ka ce lomoro tye i mon aryo, ame gin luŋ onywalle itino awobe, kun dako acel omaro, acel mom omaro, cite wode me kao obedo me a dako a mom omaro;

¹⁶i kare ame en bino poko iye limmere baŋ awobe mere acalo gin a myero gin ole, en myero kur ter wot a dako ame emaro acalo wode me kao akaka wot a dako a mom omaro, ame obedo wode me kao ikokome.

¹⁷Ento myero nyut ni wode me kao kun dodo gin ame apokke iryo i kom jami luŋ a en tye kede, kadi bed totteere mom omaro, pien en obedo wode ame teko mere me agege ogeo miyo poto, twer me bedo atin kao nwoŋo gire mege.

¹⁸“Ka ce lomoro tye kede wode ame apala, ame maro jem, a mom winyo kop a pappere onyo kop a tottere, akadi gin goe, en gire mom winyogi,

¹⁹pappere kede tottere myero make te kele i dogcel me boma baŋ odoŋe me boma a en bedo iye.

²⁰Gin bino kobo baŋ odoŋe ni, ‘Atinwa-ni obedo awobi ame apala, ame maro jem, kun kare luŋ en mom winyowa, owor meicel dok daŋ amero.’

²¹Jo luŋ me boma-nono bino neke oko kun onanapo en kede gweŋe. Mannono bino miyo iweo wunu bal i akinawu. Jo Icrael luŋ bino winyo pire, te bedo kede lworo.

²²“Ka ce dano moro otimo balloro ame cannere romo to, eka daŋ ote neke, ote ŋabo kome i kom yat,

²³mom obino weko kome bedo i kom yat i dyewor luŋ. Myero yik kome oko i nino-nono; pien ŋat ame oŋabo kome i kom yat nwoŋo obedo dano ame Obaŋa oceno. Myero kur ibal lobowu ame Obaŋa amiyowu me bedo megwu.