Read lango Lodo Cik 22 Bible Online

Lodo Cik 22 - lango bible

Lodo Cik 22

¹“Ka ce ineno twon ominni onyo romo mere ame orwenyo, myero kur ikwer miyo kony i komgi. Dwokgi cen baŋ ominni.

²Ka wonnere mom bedo kan aceggi kedi onyo mom iŋec, myero iter lee mere-nono i paconi me koŋ bed baŋi, tuno waŋ ame wonnere oyenyo; eka ite dwoko baŋe.

³Ibino daŋ timo kittono ka ce inwoŋo kana mere, boŋo mere, onyo kit ginnoro keken ame orwenyo i baŋ ominni, yin ite nwoŋo; myero kur ikwer miyo iye kony.

⁴Ka ce ineno kana a ŋattoro onyo twonnere orette oko piny i ŋet yo, myero kur ikwer miyo kony i komgi. Konye tiŋo ya malo.

⁵“Dako myero kur rukere bala ico, akadi ico daŋ myero kur ruk boŋŋi a mon; pien ŋat ame timo kodi ginnono, doko gin me kwer baŋ Rwot Obaŋawu.

⁶“Ka ce icop i ot winyo moro ame tye i yat onyo i lobo piny, ame tye iye itino onyo toŋe kun totogi daŋ tye obuto iye, mom ibino mako itero karacel kede itino mere.

⁷Myero iwek totogi woti, ento itino itwero tero; me nyimi bed acil, dok daŋ iperakino.

⁸“Ka igero ot anyen, myero imi apama i wi ot kat malo, pien ka mom itimo kittono, ka ŋattoro orette iye, bino miyo bal me remo bedo i odi.

⁹“Mom ibino coyo kit koti aryo apapat i poto olokki. Ka ce itimo, ibino miyo gin ame ocek iye luŋ otero oko i kabedo acil, me koti icoo kede nyig olok daŋ,

¹⁰Kur itwe twon karacel kede kana i kweri dyan.

¹¹Mom ibino ruko boŋo moro ame orubere aruba, yer romo kede camanini.

¹²Ibino kwoyo awula aŋwen i lak boŋo ame iwumere kede.

¹³“Ka ce lo moro onyomo cege, eka te cako ribere kede, icennere dok te kwerre oko,

¹⁴kun pide pido me lewic dok daŋ balo nyiŋe kun kobo ni, ‘An anyomo dako man, cite i kare ame acako ribere kede, mom anwoŋo ginnoro ame cimo ni en mom ru oŋeye kede ŋattoro.’

¹⁵Papa a nyako-nono kede tottere bino kwanyo ginnoro a nyuto ni en gire mom ru oŋeye kede lo moro, gin te kelo baŋ odoŋe me boma i ka ŋolo kop.

¹⁶Papa a nyako te kobo ni, ‘An onwoŋo amio nyara baŋ lo-ni me bedo dako mere, cite en gire dokokwero oko.

¹⁷Koŋ inen wunu, en dokopide pido me lewic, kun kobo ni, “An mom anwoŋo ginnoro ame cimo ni nyari mom ru oŋeye kede ico.” Aco kono ka bedo amannono, gin ame cimo ni nyara mom ru oŋeye kede ico ene’. Gin bino yaro boŋo-nono i nyim odoŋe me boma-nono.

¹⁸Odoŋe me boma-nono bino tero lonnono ote wot pwode.

¹⁹Ote daŋ taŋe, miye culo cekel me ryal mia acel, eka ote miyo baŋ papa a nyannono, pien obalo nyiŋ nyaka a jo Icrael. Nyannono bino bedo cege atwal kun mom dok eryemo.

²⁰Ento ka ce obedo kop ateni, kun mom tye ginnoro ame cimo ni nyannono mom ru oŋeye kede lo moro,

²¹obino tero nyannono i dog ot a pappere, jo me boma-nono te neko oko kun onanapo kede gweŋe, pien otimo gin a mom myero iyi Icrael pi cako cot kun pwod onwoŋo tye i ot a pappere. Myero iwe wunu bal i akinawu kittono.

²²“Ka ce onwoŋo lo moro tye abuto i dako a ŋat ocele, gin aryo luŋ obino nekogi oko; lon ame obuto i dako karacel kede en dako. Myero iwe wunu bal i akina jo Icrael kittono.

²³“Ka ce nyannoro a mom ŋeo ico, ame ocako nyomere oko gin ico ocele, ka ŋattoro orwatte kede i boma te mako buto kede,

²⁴gin aryo luŋ obino kelogi i dogcel me boma ote nekogi oko kun onanapogi kede gweŋe. Nyako obino neko pien en mom okuko duro kun en rik onwoŋo tye i dye boma; ico obino neko pien omako dako awottere tetek. Myero iwe wunu bal i akinawu kittono.

²⁵“Ento ka ce ŋattoro orwatte kede nyannoro i dye tim ata, nyako a mom ru oŋeye kede lo moro, ame onwoŋo doŋ ocako nyomere oko kede lo moro, ka ce lonnono omako te buta kede, obino neko ka ico keken.

²⁶Ento nyako mom obino timo ginnoro i kome, pien mom tye balloro ame nyako otimo ame romme to. Bal man rom aroma kede me a ŋat ame olwenyo awottere te neko oko;

²⁷pien lo-ni orwatte kede nyako i dye tim ata akadi nyako ame onwoŋo ocako nyomere oko-ni kuk duro, lon ame twero lare onwoŋo mom tye.

²⁸“Ka ce lo moro orwatte kede nyannoro a mom ru oŋeye kede ico, a mom ru daŋ ocako nyomo, eka en te mako buto kede, ote daŋ nwoŋogi,

²⁹lon ame obuto kede-nono bino miyo baŋ papa a nyako cekel me ryal pyerabic. Nyannono doŋ bino bedo dako mere atwal kun mom ryemo, pien omake tetek.

³⁰“Lo moro mom bino nyomo ci-pappere; akadi buto i ci-pappere, pappere gire en ame buto kede.