Read lango Lodo Cik 23 Bible Online

Lodo Cik 23 - lango bible

Lodo Cik 23

¹“Ŋat ame odino mane oko onyo lon ame oŋolo keme me co oko mom bino donyo i cokere a Rwot.

²“Atinnoro ame onywalo i nyom ame cik ogeŋo mom bino donyo icokere a Rwot, akadi naka iyi ikwae a tye i lwagi me apar, moro iye mom bino donyo i cokere a Rwot.

³“Jo Amon kede jo Moab mom bino donyo i cokere a Rwot; akadi moro i akina ikwaegi, tuno naka i lwagi ikwaegi me apar, mom bino donyo kadi acel i cokere a Rwot,

⁴pien gin rik mom ojolowu i yo i kwon kede i pii, i kare ame ibino wunu i Miciri, dok daŋ rik obino opaŋo Balaam wot a Beor me Petor i Mecopotamia, me bino cenowu.

⁵Cite Rwot Obaŋawu rik mom owinyo Balaam, ento Rwot Obaŋawu rik te lunyo loko ceŋ doko gum pirwu, pein Rwot Obaŋawu onwoŋo marowu.

⁶Kur itim wunu ginnoro i kare luŋ me kwowu, ame twero miyogi obedo i kuc onyo obedo aber.

⁷“Ento kur ikwer wunu dano moro me Edom, pien en obedo ominwu; kur daŋ ikwer wunu dano moro me Miciri, pien rik ibedo wunu i lobogi,

⁸Ikwaegi ame onywalo baŋgi, ame obedo lwagi me adekkere twero donyo i cokere a Rwot.

⁹“Ka iwoto wunu lweny i kom okworwu, kun ibedo wunu i gony, myero igwokere wunu atek i kom gin arac ducu.

¹⁰“Ka ce dano moro i akinawu odoko ŋat a cik ogeŋo pi ginnoro ame onwoŋo otimere baŋe dyewor, en myero ya oko i gony, kur daŋ dok dwog i gony.

¹¹Cite i kare a doŋ piny oyuto, en bino lwoko kome kede pii, me wek i kare ame cen doŋ opoto oko, en te dwogo i gony.

¹²“Ibino yiko wunu kakannoro oko i ŋe gony me konyere.

¹³I kare ame iwoto konyere, kuny bur i lut me kunyo bur ame nwoŋo tye i ciŋi karacel i jami lweny meri, ite lokere wumo coronni oko.

¹⁴Pien Rwot Obaŋawu bedo wiwira i gonywu, me larowu kede miyo okworwu i ciŋwu. Pi mannono myero gonywu bed acil, me en kur dok nen ginnoro me lewic, ame te miyo en wekowu oko.

¹⁵“Ka opii moro olwi oko te riŋo laro baŋi, myero kur idwok baŋ wonnere.

¹⁶Ento myero bed i lobowu i boma moro ame en oyero. Yin kur dokidiye i yo moro.

¹⁷“Anyira a jo Icrael mom bino bedo alaya pi woro cal jogi akadi awobe a jo Icrael myero daŋ kur tim timmoro me alaya pi woro cal jogi.

¹⁸Lim ame onwoŋo pi tim me alaya onyo timmoro me carocaro acalo gwok, myero kur kel i ot a Rwot Obaŋawu, me amia me cobo kwoŋ. Pien kodi timmono, gin aryo luŋ obedo me kwer baŋ Rwot obaŋawu.

¹⁹“Mom ibino miyo ominni moro kopporo ginnoro i baŋi pi mito agoba, mom ibino mito agoba i kom lim, i kom cam, onyo i kom ginnoro ocele ame oculo iye agoba.

²⁰Itwero miyo arok kopporo banya baŋi pi mito agoba, ento ominni mom ibino miyo kopporo baŋ ya pi mito agoba; wek Rwot Obaŋani omi gum i kom ticcoro ducu ame ciŋi ogudo i lobo ame iwot donyo iye me bedo megwu.

²¹“Ka ce ikwoŋo kwoŋŋoro baŋ Rwot Obaŋani, myero iru cobo; pien Rwot Obaŋani bino penyi pire, eka te doko bal baŋi.

²²Ento ka ibedo aboŋo kwoŋo kwoŋŋoro, bal mom bino bedo i komi.

²³Myero igwokere meicel icobo gin ame oya i dogi, pien yin giri ikwoŋo piri keni baŋ Rwot Obaŋani, i gin ame iciko giri i dogi.

²⁴“Ka ce iwoto i poto olok awotti, itwero camo giri nyige abup acalo itwero, ento myero kur icok mogo i ony i ditani.

²⁵Dok daŋ ka iwoto i poto kal awotti ame ocek kun mom ru akao, itwero jako wite moro kede ciŋi, cite myero kur imi alwete gud ŋut kal awotti ame ocek, ocuŋ i dye poto.