Read lango Lodo Cik 24 Bible Online

Lodo Cik 24 - lango bible

Lodo Cik 24

¹“Ka ce lo moro otero dako, eka te nyomo bedo cege; ka ce icennere en te nwoŋo ni mom oyomoro cunye pien ginnoro me lewic tye i kome, en myero coye waraga me keto nyom, te miyo i ciŋe eka te ryeme kede oko i tuŋe, dako-nono doŋ te ya oko i paco mere.

²Ka ce en owoto te doko wot nwoŋo cware ocele,

³ka ce cware-naca te ryeme oko i tuŋe, onyo ka cware ame dok onyome-naca oto oko,

⁴cware ame rik ogeo nyome myero dok kur bed kede acalo cege, pien en doŋ oballe oko. Kodi timmono obedo gin me lewic i nyim Rwot, dok myero kur dok ikel bal i lobo ame Rwot Obaŋani amiyowu me bedo megwu.

⁵“Ka ce lo moro pwod onyomere nyen, en myero kur wot i lweny dok daŋ myero kur mie ticcoro; en myero bed paco tuŋe mwaka acel, ocob mittere gin kede dako mere ame enyomo.

⁶“Ŋattoro myero kur jeŋ kidi rego onyo anya kidi, pien mannono rom ame ojeŋo kwo a dano.

⁷“Ka ce onwoŋo dano moro tye amako ominnere ame obedo dano me Icrael me acata acalo opii, kun tere acalo opii onyo doŋ ocato oko akwonono myero nek oko. Mannono bino miyo iweo wunu bal i akinawu.

⁸“Gwokere atek i kom two dobo; myero igwokere wunu atek kun itio wunu ginnoro ducu kite ame olamdog ame gin jo Levi otittiwu. Kite ame an acikowu kede, en ame wun daŋ ibino gwokere wunu iye atek me cobo.

⁹Koŋ ipoyo wunu i kom gin ame Rwot Obaŋawu otimo i kom Miriam iyo, i kare ame iya wunu i Miciri.

¹⁰“Ka ce imio awotti moro okoporo banya baŋi, mom ibino wot donyo i ode omo gin ame en ojeŋo baŋi.

¹¹Yin myero iwot icuŋ i oko, eka ŋat ame yin imio okoporo banya-nono en ame te kelo gin ejeŋo baŋi.

¹²Dok ka ce dano-nono acan, gin ame en ojeŋo myero kur but baŋi.

¹³Ka ceŋ doŋ ceggi poto oko, myero kur idwok gin ame en ojeŋo oko baŋe me en but iye, eka te lammi winyo. Ka ce itimo kittono, Rwot Obaŋani bino neni acalo dano a kite atira.

¹⁴“Kur ibur apakaca ame acan, ame mito akonya, kadi bed en obedo ominni moro me Icrael onyo arokkoro ame bedo i boma moro ame tye i lobowu.

¹⁵Myero imie ocara mere me nino acel acel me en cam oko kun ceŋ mom ru opoto, pien en acan, mannono nwoŋo obedo gin ame en ageno; naka mio en kok i komi i nyim Rwot, eka te doko bal baŋi.

¹⁶“Mom obino neko apap pi bal itino, dok daŋ mom obino neko itino pi bal apap; obino neko ŋat acel acel pi ballere kene.

¹⁷“Mom ibino balo pido arokkoro onyo atin kiccoro; dok daŋ myero kur ikwany boŋo a dako moro a cware oto acalo gin ame ojeŋo baŋi.

¹⁸Ento myero ipo ni wun daŋ yam koŋ ibedo wunu opii i lobo Miciri, eka Rwot Obaŋawu te lakorowu i kuno; mannono en omio aciko ni myero itim wunu man.

¹⁹“I kare me kayo kac i potoni, ka ce wii owil arita moro i poto, myero kur dok iwot iom; mannono doŋ bino bedo me arokkoro ame bedo i akinawu, onyo me atin kic, kede me a dako a cware oto; mannono bino miyo Rwot Obaŋa mio winyo i kom ticcoro luŋ ame ciŋi ogudo.

²⁰Ka doŋ ityeko pwono nyig jeitunini oko, myero kur dok imed yenyo en obwottege; mannono doŋ bino bedo me arok ame bedo i akinawu me atin kic kede me a dako a cware oto.

²¹Ka doŋ ityeko coko nyig olokki oko, myero kur dok imed depo en obwottege; mannono doŋ bino bedo me a rok, me atin kic kede me a dako a cware oto.

²²Myero ipo ni wun daŋ yam koŋ ibedo wunu opii i lobo me Miciri; mannono en omio aciko ni myero itim wunu man.