Read lango Lodo Cik 25 Bible Online

Lodo Cik 25 - lango bible

Lodo Cik 25

¹“Ka ce jo moro onwoŋo tye kede pyem i akinagi, eka gin te wot kede i nyim aŋolkop, aŋolkop te poko kingi, kun tuco ŋat ame balloro mom i kome, eka te ŋolo kop loyo ŋat a bal tye i kome.

²Ka ce aŋolkop mito ni pwod ŋat ame oroco-nono, en bino miyo dano-nono buto piny i nyime, ote pwode i wel lut ame oŋolo, ame romo ballere.

³Myero pwode kede lut a mom kato pyeraŋwen; naka mio ka obedo pwode atek ateka ame okato wel lut man oko, mio dok lano ominwu alana i nyimwu.

⁴“Kur itwe dog twon ka adino kal.

⁵“Ka ce i kom omego ame bedo karacel, ŋat acel i akinagi te to oko kun mom oweko wode moro, dako ato mom bino nyomere i lo moro ocele ame obedo welo, a mom obedo dano me doggolagi; omina cware en ame bino donyo baŋe, te lake bedo cege, eka te cobo tic me bedo cware akaka ominnere.

⁶Wode ame ebino geyo nywalo, obino cako nyiŋe i nyiŋ ato, me nyiŋe kur rweny oko iyi Icrael.

⁷Ka ce omin ato mom mito lako ci-ominnere, dako bino wot i dogcel me boma baŋ odoŋe, te wot kobo ni, ‘Amuna mom gire tye atimo ginnoro me miyo nyiŋ ominnere bedo tye iyi Icrael; en okwero cobo tic a yam ominnere cobo i koma acalo cwara.’

⁸Odoŋe me bomagi-nono bino cwane baŋgi, te kop kede. Ka ce en omedde kwero gire kun kobo ni ‘An gira mom aye lako dako-nono’,

⁹ciominnere-nono bino wot baŋe i nyim odoŋe, te wot woto amuk i tyene tuŋ cel oko, te ŋulo daŋ lao i waŋe; eka dako te kobo ni, ‘Lon ame okwero miyo ot ominnere cuŋ obino timo kittono.’

¹⁰Nyiŋ ode iyi Icrael obino lwoŋo ni, ‘Ot a lon ame owoto amuk i tyene tuŋ cel oko-ni.’

¹¹“Ka ce jo mogo onwoŋo tye aromo, eka dako a ŋat acel i akinagi te wot baŋgi me wot laro cware i ciŋ ŋat ame onwoŋo tye aromo kede, ka ce en ocwao ciŋe te mako kom lonnaca me co,

¹²myero ŋol ciŋ dako-nono oko; kica kur makwu i kome.

¹³“Myero kur ibed wunu i mijan me pimo jami a kite aryo iyi cao-ni; en apekkere kede en ayottere.

¹⁴Mom ibino bedo daŋ i gwata pimo jami a kite aryo i odi, en adwoŋŋere kede en atidi mere.

¹⁵Myero ibed i kidi pimo jami a tye aber, ame pimo jami kakare, me iperakino i lobo ame Rwot Obaŋani omiowu.

¹⁶Pien jo luŋ ame timo kodi tim man, kede jo luŋ ame tiyo gin a mom atira, gin obedo gin me kwer baŋ Rwot Obaŋawu.

¹⁷“Koŋ ipoyo gin ame Amalek rik otimo i komwu i yo i kare ame iya wunu i Miciri,

¹⁸kite ame en olwenyo kede i komwu iyo, i kare a rik iol wunu meicel, a teko moro doŋ mom i komwu; ame gin te ŋolo jo a rik odoŋ cen i ŋewu, kun mom daŋ olworo Obaŋa.

¹⁹Pi mannono ba, ka ce Rwot Obaŋawu doŋ omiowu iwe wunu oko i lweny i kom okworwu ame omanowu, i lobo ame Rwot Obaŋawu amiyowu me bedo megwu, ibino jwerogi wunu oko me wi jo luŋ i te polo kur dok poyo jo Amalek; myero wii kur wil i kop man.