Read lango Lodo Cik 26 Bible Online

Lodo Cik 26 - lango bible

Lodo Cik 26

¹“Ka doŋ ituno wunu i lobo ame Rwot Obaŋawu amiyowu me bedo megwu, ame daŋ doŋ igamo wunu oko, i te bedo wunu iye,

²ibino tero wunu cammogo i kom cam luŋ ame ogeo cek me wi mwaka, ame ikaa wunu i lobowu ame Rwot Obaŋawu amiyowu; ibino kwanyo ite keto i dita, ite tero i kabedo kan ame Rwot Obaŋawu bino yero.

³Ibino wot baŋ alamdog ame onwoŋo tye atic i kare-nono, ite kobbe ni, ‘Tin doŋ atuco oko kannaler baŋ Rwot Obaŋani ni, doŋ otyeko tuno i lobo ame ric Rwot okwoŋo baŋ kwariwu ni ebino miyo baŋwa’.

⁴Alamdog bino gamo dita oko i ciŋi, te keto piny i nyim keno lam a Rwot Obaŋani.

⁵“Eka yin ite dok iye kit man i nyim Rwot Obaŋani ni, ‘Kwarona rik obedo dano me Aram, ame rik obedo aloŋpiny meicel; en rik obin owoto i Miciri, te wot bedo kuno, kun welgi gire nonok; i kuno en te doko twon rokkoro adwoŋ, atek, dok ame jo mere onya apol meicel.

⁶Jo Miciri rik te tic kedwa agwa meicel, owunowa, ote miyowa tiyo tic apek me opii opii.

⁷Wan rik ote kok baŋ Rwot Obaŋa a kwariwa, Rwot daŋ rik te winyo kokowa, te daŋ neno kite ame owunowa kede, kede aroma me tic ame oketo i komwa, kede kite ame odiowa kede.

⁸Eka Rwot te kwanyowa oko i Miciri kede ciŋe atek, kede bade ame oryeo, kede twon lworo adwoŋ, kede anyuttogo, kede taŋo mogo me awura.

⁹En rik te kelowa kan, te miyowa lobo man, lobo ame cak kede moo kic dwoŋ iye meicel.

¹⁰Nen ba, an en doŋ akelo cam ame ogeo cek me wi mwaka, ame oya i lobo ame yin giri, Ama Rwot, en imia’. Ka doŋ ite keto piny i nyim Rwot Obaŋani, ite wore;

¹¹eka yin karacel kede Olevi kede orok ame bedo i akinawu, ite yomoro wunu cunywu i gin abeco ame Rwot Obaŋawu omio baŋi kede baŋ jo me odi.

¹²“Ka doŋ ityeko miyo acel me apar me ginnoro luŋ ame oya i poto, ame omio i ŋe mwaka adek adek, ame obedo mwaka me miyo acel me apar, me amia baŋ Olevi, orok, otino kic, kede mon a coggi oto, me gin cam i dye bomawu, ote yeŋ,

¹³ibino daŋ kobo i nyim Rwot Obaŋani ni, ‘Atyeko doŋ kwanyo jami acil oko i oda, atyeko daŋ doŋ miyo oko baŋ jo Levi, baŋ orok ame bedo i akinawa, otino kic, kede mon a coggi oto, kun alubo cik luŋ ame icika kede. Mom tye cikki moro ame mom alubo kakare, dok daŋ mom tye moro ame wia owil iye.

¹⁴I kare ame atye ka kwero cola, mom gira acamo acel me apar, akadi kwanyo moro iye me yalo tipo a ŋat oto; an gira awinyo kop a Rwot Obanana, atio ginnoro ducu ame icika iye.

¹⁵Kul waŋi piny i polo, i kabedoni acil, me inen piny, imi winyo baŋ joni Icrael kede lobo ame imiowa, lobo ame cak kede moo kic dwoŋ iye meicel, kite ame rik ikwoŋo kede baŋ kwariwa’.

¹⁶“Tin Rwot Obaŋawu ocikowu me cobo icwil magi kede gin ame en ociko luŋ; pi mannono, myero igwokere atek me cobogi luŋ kede cunyi ducu kede tiponi ducu.

¹⁷Tin yin giri doŋ ituco kop i kom Rwot ni en obedo Obaŋani, dok daŋ yin ibino lubo yo mere kun imako icwillere, kede cikkere, karacel kede gin ame en ociko luŋ, dok daŋ ni ibino winyo koppere.

¹⁸Rwot daŋ tin doŋ otuco kop i komwu ni wun doŋ idoko wunu rok ame obedo mere en ikome, kite a rik ocikowu kede, dok daŋ ni wun myero imak wunu cikkere luŋ,

¹⁹dok daŋ ni en ebino miyowu ibedo wunu rok amalo akato rok ocele luŋ ame en eketo; jo bino pake pirwu, dok daŋ ni wun ibino bedo wunu jo aci ame obedo jo a Rwot Obaŋawu ikokome kite a rik ekobo kede.”