Read lango Lodo Cik 27 Bible Online

Lodo Cik 27 - lango bible

Lodo Cik 27

¹Muca kede odoŋe me Icrael rik te ciko lwak ni, “Mak wunu cik luŋ ame acikowu kede tin.

²I nino ame ibino wunu ŋolo Jordan idonyo wunu i lobo ame Rwot Obaŋawu amiyowu ibino cibo wunu twoni gweŋe mogo adoŋo kuno, ite puyo wunu komgi oko kede coka.

³Co i komgi kop luŋ me cik man, ka ikato wunu loka idonyo wunu i lobo ame Rwot Obaŋawu amiyowu, lobo ame cak kede moo kic dwon iye meicel, kite ame Rwot, ame en Obaŋa a kwariwu, rik ocikowu kede.

⁴Ka doŋ iŋolo wunu Jordan, ibino cibo wunu gweŋe magi ame acikowu pirgi tin-ni, ibino cibo wunu i kor kidi me Ebal, eka ite puyo wunu komgi oko kede coka.

⁵Ibino wunu daŋ cano keno me lam kuno, pi Rwot Obaŋawu, keno lam me kiddi; mom ibino wunu tiŋo nyonyo moro me payogi.

⁶Ibino canni wunu Rwot Obaŋawu keno lam, keno lam me kiddi a mom opao; ite miyo wunu iye mot awaŋa me yalo Rwot Obaŋawu;

⁷ite ŋolo wunu daŋ iye motwu me kweyo cuny, ite camo wunu oko kuno, ite lelo wunu i nyim Rwot Obaŋawu.

⁸Co wunu kop luŋ me cik man i kom k iddi-nono. Co wunu aber meicel ame kwano yot.”

⁹Muca kede olamdog ame gin jo Levi, te kobbi jo Icrael luŋ ni, “Liŋ wunu mot, me iwiny wunu kop, wun jo Icrael: Tin doŋ wun idoko wunu jo a Rwot Obaŋawu.

¹⁰Pi mannono myero doŋ iwiny wunu kop a Rwot Obaŋawu, kun imako wunu cikkere kede icwillere luŋ, ame acikowu kede tin.”

¹¹I nino-nono ikome Muca rik te ciko jo kit man ni,

¹²“Ka doŋ ityeko kato wunu loka Jordan, jo me atekere magi bino cuŋ i wi kidi me Gerijim me lammi jo winyo: Cimeon, Levi, Juda, Icakar, Yucepu, kede Benjamin.

¹³Eka jo me atekere man te cuŋ i wi kidi me Ebal pi ceno jo: Reuben, Gad, Acer, Jabulon, Dan kede Naputali.

¹⁴Jo Levi bino kobbi jo Icrael luŋ kop man kun oredo kede i dwon aloŋo ni:

¹⁵“Ŋat ame bino tiyo cal jokkoro ame opao apaa onyo ame otwako atwaka, ame gin obedo gin me kwer baŋ Rwot, gin ame adiro otio kede ciŋe, te keto me awora, cen myero mak oko! Lwak luŋ bino gamo ni, ‘Amen.’

¹⁶“ ‘Ŋat a mom woro pappere kede tottere, cen myero mak oko.’ Lwak luŋ bino gamo ni, ‘Amen.’

¹⁷“ ‘Ŋat ame bino kobo waŋ kina me poko waŋ lobo awottere cen myero mak oko.’ Lwak luŋ bino gamo ni, ‘Amen.’

¹⁸“ ‘Ŋat ame bino miyo atowaŋ lubo yo apat, cen myero mak oko.’ Lwak luŋ bino gamo ni, ‘Amen.’

¹⁹“ ‘Ŋat ame balo pido arokkoro, atin kic kede me a dako a cware oto, cen myero mak oko.’ Lwak bino gamo ni, ‘Amen.’

²⁰“ ‘Ŋat ame bino buto i ci-pappere, cen myero mak oko, pien en obuto dako a pappere gire en ame bu to kede,’ i Lwak luŋ bino gamo ni, ‘Amen.’

²¹“ ‘Ŋat ame bino buto kede lee, cen myero mak oko.’ Lwak luŋ bino gamo ni, ‘Amen.’

²²“ ‘Ŋat ame bino buto aminnere, kadi aminnere me papo onyo me toto, cen myero mak oko.’ Lwak luŋ bino gamo ni, ‘Amen.’

²³“ ‘Ŋat ame bino buto i tota a dako mere, cen myero mak oko.’ Lwak luŋ bino gamo ni, ‘Amen.’

²⁴“ ‘Ŋat ame bino neko awottere i muŋ, cen myero mak oko.’ Lwak luŋ bino gamo ni, ‘Amen.’

²⁵“ ‘Ŋat ame bino gamo lim i muŋ me wile me enek ŋat a mom iballoro, cen myero mak oko.’ Lwak luŋ bino gamo ni, ‘Amen.’

²⁶“ ‘Ŋat amom bino moko kop ame tye i cik man i tic, cen myero mak oko.’ Lwak luŋ bino gamo ni, ‘Amen.’