Read lango Lodo Cik 28 Bible Online

Lodo Cik 28 - lango bible

Lodo Cik 28

¹“Ka ce ibino winyo wunu kop a Rwot Obaŋawu kun igwokere wunu i cobo cik luŋ ame acikowu kede tin, Rwot Obaŋawu bino miyowu ibedo wunu rok amalo akato rok ocele luŋ ame tye i lobo.

²Ka ce iwinyo wunu kop a Rwot Obaŋawu, gum magi luŋ bino bedo megwu.

³Gum bino makowu i boma, gum bino bedo i komwu i poto.

⁴Gum bino bedo i kom itinowu ame ibino nywalo wunu, kede i kom gin ame bino cek i pottiwu, winyo bino bedo i kom limwu luŋ akwo; dokwu bino nya kede itino rommiwu kede dyegiwu.

⁵Gum bino bedo i kom ditawu kede i kom takowu me kwon.

⁶“Ibino bedo wunu kede gum i kare ame idonyo wunu i ot, dok daŋ ibino bedo wunu kede winyo i kare ame ikato wunu oko.

⁷“Rwot bino miyo iloo wunu okworwu ame bino lweny i komwu; gin bino ciro me bino i komwu i yo acel keken, cite gin obino riŋowu kun opokere i yo abiro apapat.

⁸Rwot bino miyo gum bedo i derewu kede i ginnoro luŋ ame ciŋwu otio, dok en bino miyowu gum i lobo ame Rwot Obaŋawu bino miyowu.

⁹Ka ce imako wunu cik a Rwot Obaŋawu luŋ kun ilubo wunu yo mere luŋ, Rwot bino miyo ibedo wunu jo acil ame obedo jo mere en ikokome, kite a rik en okwoŋo kede baŋ baŋwu.

¹⁰Jo luŋ me wi lobo bino neno ni wun olwoŋowu i nyiŋ Rwot; gin te bedo kede lworo i komwu.

¹¹Rwot bino miyo jami nya baijwu, bino miyo itino ame inywalo wunu nya, limwu akwo daŋ bino nya atek, cem bino cek abup i pottiwu, i lobo ame Rwot rik okwoŋo pire baŋ kwariwu me miyowu.

¹²Rwot bino yabbiwu polo ame en kano iye lonyo mere amalo meicel, me miyo kot cwe i pottiwu i kare mere i kome kede miyo gum i kom tic luŋ ame ciŋwu ogudo. Mannono bino miyo imio wunu rok apol kopporo banya baŋwu, cite wun mom myero ikoporo wunu ginnoro i baŋgi.

¹³Rwot bino miyo kare ducu wun en ame itelo wunu wi jo, ento mom wun en ame icoko wunu; kare luŋ wun ibino medde wunu ameda anyim kun mom idok wunu cen; ka ce iwinyo wunu cik a Rwot Obaŋawu luŋ ame acikowu kede tin-ni, kun igwokere wunu me cobogi,

¹⁴dok ka ce mom igaka wunu i ciŋwi tuŋ cem onyo tuŋ cam i kom kopporo acel ame acikowu kede tin-ni, kun mom ilubo wunu obaŋe mogo ocele mom daŋ iworogi wunu.

¹⁵“Ento ka ce mom iwinyo wunu kop a Rwot Obaŋawu, onyo mom igwokere wunu icobo cikere luŋ kede icwillere ame acikowu kede tin-ni, cen magi bino makowu:

¹⁶Cen bino makowu kakannoro luŋ ame itye wunu iye, i boma kede i poto.

¹⁷Cen bino bedo i kom ditawu kede i kom takowu me kwon.

¹⁸Cen bino bedo i kom itinowu ame ibino nywalo kede i kom camwu ame cek i pottiwu, i kom limwu akwo ame nya kede i kom itino rommiwu.

¹⁹Cen bino makowu i kare ame idonyo wunu i ot kede i kare ame ikato wun oko.

²⁰“Rwot bino cwalo cen i komwu, ibino bedo wunu ababaŋ i ginnoro luŋ ame itio wunu, kun komwu nyoŋere oko, ituno waŋ ame ito wunu, iru tum wunu oko pi timwu areco, dok pien iweka wunu oko.

²¹Rwot bino miyo too edeke agwa makowu tuno waŋ ame onekowu oko luŋ i lobo ame iwot donyo wunu iye me gamo bedo megwu.

²²Rwot bino pwodowu i two me aola owio, kede aburu kede two ame wawaŋo kom jo, kede twon lyeto adwoŋ meicel; kun kot mom cwe, yamo oro kodo alyet meicel, dok daŋ bino miyo wit kal ner oko onyo mwato oko. Can magi luŋ bino lubo yorwu tuno waŋ ame ito wunu oko.

²³Polo ame tye i wiwu malo bino bedo atek calo mola, kede lobo ame tye i te tyenwu piny bino bedo atek calo nyonyo.

²⁴Rwot bino miyo aburu kede apua en ame cwe i lobowu akaka kot; gin bino ya i polo corre i komwu tuno waŋ ame ito, itum wunu ducu.

²⁵“Rwot bino miyo okworwu loowu; ibino ciro wunu me wot i komgi i yo acel keken, ite riŋogi wunu kun ipokere wunu i yo abiro apapat. Jo me lobo luŋ ame tye i wi podo bino bedo i twon lworo adwoŋ meicel pi gin ame otimere i komwu.

²⁶Komwu ame oto bino bedo cam a winy kede me a leyi me tim, kun ŋattoro a ryemogi mom.

²⁷Rwot bino pwodowu kede edeke me Miciri kede bur adola, kede nyac, kede gwenyo ame caŋo bino loyowu oko.

²⁸Rwot bino pwodowu i too me apoa, kede towan kun daŋ babano tamwu oko.

²⁹Ibino tyamere wunu atyama i cuny dyeceŋ, kite ame atowaŋ tyamere kede ka piny col, mom ibino bedo wunu kede gum i yo moro ducu ame ibino wunu lubo. Jo bino diyowu kun daŋ oyakowu kare luŋ, ento ŋattoro a konyowu bino bedo pe.

³⁰Ibino cikere me nyomere wun kede nyannoro, cite lo ocele en ame bino buto kede; ibino gero ot, cite mom ibino bedo iye; ibino pito poto olokki, cite mom ibino bilo nyige.

³¹Obino neko twonni kun ineno, cite mom ibino bilo riŋo mere; obino mayo kanani tetek, otero oko i nyimi, cite mom dok obino dwogo baŋi; obino miyo rommini baŋ okworri, cite ŋattoro a konyi bino bedo pe.

³²Awobeni kede anyirani obino miyo baŋ rok ocele kun yin ineno, ibino parogi cen iyul, cite ginnoro i tim i komgi bino loyi oko, pien mom ibino bedo kede twerroro me geŋogi wot.

³³Rok ame yam mom iŋeo en ame bino camo gin ame ocek i pottiwu, ginnoro luŋ ame iyele atek i ticcere; gin bino diyi kun owuni kare luŋ.

³⁴Kodi gin ame waŋi bino bedo neno-nono, bino miyo wii balle oko.

³⁵Rwot bino miyo twoni odeke mogo alit meicel kwokwota i coŋi kede i tyeŋi ame caŋo bino loyi oko, cakere it yeni piny tuno kede i taddi wii malo.

³⁶“Wun karacel kede abakawu ame ibino keto wunu me loyowu Rwot bino terowu baŋ rok ame yam wun kede kwariwu mom iŋeo wunu, kan ame ibino woro wunu iye obaŋe mogo ocele ame otio i kiddi kede yen.

³⁷Ibino doko wunu gin ame kelli jo lworo, gi-ciŋa kede gi-aboka i akina rok luŋ ame Rwot bino terowu iye.

³⁸Ibino coro wunu koti adwoŋ meicel i pottiwu, cite ibino depo wunu aduno morome dwoggo paco, pien bonyo bino camo oko.

³⁹Ibino pito wunu poto olokwu, ite daŋ gwoko wunu aber, cite mom ibino wunu mato koŋo mere, akadi coko nyiggi, pien kudi bino camo oko luŋ.

⁴⁰Jeituni bino durre ata i lobowu luŋ, cite mom ibino wir wunu kede moo mege, pien nyiggi bino ony oko,

⁴¹Ibino nywalo wunu awobe kede anyira, cite gin luŋ mom bino bedo megwu; pien obino terogi oko iyi opii.

⁴²Yen luŋ kede cam luŋ ame ocek i pottiwu bino bedo me a bonyo.

⁴³Orok ame bedo i akinawu bino doko dano a malo meicel kun wun idoko wunu jo a piny meicel.

⁴⁴Ibino koporo wunu banya i baŋgi kun gin mom koporo ginnoro i baŋwu. Gin en ame bino telo wiwu kun wun en ame icoko wunu tere.

⁴⁵Cen magi luŋ bino poto i komwu, bino ryemo yorwu, te makowu, tuno waŋ ame itum wunu ducu, pien ikwero winyo wunu kop a Rwot Obaŋawu, mom imako wunu cikkere kede i icwillere ame en rik ocikowu kede,

⁴⁶Gin bino bedo acalo anyut kede gin me awura i komwu kede i kom ikwaewu nakanaka.

⁴⁷“Pien rik mom itio wunu baŋ Rwot Obaŋawu kun ilelo kede yomcuny pi lwak jami ame onya baŋwu wok-ki,

⁴⁸mannono omio ibino tic wunu baŋ okworwu ame Rwot bino cwayo i komwu kun kec nekowu, oryo pii cirowu, iwoto wunu onoro dok daŋ jami ducu remowu, Rwot bino riyo lodi nyonyo i nutwu tuno ka onekowu ducu.

⁴⁹Rwot bino kelo rok i kannabor me lweny i komwu iyi agikki lobo, rok adwir calo cur otwarre, ame mom iwinyo wunu lebgi,

⁵⁰rok ame wangi tek, ame mom bino paro pi jo oti, akadi bedo i kica moro i kom itino.

⁵¹Gin bino cam itino limwu akwo kede cam ame ocek i pottiwu, tuno waŋ ame obalo limwu luŋ; mom obino wekkiwu kal, kono olok, onyo moo, itino dokwu ame onywalo onyo itino rommiwu kede me dyegiwu; ituno waŋ ame gin omiowu ito wunu.

⁵²Gin bino gurowu i bomawu luŋ, tuno waŋ ame celwu ocuŋ malo iguŋ orette luŋ piny, gin cel me bomawu ame igeno wunu, gin bino gurowu i bomawu luŋ i lobo ame Rwot Obaŋawu omiowu.

⁵³Dok daŋ ibino lokere wunu icamo itinowu ame wun ikomwu inywalo wunu, riŋo kom awobewu kede riŋo kom anyirawu, ame Rwot Obaŋawu omiowu i kare ame ogurowu i bomawu, ame nwoŋo doŋ itye wunu i twon can adwoŋ ame okworwu oketo i komwu.

⁵⁴Ŋat a yom okato kare, ame onwoŋo rik ogwoko atek ateka i akinawu, waŋe bino balle oko i cammere, te twono ominnere, dako mere ame emaro naka atinnere me cogo ame pwod tye i ot baŋe.

⁵⁵En mom bino nywako riŋo kom atinnere ame ecamo kede ŋattoro i akina jo-nono, pien nwoŋo alworo ni cam mom bino doŋe i kare ame okwor ogurowu, ame itye wunu i twon can adwoŋ, can adwoŋ ame okworwu bino keto i komwu i bomawu luŋ.

⁵⁶Dok dako a yom okato kare, ame onwoŋo rik ogwoko atek ateka, ame mom dio cunye me nyono piny atek pien cunye goro meicel dok daŋ yom okato kare, waŋe bino balle oko i cammere, te twono cware ame emaro, wode kede nyare.

⁵⁷En bino twonogi byero ame okato i akina eme kede atin ame enywalo, pien en bino camogi i muŋ pi can jami luŋ ame bino bedo tye i kare ame okworwu bino gurowu ame nwoŋo itye wunu i twon can adwoŋ ame okworwu bino keto i komwu i bomawu luŋ.

⁵⁸“Ka ce mom igwokere wunu me cobo kop ducu me cik man ame ocoo i buk-ki me ibed wunu i lworo i nyiŋ man me Rwot, ame en nyiŋ Obaŋawu obedo nyiŋ me kwogo, dok me alwora,

⁵⁹bino kelo twon cannoro apat i me kare luŋ i komwu kede i kom itinowu, can arac, agwa okato kare, ame ri nakanaka, karacel kede two mogo alit meicel ame caŋo tek meicel.

⁶⁰Edeke luŋ me Miciri ame rik ilworo wunu ca, en bino kela i komwu, te kacakino lake i komwu atwal.

⁶¹Rwot daŋ dok bino medo kelo i komwu kit too ocele mege kede cannogo ocele ame mom ocoo i buk man me cik, tuno waŋ ame otyekowu oko.

⁶²Akadi kono rik ipol wunu acalo acer ame tye malo i polo, welwu bino doŋ anok meicel, pien mom iwinyo wunu kop a Rwot Obaŋawu.

⁶³Doŋ kite acalo rik Rwot yie obedo yom me miyowu nya apol, kittono daŋ yie bino bedo yom me babalowu oko, kede tyekowu. Obino puto lwitwu oko i lobo ame iwot wunu iye me wot gamo wunu bedo megwu.

⁶⁴Dok Rwot bino keketowu oko atata i akina rok apapat, cakere iyi agikki piny tuŋ cel tuno kede iyi tuŋ ocele; kun ame ibino woro wunu iye obaŋe ocele, ame otio i yen kede kiddi, ame yam wunu karacel kede kwariwu mom iŋeo wunu.

⁶⁵I kare luŋ ame it ye wunu i akina rokkono, mom ibino wunu nwoŋo aride moro me weo; kare luŋ ibino bedo wot wunu awota; i kuno, Rwot bino miyo cunywu myel amyela, waŋwu bino rwobere oko, tipo komwu bino bedo ya aya.

⁶⁶Kare luŋ ibino bedo wunu ame cunywu oŋabere aŋaba pi kwowu me anyim; twon lworo adwoŋ bino makowu dyewor kede dyeceŋ kun mom itye wunu kede gennoro pi kwowu.

⁶⁷Pi lworo ame bino miyo tipo komwu bedo popoa kede gin ame waŋwu bedo neno bino miyo idiko ikobo wunu ni, ‘Kono wok iman otyeno, do ber’, eka otyeno dokite kobo wunu ni, ‘Kono wok imanodiko, do ber.’

⁶⁸Rwot dok bino dwokowu cen i Miciri kun terowu kede mel, kadi bed atyeko kwoŋ ni mom dok ibino dok wunu kuno, cen i Miciri. Kare ame itye wunu wun i komwu ibino miye wunu kenwu baŋ okworwu ni kono ocatowu oko acalo opii kede aŋeca, cite mom tye ŋattoro ame bino wilowu.”