Read lango Lodo Cik 29 Bible Online

Lodo Cik 29 - lango bible

Lodo Cik 29

¹Magi en kop ducu ame mako cikere i jo Icrael i lobo Moab, ame Rwot ociko kede Muca, medo i kom en ame Rwot rik ocikere kedgi i Koreb.

²Muca olwoŋo jo Icrael te kobbigi ni, “Wun doŋ ineno wunu ginnoro ducu ame Rwot otimo i kom Parao kede i kom oticcere, kede i kom lobo mere luŋ kun ineno wunu kede waŋwu.

³Twon aoma cuny adoŋo meicel kede anyut ame ineno wunu kede waŋwu, kede twoni taŋo mogo me awura;

⁴entu tuno naka tin-ni Rwot mom ru omiowu cuny me niaŋ iye, onyo me neno, akadi yit me winyo.

⁵An atelowu i tim mwakki pyeraŋwen twal; boŋŋiwu mom oyeyeca i komwu, amukewu daŋ mom oyeyeca i tyenwu;

⁶mom daŋ icamo wunu ogati, mom daŋ imato wunu koŋo olok, akadi kit koŋo moro ocele a mero dano me iŋe wunu ni an abedo Rwot Obaŋawu.

⁷Kare ame ituno wunu kan, Cikon abaka me Kecbon kede Og abaka me Bacan obino lweny i komwa, cite rik ote loyogi oko.

⁸Wan rik ote gamo lobogi oko, ote miyo bedo mea a jo Reuben, jo Gad, kede nucu me atekere a Manace.

⁹Pi mannono myero igwokere wunu icobo kop luŋ me cikere man me nyimwu bed a myero i jami luŋ ame itio wunu.

¹⁰“Wun luŋ tin icuŋ wunu i nyim Rwot Obaŋawu, odoŋe a loo itekerewu, odoŋewu, kede odoŋe ame loo lwak, kede jo Icrael luŋ,

¹¹itinowu atino, monwu kede orok ame bedo i gonywu, ŋat ame mwoddiwu yen kede ŋat ame twommiwu pii,

¹²me wek wun ducu ikwoŋ wunu kwoŋ me cikere a Rwot Obaŋawu, ame Rwot Obaŋawu aketo kedwu tin,

¹³me tin en miwu idok wunu jo mere, en bed Obaŋawu, kite ame en rik ocikowu kede, kede kite a rik okwoŋo kede baŋ kwariwu, baŋ Iburaim, baŋ Icaka, kede baŋ Yakobo.

¹⁴Kwoŋ man me cikere, an mom acikere ka i jo ame tye kan keken,

¹⁵cite acikere naka i jo a mom ocuŋ kedwa kan, karacel kede jo ame ocuŋ kedwa kan aman i nyim Rwot Obaŋawa.

¹⁶“Iŋeo wunu aber kite ame wan obedo kede i lobo me Miciri kede kite ame obedo beo kede i dye rok apapat ame obeo wunu i akinagi.

¹⁷Ineno wunu jami mogo me kwer ame tye baŋgi, cal jogi me yen kede kiddi, me ryal kede me jabu ame onwoŋo tye i akinagi.

¹⁸Gwokere wunu ba, naka mio lo moro, onyo dako moro, onyo jo me doggola moro, onyo me atekere moro ame tye i akinawu, ame cunye tin ca olokere oko i kom woro Rwot Obaŋawu, me wot gire woro obaŋe a rokkaca; naka mio lwit yattoro a nywalo kwir ame nyige kec i akinawu.

¹⁹Ŋat ame ka owinyo kop ame okwoŋo i cikere man, lamo winyo i kome kene kun ko bo i cunye ni, ‘An gira ginnoro mom bino timere i koma, kadi cunya bed nwaŋ’. Mannono bino miyo ajwero jo luŋ oko, jo abeco kede areco.

²⁰Rwot mom bino time kica; akaka ennono akemo a Rwot kede nyeko ame en tye kede, bino duny i kom dano-nono, te miyo cen luŋ ame ocoo i buk man bedo i kome, Rwot te jwayo nyiŋe oko piny i te polo.

²¹Rwot bino yero dano-nono oko i akina atekere luŋ me a jo Icrael, me eket can apek i kome en kene, kun lubo kit cen luŋ ame tye i cikere, ame ocoo i buk man me cik.

²²Eka ikwaewu ame bino lubowu kede itinowu ame tye i newu, kede orok ame bino ya i lobo mogo ame tye kannabor, bino neno twoni can luŋ ame opoto i lobo-nono kede two mogo apek ame Rwot omio omako lobo-nono.

²³Lobo-nono obino balo oko kede mac kede kado, kun odoŋ iye gwen calufa ame mac olio, lobo a mom ocoo iye ginnoro, a ginnoro mom odoŋo iye akadi lum daŋ mom otu iye. Lobo ame oballe atek, ame rom aroma i Codoma kede Gomora, kede Adma kede Jeboim, ame Rwot rik obalo atek i kare ame iniga kede akemo omake.

²⁴Rok luŋ bino kobo ni, ‘Pino kara Rwot otimo lobo-ni kit man? Twon akemo arom man kara ŋit otimere pino ba?’

²⁵Jo bino gamo ni, ‘Otimo pien jo-nono okwero lubo cikere a Rwot ame obedo Obaŋa a kwarigi rikomoko kedgi i kare ame okwanyogi i lobo me Miciri,

²⁶eka gin ote lunyo wot woro obaŋe mogo ocele kun daŋ oryebere i nyimgi, obaŋe mogo ame yam gin mom oŋeo dok daŋ mom rikomiogi me awora.

²⁷Mannono en omio akemo omako Rwot i kom lobo man, te kela iye cen luŋ ame ocoo i buk man.

²⁸Rwot te puto lwitgi oko i lobogi kun iniga, cwercuny kede twon akemo adwoŋ meicel omako, te bologi oko i lobo ocele, kite ame tye kede anaka atot tin.’

²⁹“Rwot Obaŋawa tye kede muŋŋere ame obedo mege en keken, cite gin ame doŋ oyabo oko, nwoŋo doŋ megwa atwal, kede me ikwaewa me wan ocob kop luŋ ame tye i cik man.