Read lango Lodo Cik 3 Bible Online

Lodo Cik 3 - lango bible

Lodo Cik 3

¹“Wan rik ote lokere dok malo i yo a woto Bacan; eka Og abaka me Bacan karacel kede jo mere luŋ te mukere bino lweny i komwa i Edrei.

²Cite Rwot te kobba ni, ‘Kur ilwore, pien atyeko doŋ miye oko i ciŋi, karacel kede jo mere luŋ kede lobo mere; ibino time kite ame rik itimo kede Cikon abaka me a jo Amor, ame rik bedo i Kecbon.’

³Rwot Obaŋawa rik daŋ te miyo Og abaka me Bacan i ciŋwa kittono, karacel kede jo mere; rik ote nekogi tuno waŋ ame ŋattoro acel mom odoŋ baŋe akwo.

⁴I kare-nono wan omao boma mere luŋ, mom tye boma moro ame odoŋ ame mom omao i baŋgi, boma pyerabicel twal, lobo me Argob luŋ ame yam tye i te loc a Og, i Bacan.

⁵Boma magi luŋ rik onwoŋo ocelo i cellogo atek ame ocuŋ oguŋ naka malo, kun tye kede aceg dogcel karacel kede arii mege, medo kede lwak pacci atitino apol ata ame mom ocecelo.

⁶Wan rik ote jwero jo iye luŋ kite ame rik otimo kede Cikon abaka me Kecbon; ojwero jo i boma luŋ, co kede mon kede itino.

⁷Ento lim akwo ame oyako i boma apapat, wan otero odoko megwa.

⁸I kare-naca rik ote kwanyo lobo-nono oko kittono, i ciŋ obakki aryo me a jo Amor ame rik otye loka Jordan, cakere i luŋ me Arnon wot tuno kede naka i kidi me Kermon.

⁹(Jo Cidon lwoŋo Kermon ni Cirion, cite jo Amor olwoŋo ni Cenir).

¹⁰Rik ote mayo boma luŋ ame tye i lobo otiŋere opette, kede lobo Gilead luŋ kede Bacan tuno kede naka i Caleka kede Edrei, ame gin pacci a rik tye i te loc a Og i lobo Bacan.

¹¹(Pien Og abaka me Bacan en ame rik onwoŋo odoŋ kene i akina jo me Repa a rik odoŋ. Nen ba, itanda mere rik onwoŋo obedo itanda nyonyo, pwod tye i Rabba a jo Ammon. Borrere onwoŋo romo futi apar wie adek kede nucu, eka laccere te bedo futi abicel ka opimo i futi me nino ducu.)

¹²“Kare ame doŋ lobo man odoko megwa i kare-nono, amio baŋ jo Reuben, kede jo Gad lobo ame ocakere i Areor, ame tye i dog luŋ me Arnon, karacel kede nucu lobo Gilead ame obedo kidikidi kede boma adoŋo luŋ ame tye iye.

¹³Eka lobo Gilead odoŋere, kede lobo me Bacan luŋ ame onwoŋo tye i te loc a Og, ame obedo lobo me Argod luŋ, ote miyo baŋ nucu atekere a Manace. (Lobo me Bacan-nono luŋ olwoŋo ni lobo a jo Repa.

¹⁴Jair ame obedo jo a Manace rik te tero lobo luŋ me Argob, ame en Bacan, tuno naka i waŋ apokki a jo Gecur kede me a jo Maacat, te cako nyiŋ pacci atino i nyiŋe kene ni Kavotjair, kite a pwod tye kede naka tin.)

¹⁵Eka ate miyo lobo me Gilead baŋ Makir,

¹⁶eka baŋ jo Reuben kede jo Gad rik ate miyo lobo ame ocakere i Gilead te wot naka i luŋ me Arnon, kun luŋ en ame obedo waŋ apokki mere tuno naka i kulo Jabok, ame obedo waŋ lobo a jo Ammon.

¹⁷Rik te miye daŋ Araba, kun Jordan en ame obedo waŋ apokki mere, cakere i nam me Kineret, tuno kede naka i nam me Araba, ame en Nam me Kado, en lobo ame tye i kor kidi me Piciga, ame tye tutuŋ kide.

¹⁸“Dok rik acikowu i kare-nono kun akobo ni, ‘Rwot Obaŋawu doŋ otyeko miyowu lobo man oko me bed megwu. Jowu luŋ a tek i lweny bino ruko jami lwenygi kato kede loka ca i nyim omegowu, ame gin jo Icrael.

¹⁹Cite monwu kede itinowu atino kede limwu akwo, (pien aŋeo ni itye wunu i lwak lim apipim), gin bino doŋ i boma ame doŋ aminowu-ni,

²⁰tuno wan a Rwot doŋ omio omegowu ka weo, kite ame omiowu kede ka weo-ni, ame gin daŋ doŋ onwoŋo lobogi ame Rwot Obaŋawu bino miyogi loka Jordan; icennere wun doŋ ibino dwogo wunu kun ŋat acel acel dwogo i lobo mere a doŋ amiowu-ni.’

²¹I kare-naca rik aciko Yocwa ni, ‘Yin doŋ ityeko neno i waŋi ginnoro luŋ ame Rwot Obaŋawu otyeko tiyo i kom obakki aryo ca; Rwot dok bino timo kittono i kom loc luŋ ame ibino tuno wunu iye ka ikato wunu loka ca.

²²Kur ilwor wunugi, pien Rwot Obaŋawu en ame tye ka lweny pirwu.’

²³“I kare-naca rik abin abako doga baŋ Rwot kun akobo ni,

²⁴‘Rwot Obaŋawa, nen yin pwod icako nyuto ditti kede twer me ciŋi acaka baŋ amironi. Mom tye Obaŋa moro i polo onyo i lobo ame twero tiyo tic apek meicel acalo magi!

²⁵Tima kica iwek awot loka awot anen lobo ame tye loka Jordan, lobo obedo kidikidi aber wok ca, karacel kede Lebanon.’

²⁶Ento rik akemo te mako Rwot i koma pirwu, mom te ye winyo koppa. Rwot te kobba ni ‘Mano doŋ romo; kur imed kobo koppono baŋa.

²⁷Wot iyit malo i wi kidi me Piciga, me itiŋ waŋi inen tutuŋ to kede i tutuŋ anyorodi, kede i tutuŋ anyarolum, kede i tutuŋ kide, me inen lobo-nono,

²⁸icik Yocwa, icukoro cunye kun imie teko: pien en aye bino kato loka ca kun telo wi lwak man en bino miyogi oleo lobo ame ibino neno-nono.’

²⁹Mannono en omio wan obedo i luŋ ame otikere i Bet-peor.