Read lango Lodo Cik 30 Bible Online

Lodo Cik 30 - lango bible

Lodo Cik 30

¹“Doŋ ka ce gum magi luŋ kede cen ame atyeko keto i nyimwu-ni bino timere i komwu, ka ce ipoo wunu iye i kare ame itye wunu i akina rok luŋ apapat, kan ame Rwot Obaŋawu bino ryemowu, terowu iye,

²ka ce ibino ŋut wunu, ite dwogo wunu baŋ Rwot Obaŋawu, wun karacel kede ikwaewu, ite winye wunu i kop luŋ ame acikowu iye tin, kun iwinye wunu i cunywu luŋ kede tipowu luŋ.

³Kica bino mako Rwot Obaŋawu i komwu, te dwoggo gumwu baŋwu; en bino dok cokowu luŋ i akina rok luŋ ame en rik okeketowu iye.

⁴Jowu luŋ ame onwoŋo odwiro kagimogo abor meicel, Rwot Obaŋa bino cokogi oko i kuno; en bino omogi gire oko i kuno.

⁵Rwot Obaŋawu bino kelowu i lobo a rik kwariwu ogamo obedo megi, me wun igam wunu bed megwu. Rwot bino miyo jami apipim nya baŋwu kun daŋ welwu bup kato me a kwariwu oko.

⁶Rwot bino miyo ibedo wunu jo olirre i cunygi karacel kede ikwaewu, ame bino miyo imaro wunu Rwot Obaŋawu kede cunywu ducu kede tipowu ducu, me ibed wunu kwo.

⁷Rwot Obaŋawu bino miyo cen magi luŋ mako okworwu kede jo ame wunowu.

⁸Wun dok ibino winyo wunu kop a Rwot, ite mako wunu cikere luŋ ame acikowu kede tin.

⁹Rwot Obaŋawu bino miyo jami apipim nya baŋwu i ginnoro ame ciŋwu ogudo, itino ame inywalo wunu, kede itino limwu akwo kede cam ame cek i pottiwu, pien yi Rwot dok bino bedo ayom me miyo jami nya baŋwu, kite a rik yie obedo kede ayom i kom kwariwu,

¹⁰ka ce iwinyo wunu koppere dok daŋ imako wunu cikkere luŋ karacel kede icwillere luŋ ame ocoo i buk man me cik, ka ce iŋut wunu, ite dok wunu baŋ Rwot Obaŋawu kede cunywu ducu kede tipowu ducu.

¹¹“Pien cik ame acikowu kede tin-ni, mom gire tek wok, dok daŋ mom tye kannabor wok i baŋwu.

¹²Mom gire tye i polo twal, ame kono mi ikob wunu ni, ‘Ŋa kara ame bino wot malo i polo me wot ommiwa, me owiny ote daŋ cobo?’

¹³Mom daŋ gire tye loka tuŋ ca twal, ame kono mi ikob wunu ni, ‘Ŋa kara ame bino ŋolo nam kato tuŋ ca, me wot kelliwa, me owiny ote daŋ cobo?’

¹⁴Ento koppono kom ceggi acega kedwu, koppono gire tye i dogwu kede i cunywu, ame mio itwero wunu cobo gire.

¹⁵“Nen ba, tin doŋ atyeko keto i nyimwu kwo, kede gin aber, to kede gin arac.

¹⁶Ka ce ibedo wunu owiny cik a Rwot Obaŋawu luŋ ame acikowu kede tin-ni, imare wunu dok daŋ ilubo wunu yo ame en mito kun daŋ imako wunu cikkere luŋ kede icwillere luŋ kede gin ame en ociko luŋ; ibino bedo wunu kwo kun welwu nya medde ameda. Rwot Obaŋawu bino miyowu winyo i lobo ame iwot wunu donyo iye me gamo bedo megwu.

¹⁷Ento ka ce cunywu olokere oko teŋe, eka mom ite winyo wunu, ento ite lokere wunu ryebere i nyim obaŋe mogo ocele kun iworogi wunu,

¹⁸tin doŋ atucciwu oko ni, ibino wunu to oko; mom ibino perakino wunu kare alac i lobo ame iwot wunu iye loka Jordan, ame iwot donyo wunu iye me wot gamo bedo megwu.

¹⁹Tin alwoŋo polo kede lobo me bedo caden i komwu, me moko ni an doŋ aketo i nyimwu kwo kede to, gum kede cen; pi mannono myero iyer wunu kwo wek wun karacel kede ikwaewu ibed wunu kwo,

²⁰kun imaro wunu Rwot Obaŋawu, iwinyo wunu koppere, dok daŋ imoko wunu i kome, mannono bino miyo ibedo wunu kwo dok daŋ iperakino wunu i lobo, ame rik Rwot okwoŋo pire baŋ kwariwu Iburaim, Icaka kede Yakobo, ni abino miyogi.”