Read lango Lodo Cik 31 Bible Online

Lodo Cik 31 - lango bible

Lodo Cik 31

¹Muca rik te medde kobo kop magi baŋ jo Icrael.

²En okobbigi ni, “An mwaka me ditta tin doŋ oromo mia acel kede pyeraryo nono; an gira mom doŋ aromo telowu. Rwot doŋ otyeko kobba ni, ‘Yin mom dok ibino ŋolo Jordan ikato tuŋ ca’.

³Rwot Obaŋawu i kome en ame bino wot telo nyimwu; en bino tyeko rok magi luŋ oko i nyimwu me ile wunu lobogi bed megwu. Yocwa en ame bino wot kedwu acalo atelwu, kite ame Rwot rik okobo kede.

⁴Rwot bino timogi kite ame rik otimo kede Cikon kede Og, obakki a jo Amor karacel kede lobogi, i kare ame en rik otyekogi iye.

⁵Rwot bino miyogi i ciŋwu, wun ibino timogi wunu kun ilubo wunu cik luŋ ame atyeko cikowu kede.

⁶Myero icuŋ wunu atek ame cunywu nwaŋ. Kur ilworgi wunu, cunywu daŋ kur poti pirgi, pien Rwot Obaŋawu tye kedwu i kabedo luŋ ame ibino wot wunu iye. En mom bino bolowu, dok daŋ mom bino wekowu.”

⁷Muca rik te lwoŋo Yocwa bino kobbe i nyim lwak luŋ ni, “Yin myero icuŋ atek ame cunyi nwaŋ; pien yin ibino tero jo man i lobo ame Rwot rik okwoŋo pire baŋ kwarigi ni, ebino miyogi, yin ibino miyogi ogamo lobonaca bedo meggi.

⁸Rwot ikome en ame bino telo nyimi; en bino gwok i, mom bino boli, dok daŋ mom bino weki ata. Kur ibed alwor, cunyi daŋ kur poti.”

⁹Muca te coyo cik man, te miyo baŋ olamdog ame gin obedo ikwae a Levi, ame tino canduk me cikere a Rwot, karacel kede baŋ odoŋe a jo Icrael.

¹⁰Muca te cikogi ni, “Iyi agikki me mwaka abiro abiro, i kare me kwero ecuban me gonye, i mwaka ame ociko me jalo bannyi,

¹¹ka jo Icrael luŋ obino me woro Rwot Obaŋawu i kabedo moro ame en bino yero, ibino kwano wunu cik man kun jo Icrael luŋ winyo.

¹²Mi jo Icrael luŋ cokere karacel, co, mon, itino atino kede orok ame bedo i akinawu, i bomawu luŋ, me wek gin owiny cik a Rwot, dok daŋ opwony lworo Rwot Obaŋawu, dok ogwokere daŋ me cobo kop luŋ ame tye i cik man,

¹³me ikwaegi ame yam mom ŋeo daŋ winy, ote pwonyo lworo Rwot Obaŋawu pi kare luŋ ame ibino bedo wunu kede i lobo ame iwot wunu iye loka Jordan, me wot gamo bedo megwu.”

¹⁴Rwot dok te kobbi Muca ni, “Nen ba, nino me toni doŋ ceggi acega; lwoŋ Yocwa, me icuŋ wunu i kema me rwatte, me acike.” Eka Muca kede Yocwa te wot cuŋ i kema me rwatte.

¹⁵Rwot rik te nen i kema me rwatte kun nen i pagi me pol; pagi me polloro te cuŋ i ŋet doggola me kema.

¹⁶Rwot te kobbi Muca ni, “Nen ba, yin doŋ iceggi wot weo karacel kede kwarini; i ŋe ennono, rok man bino doko alaya pi woro obaŋe mogo ocele ame kun otimo tim me alaya baŋgi, i lobo ame gin owot bedo iye i akinagi, eka ote weka oko, ote turo cikere ame rik acikere kede kedgi.

¹⁷Mannono bino miyo akemo maka i komgi i kare-naca, an daŋ ate wekogi oko, mom dok ote medde neno waŋa, ate daŋ nekogi oko ducu. Ayela kede can bino bedo dwoŋ meicel i komgi, ame bino miyo gin kobo i kare-naca ni, ‘Ayela magi luŋ obino i komwa pien Obaŋawa mom tye i akinawa.’

¹⁸Ateteni abino kanne gira oko i kare-naca, ame gin mom dok obino neno waŋa pien gin otimo tim areco, gin olunyo lokere baŋ obaŋe mogo ocele.

¹⁹Pi mannono ba, aman co wer man, me ipwony kede jo Icrael; migi omak wer man, me bed cadenna i kom jo Icrael.

²⁰Pien i kare ame abino terogi i lobo ame cak kede moo kic dwoŋ iye meicel, ame rik akwoŋo me miyo baŋ kwarigi, gin obino camo cem iye ote yeŋ, ote daŋ cwe, gin obino lokere woro obaŋe mogo ocele, ote lunyo caya kun daŋ oturo cikerena.

²¹Eka i kare ame ayela kede can opo to i komgi, wer man bino bedo caden i nyimgi pien ikwaegi bino bedo wero wer man kun mom rwenyo. An doŋ onwoŋo aŋeo gin ame tye i cunygi kun mom ru oterogi i lobo ame rik akwoŋo me miyogi.”

²²Muca rik daŋ te coyo wer man i nino-naca ikome, te daŋ cako pwonyo i jo Icrael.

²³Rwot doŋ te ciko Yocwa wot a Nuni kun kobo ni, “Cuŋ atek ame cunyi nwaŋ, pien yin ibino tero jo Icrael i lobo ame rik akwoŋo me miyogi; an abino bedo kedi.”

²⁴Kare ame Muca doŋ otyeko coyo kop luŋ me cik man i buk naka iyi agikki mere,

²⁵Muca rik te ciko jo Levi ame gin otiŋ canduk me cikere a Rwot ni,

²⁶“Gam wunu buk man me cik, wot iket wunu iŋet canduk me cikere a Rwot Obaŋawu, me bed kuno acalo caden i komwu.

²⁷Pien an aŋeo jemwu kede nwaŋ a ŋutwu; koŋ inen i kare ame an pwod atye kwo, wun ibedo wunu jem i kom Rwot, kara doŋ jemwu bino bedo adwoŋ rom mene i kare ame an doŋ ato oko?

²⁸Mi odoŋe luŋ me atekerewu ducu cokere karacel baŋa, kede otel a lwak, me akob kop magi kun gin awinyo, me alwoŋ polo kede lobo caden i komgi.

²⁹Pien aŋea ni ka doŋ ato oko, wun ibino balle wunu oko, kun igak wunu, iweko wunu yo ame acikowu iye oko. Eka icennere, ayelayela bino cako poto i komwu, pien nwoŋo i bedo timo wunu ginnoro arac i nyim Rwot, kun tic ame itio wunu mio akemo make.”

³⁰Muca rik te kobo kop ame tye i wer man naka tyeko ducu, kun lwak jo Icrael luŋ ame ocokere karacel winyo.