Read lango Lodo Cik 32 Bible Online

Lodo Cik 32 - lango bible

Lodo Cik 32

¹“Cik wunu yitwu, wun polo luŋ ka akobo kedwu; wun lobo daŋ winy wunu kop ame aya i doga.

²Pwony mera myero ony calo kot, koppa myero ton calo toyo, acalo kot ame cwe i kom lum alyabu, dok acalo kot ame aŋido i kom modo,

³Pien abino rabo nyiŋ Rwot, abino tito dit Obaŋawa.”

⁴“En Kidi ame ticcere luŋ roccoro mom iye, pien i yo mere luŋ, en ŋolo kop atira, En Obaŋa ame genne, a mom i balloro, Obaŋa ame kite atira, a mom leŋere,

⁵Gin doŋ oballe oko i nyime, gin doŋ mom itino mere pi roc a tye i komgi; gin doŋ jo ogom ame kitegi oballe oko,

⁶Wun iculo wunu Rwot kittono, wun jo amiŋ ame ryekogi pe? Mom en obedo papawu ame oketowu? Mom en a rik ocweowu, te miyowu bedo tye?

⁷Koŋ ipoyo wunu kop me kare acon, tam wunu gin otimere i mwakkinaca luŋ; peny wunu papawu me titiwu, kede odoŋewu ame gin daŋ kobbiwu.

⁸Kare ame En Amalo Meicel omio lobogi baŋ rok apapat, kare ame en popoko jo luŋ, en opoko wan lobo a rok ducu, kun lubo wel itino Obaŋa.

⁹Ento dula Rwot ame en opoko obedo jo mere; me re ame en opoko pire en ikokome obedo Yakobo.”

¹⁰“Ento rik onwoŋe i tim, kakannoro arac, a ŋattoro daŋ mom iye; ogure dyere, te gwoke, kun litte calo ton waŋe.

¹¹Kite ame cur cukoro kede cuny itino mere i ode, teteŋo bwome malo i wigi, yaro bwome, makogi kede, te tinogi i bwome.

¹²Rwot kene en a rik obedo telle iyo, obaŋa a rokkoro ocele onwoŋo mom tye baŋe,

¹³Omio en oyito malo i lobo kan obedo kidikidi en te camo gin ocek i poto; te miye daŋ doto moo kic i lela, kede moo ame mollo i lela atek;

¹⁴cak dok awac kede cak dyegi, dwolo itino rommi kede me a nyogi rommi, dok me Bacan kede dyegi, karacel kede ŋano aber meicel kede pig olok aber ame imato kono mere.”

¹⁵“Ento Jecurun ocwe atek, te ero gweyo oko; icwe atek ame komi pek, icamo atek; eka ite weko Obaŋa ame oketi oko, ite daŋ cayo kidi ame olari oko.

¹⁶Gin te bedo miyo nyeko make pi obaŋe mogo a wele kun oroke i timmogo me kwer, omio akemo make.

¹⁷Oyalo jogi ame mom obedo obaŋa, obaŋe mogo ame yam gin mom oŋeo, obaŋe mogo anyen ame obino icen, a rik mom opoto cuny kwarigi.

¹⁸Wiwu owil oko i kom Kidi ame obedo papawu, mom daŋ ipo wunu i kom Obaŋa ame omiowu kwo.

¹⁹Kare ame Rwot rik oneno man, cunye ocaogi oko, pien awobe mere kede anyira obedo roke,

²⁰Omio en te kobo ni, ‘Abino wumo waŋa oko mom dok oneno, me koŋ anen gin ame bino timere i komgi, pien gin obedo lwagi jo ame oballe oko, itino ame mom ogen.

²¹Gin omio nyeko omaka pi woro gigi mogo a mom obaŋa, gin obedo roka pi gigi mogo a konygi pe. Pi mannono an doŋ abino miyo nyeko makogi pi yero rok a mom rok ikome, abino miyo rokkoro amiŋ en arokogi.

²²Pien akemona doŋ ocwinyo mac oko, maccono bino waŋ naka i te Cŋol piny, kun waŋo lobo kede ginnoro luŋ a tye iye, dok daŋ bino cwinyo mac i te acakki kiddi luŋ.’ ”

²³“ ‘Abino coko kit raccoro luŋ ayido i komgi, aterona luŋ bino tum i komgi.

²⁴Kare a doŋ kec omiogi odoko goro, ame doŋ lyeto me two otyekogi oko, karacel kede edeke moro ame kwirrere gwa, abino doŋ cwayo leyi me tim mwodogi oko, karacel kede leyi ame lak alaka ame kwirgi tye.

²⁵Ka gin tye oko, pala romo bino nekogi, ka otye i ot, lworo bino cirogi oko, awobe kede anyira bino tum oko, itino ame dot kede odoŋe a wigi i lwar.

²⁶Kono akobo ni, Abino keketogi oko kannabor, abino miyo nyingi rwenyo oko i akina jo,

²⁷ento alworo ni okwor bino bedo roka, ka ce gin odwanyo gin otimere kun okobo ni, Wan gire en ame oloo, mom Rwot, Rwot gire mom otimo ginnoro kadi acel’.”

²⁸“Pien gin obedo orok ame ryekogi rwenyo oko, ame niaŋ i te kop loogi oko,

²⁹Kono gin onwoŋo ryek, kono gin oniaŋ te kop man, kono gin oŋeo gin ame bino timere i komgi.

³⁰Dano acel twero ryemo jo tutumia i yore aŋo, onyo jo aryo twero miyo jo tutumia apar riŋo i yore aŋo, ka ce Kidigi mom owekogi oko, dok Rwot mom ojalogi i ciŋgi?

³¹Pien kidigi mom rom i Kidiwa, akadi okworwa daŋ twero ye amannono.

³²Pien olokgi okelo i Codoma, kun daŋ oya i potti olok me Gomora; piggi tye iye kwir, etakgi daŋ kec;

³³koŋogi obedo kwir twol, kwir a codocodo ager meicel.

³⁴Magi-nono luŋ mom en gin ame akano baŋa, kun omwomwono oko i ka kano limma?

³⁵Twer me culo kwor kede culogi pi balgi tye i wia, kuro ka kare ame tyengi bino cer iye; pien nino ame can abino kede i komgi doŋ ceggi acega, cangi-nono abino oyotoyot.

³⁶Pien Rwot bino miyo jo mere loo kop, dok kica bino make i kom omiro mere, ka oneno ni tekogi moro doŋ mom, ame ŋattoro mom doŋ odoŋ, ame opii onyo a mom opii.

³⁷En bino kobo ni, ‘Obaŋagi kara tye kwene, kede kidi ame yam gin oriŋo olaro,

³⁸ame camo dwolgi me mot oŋolo, dok ame mato yino me mot amatagi? Myero gin oya malo me okonywu, myero gin ogwokwu.’

³⁹‘Tin doŋ myero iŋe wunu ni, an kena en ame abedo Obaŋa, mom dok tye obaŋa moro ocele kono ka an keken. An en aneko nek, dok an en a mio kwo; an en a wano dano, dok an en a daŋ a caŋo; gin a doŋ tye i ciŋa, mom tye ŋat a dok twero laro.

⁴⁰Pien an atiŋo ciŋa malo i polo, eka ate kwoŋ ni, Kite ame an abedo kede kwo nakanaka-ni,

⁴¹ka apako pala romona me meny, eka ate ryeyo ciŋa me cobo kop ame aŋolo, abino culo kwor i kom okworra, dok abino keto can i kom jo ame daga.

⁴²Abino miyo aterona mer kede remo pala romona bino camo riŋo, remo a jo ame oneko, kede ame omako kede riŋo kom okwor ame yer wigi olot aboco.’ ”

⁴³“Pak wunu jo mere, wun rok ducu; pien en bino culo kwor me remo omiro mere, en bino culo kwor i kom okworrere, kun kwanyo kede bal i kom lobo a jo mere.”

⁴⁴Muca rik te bino kobo kop ame tye i wer magi luŋ kun kwano ame lwak luŋ awinyo, en karacel kede Yocwa wot a Nuni.

⁴⁵Kare ame Muca doŋ otyeko kobo kop magi luŋ baŋ jo Icrael luŋ,

⁴⁶en okobbigi ni, “Keto wunu cunywu imako kop magi luŋ, kop ame tin amoko kedwu-ni, me icik wunu itinowu daŋ i kop man, me gin daŋ gwokere me cobo kop luŋ ame tye i cik man.

⁴⁷Pien man mom obedo kopporo a konyere mom baŋwu, pien otiko kwowa i kome, ame bino miyo iperakino wunu i lobo ame iwot wunu iye loka Jordan, me wot gamo bedo megwu.”

⁴⁸I nino-nono ikome, Rwot rik te kobbi Muca ni,

⁴⁹“Yit i wi kidi man me Abarim, kidi me Nebo, ame tye i lobo me Moab, ame otemere kede Jeriko, me inen lobo me Kanaan ame amiyo baŋ jo Icrael me bedo megi.

⁵⁰Ibino to doŋ i wi kidi ame iyito-nono, ite wot nywako kabedo kede kwariwu; kite ame ominni Aron oto kede i wi kidi me Kor, te wot nywako kabedo kede kwari mere;

⁵¹pien ituro cikka oko, i nyim jo Icrael i dog pii me Meriba i Kadec i tim me yin, ikwero nyuta i nyim jo Icrael ni an acil,

⁵²Pien ibino neno lobo-nono i kannabor, cite mom ibino wot donyo i lobo ame abino miyo baŋ jo Icrael.”